قادین جینایتی؛ تهراندا بیر قادین حیات یولداشی طرفیندن اؤلدورولدو
ایران مئدیاسی کهریزکده گنج بیر قادینین حیات یولداشی طرفیندن اؤلدورولدویونو بیلدیردی.
بیر بلدیه ایشچیسی گنج قادینین جسدینی “نایلونا بوکولموش” و “یورغانا بوکولموش” حالدا تهرانین آزادگان اتو یولوندا تاپدی.
بو ۳۲ یاشلی قادینین آدی “نرگس ثریا خطیر” و گلستان ایالتینین گرگان شهریندن ایدی.
رکنا خبر آژانسی، خانیم خطیرین جسدی‌نین تهران بلدیه‌سی‌نین بیر ایشچیسی طرفیندن ۴ فروردین ۱۴۰۰ چارشنبه گونو سحر ساعتلاریندا تاپیلدیغینی بیلدیردی.
گنج قادینین قارداشی، باجیسی‌نین جینایتین باش وئردیگی گئجه‌دن ایکی گون اؤنجه گرگانداکی ائولرینه زنگ ائتدیگینی و اورا گئتمک ایسته‌دیگینی سؤیله‌دی. آنجاق عائله کیملیگینی اونایلاماق اوچون گئدن گونه قدر اوندان خبر آلا بیلمه‌میشدی.
او آیریجا بونلاری دئدی: «باجیمین حیات یولداشی بهمن، قتلدن سونرا خوزستانا قاچدی، آما سونوجدا توتولدو و باجیمی اؤلدوردویونو اعتراف ائتدی. باجیمین جسدینی آلماق اوچون هله ده کهریزکده‌کی محکمه طیبی‌نین قاباغینداییق.»
اؤلن قادینین قارداشی باجیسی‌نین حیات یولداشی طرفیندن نئجه اؤلدورولدویونو آنلاتدی: «نرگس‌ین حیات یولداشی اؤنجه اونون باشینا سرت بیر جیسیمله ووردو و سونرا بوغدو، داها سونرا نایلون و یورغانا بوکولموش جسدینی کهریزکده‌کی ائولریندن آزادگان اتو یولونا آپاردی.»
او آیریجا باجیسی‌نین حیات یولداشی ایله “جدی فیکیر آیریلیقلاری” اولدوغونو و باجیلارینا حیات یولداشی‌نین بیر واختلار اونون دیلینی کسمک ایسته‌دیگینی سؤیله‌دیینی ده آرتیردی.
خانیم خطرین حیات یولداشی اونون اؤزل اتومبیلی‌ایله موسافیر داشیییرمیش و قارداشی‌نین دئدیگینه گؤره قتل گئجه‌سی ده اونلارین تارتیشماسی خطیرین اؤزل اتومبیلی ایله گرگانا موسافیرت ائتمه‌سی اوستونده اولوب.
ایسلام جمهورییتی‌نین قانونلارینا گؤره، ائولی قادینلار، ایشله‌مک، اؤلکه‌نی ترک ائتمک و یاشاییش یئری سئچمک کیمی بیرچوخ تمل حوقوقلاری اوچون حیات یولداشلارینا اطاعت ائتمه‌لیدیرلر.
سون آیلاردا حیات یولداشلاری، قارداشلاری و آتالاری طرفیندن قادین جینایتی و قادینلارین اؤلدورولمه‌سی ایله ایلگیلی بیر چوخ راپورلار یایینلاندی.
کئچن ایل خرداد آیینین اولینده تالشده “رومینا اشرفی” آدلی ۱۴ یاشلی بیر قیزین آتاسی اوراقلا اونون باشینی کسدی و آتاسینا یالنیز ۹ ایل حبس جزاسی وئریلدی.
رومینا اشرفی‌نین آتاسی اوشاغینی اؤلدورمه‌دن اؤنجه بیر وکیلیدن قیزی‌نی اؤلدورمه‌سی‌نین جزالاری ایله ایلگیلی سورولار سوروشموشدو.
iranwire
