گنبد‌کاووسداکی اعتراضلار؛ گلستان اینقیلاب کئشیکچیلری کوماندیری خالقی تهدید ائتدی
گلستان ایالتی‌نین یئرلی یئتکیلیلری‌نین گنبدکاووس خالقی‌نین «عرب سورنگ» کندینده ایکی اوشاغا جینسی تجاووز ادعاسینین اتهامینین ديیشدیریلمه‌سینه اعتراض اولاراق توپلانماسینا تپکیلری داوام ائدیر.
۵ فروردین ۱۴۰۰ جوما آخشامی گونو، گلستان ایالتی‌نین اینقیلاب کئشیکچیلری کوماندیری «علی ملک شاه‌کوهی»، مئدیایا «ایسلام رژیمینین قورونماسی واجیبدیر و بو قونو ایسلام حؤکومتی‌نین چرچیوه‌سینده اولان هر بیر موسلمان اوچون واجیب ساییلیر” دئدی.
آیریجا او، «اینقیلاب عسکرلری‌نین، بیرلیک، گوونلیک و دوشمنلرین پیس نییتلیلره قارشیلیق وئرمکدن بیر آن بئله چکینمه‌یه‌جکلرینی» سؤیله‌دی.
اینقیلاب کئشیکچیلری کوماندیری‌نین تهدیدی ایله عینی زاماندا، گلستان والیسی «هادی حق‌شناس» گنبد کاووسا گزینتیسی سیراسیندا گنبد کاووسون آغ‌ساققاللارینا و یئتکیلیلرینه و اؤزللیکله گنبد کاووسون گنجلرینه «صبر» ائتدیکلری اوچون تشکور ائتدی و اونلارین صبری‌نین «اینقیلابا قارشی اولانلارین گلستان سددی اولایندان سواستفاده ائتمه‌سی‌نین قارشیسینی آلدیغینی» سؤیله‌دی.
حق‌شناس، بوتون قوروملارین ایشبیرلیگی ایله «خاریجی مئدیانین ایالتین بیرلیگینه ضرر وئرمه‌سینه ایجازه وئرمه‌یه‌جییک» دئدی.
گلستان والیسی، «ایکی گوناهسیز اوشاغا ائدیلن تعروضون فاجعه بیر اولای اولدوغونو» سؤیله‌یه‌رک، «سوچلونون» ان قیسا زاماندا محکمه طرفیندن جزالاندیریلماسیندان دانیشدی.
۳ فروردین ۱۴۰۰ چارشنبه آخشامی گونو، چوخ ساییدا وطنداش، «تجاووز» یئرینه «قاچیرما» ایله سوچلاندیقلاری خبری‌نین یاییملانماسی ایله گنبدکاووس محکمه‌‌سی‌نین قارشیسیندا توپلاندی.
بو توپلانما، یئرلی اهالی طرفیندن گلستان ایالتی‌نینده گنبد کاووسون عرب سورنگ کندیندن ۷ و ۸ یاشلی ایکی قیزا «تجاووز ائتمکده» سوچلاندیریان ۵۴ یاشلی ارکگین توتولماسیندان سونرا باش وئردی.
یئرلی قایناقلار بو آدامین بسیج عضوو اولدوغونو و ایکی قیزین یاشادیغی کندین یاخینلیغیندا یئرلشن گلستان سددی‌نین گؤزتچیسی اولدوغونو سؤیله‌ییرلر.
۴ فروردین چهارشنبه گونو، اسکیدن گلستان ایالتی‌نین محکمه‌سینده گوونلیک گؤرولیسی اولان گنبد کاووس محکمه باشقانی ، ایکی اوشاغین عدلی موعاینه‌سی ایله سددین گؤزتچیسی‌نین «تجاووز» سوچلاماسی‌نین رد اولوندوغونو و ایندی اونون «آدام قاچیرما» سوچلاماسی ایله گؤز‌آلتیندا توتولدوغونو سؤیله‌دی.
iranwire
