اورمیه حبس‌خاناسیندا ال کسیلمه‌سینه محکوم ائدیلن بیر محبوس اینتیحار ائتدی
اورمیه حبس‌خاناسیندا ساغ الینین دؤرد بارماغی‌نین کسیلمه‌سینه محکوم اولان هادی رستمی قیریق شوشه یئیه‌رک اینتیحار ائتدی.
هرانا وب سایتی، هادی رستمی‌نین، ۲۹ دی ۱۳۹۹ بازار ائرته‌سی گئجه‌سی، اورمیه حبس‌خاناسی‌نین گوونلی بندینده ساخلانیلماسینا داوام ائتمه‌سینه اعتراض اولاراق اینتیحار ائتدیگینی و خسته‌خانایا آپاریلدیغینی خبر وئردی.
بو خبره گؤره، هادی رستمی تخمیناً بیر آی ۲۰ گون اؤنجه اورمیه حبس‌خاناسی‌نین گوونلی بندینه کؤچورولدو و حبس‌خانا ایشچیلری اونا بو بندیده آلتی آی داها دؤزمه‌لی اولاجاغینی سؤیله‌دی.
هادی رستمی ۱۳۶۵-جی ایلده آنادان اولوب و ایلام ایالتی‌نین مئهران شهریندن و ائولیدیر.
بو محبوس ۱۳۹۴-جو ایلده باشقا ایکی وطنداشلا بیرلیکده سویغونچولوق اتهامی ایله حبس اولوندو.۱۳۹۸-جی ایلین آبانیندا اورمیه جینایت محکمه‌‌سی‌نین ۱ سایلی شؤبه‌سینده دؤرد سویغونچولوغا گؤره ساغ الینین دؤرد بارماغینی اوجوندان باش بارماغی‌نین و اوووجونون قالما شرطی ایله موحاکیمه اولوندو.
رستمی، بو ایلین ۱۹ آذرینده بیر مکتوبلا اعترافلاری‌نین اطلاعات مامورلاری طرفیندن ایشگنجه آلتیندا آلیندیغینی و قاتیلمادیغی سویغون حادثه‌‌‌لرینی قبول ائتمه‌یه مجبور اولدوغونو بیلدیردی.
