جاوید دهقان خلد، اعدام حؤکمونون ایجرا ائدیلمه‌سی اوچون زاهدان حبس‌خاناسی‌نین قرنطینه‌سینه کؤچورولدو
ایسلام جمهورییتی حبس‌خانالاریندا بلوچ محبوسلاری‌نین گئنیش و تایی گؤرونمه‌میش اعدام دالغاسی‌نین آردیندان باشقا بیر محکوم اعدام جزاسینین ایجراسی اوچون زاهدان حبس‌خاناسی‌نین قرنطینه‌سینه کؤچورولدو.
محکمه وکیلی مصطفی نیلی، بو محبوسون آدینی جاوید دهقان خلد اولاراق اعلان ائتدی.
بو محبوسون وکیلی اولان جناب نیلی، 9 بهمن جوما آخشامی گونو توییتر حِسابیندا جاوید دهقان خلدین عائله‌‌‌سی ایله تماس قوراراق زهدان حبس‌خاناسی قرنطینه‌سینه کؤچورولدویونو و سون زیارت اوچون حبس‌خانایا گئتمه‌لرینی ایسته‌دینی یازیب.
مصطفی نیلی، اوچ گون اؤنجه جناب دهقان خلدین پرونده‌سینه دایر محکمه آراشدیرماسی‌نین رد ائدیلمه‌سی‌نین سیستمده قئیده آلیندیغینی و 477-جی ماده‌‌نین تطبیقی طلبینی شنبه گونو قئید ائتمک ایسته‌دیگینی توییتی‌نین داوامیندا یازیب.
او، “اعدام اوچون هئچ واخت گئج دئییل، آنجاق ائدیلرسه، تلافی اولونماز” دئیه یازدی.
جینایت آراشدیرما سورجی قانونونون 477-جی ماده‌‌سینه گؤره، محکمه حاکمیتی رییسی محکمه اورقانلاری‌نین هر هانسی بیری طرفیندن چیخاریلان قطعی حؤکمو ایسلام قانونلارینا ضد حِساب ائدرسه، پرونده‌نی یئنیدن آراشدیریلماسی اوچون عالی محکمه‌‌یه گؤندره‌جکدیر کی بو مسئله اوچون محکمه حاکمیتی رییسی طرفیندن تعیین اولونموش اؤزل بیر شؤبه‌ده قطعی قرار و حؤکم وئریلسین.
ایندییه قدر بیر نئچه بلوچ محبوس، وکیللری‌نین 477-جی ماده‌‌نین اویغولانماسی ایسته‌یینه باخیلمادان اؤنجه اعدام ائدیلدی.
جناب دهقان خلده قارشی هئچ بیر اتهام ایره‌لی سورولمه‌ییب، لاکین اونون پرونده‌سی‌نین «جیش العدل» عضوو اولماق اتهامی ایله دی آیینین آلتی‌سیندا سحر چاغی زاهدان حبس‌خاناسیندا اعدام ائدیلن باشقا بیر بلوچ محبوسو میر بلوچ‌زهی ایله علاقه‌‌‌لی اولدوغو دئییلیر.
ایران اینسان حوقوقلاری تشکیلاتینا گؤره، بلوچ وطنداشلاری‌نین اعدامی سون بئش هفته عرضینده داها دا آرتدی، ان آزی 19 بلوچ مشهد و زاهدانین مرکزی حبس‌خانالاریندا اعدام ائدیلدی، اونلاردان دؤردو گوونلیک و سیاسی اتهاملارلا اعدام جزاسینا محکوم ائدیلدی.
بو تشکیلاتا گؤره، حاضیردا زاهدان مرکزی حبس‌خاناسیندا اعدام حؤکملری کسینلشن 124 محکوم وار.
