حبسده اولان بیر غازی‌نین حیات یولداشی زهرا ناظوری بیر ایل حبس جزاسینا محکوم ائدیلدی
اصفهان تئمییز محکمه‌‌سی، ایران-عراق ساواشی غازیسی و اؤنجه‌لر اینقیلاب محکمه‌‌سی‌نین بیرینجی شؤبه‌سی طرفیندن محکوم ائدیلمیش سیاسی محبوس عبدالرسول مرتضوی‌نین حیات یولداشی، اصفهان ساکنی وطنداش زهرا ناظوری‌نین بیر ایللیک حبس جزاسینی تصدیقله‌دی.
هرانا اینسان حوقوقلاری وب سایتینا گؤره، بو حؤکم ۱۳ دی ۱۳۹۹-دا اصفهان تئمییز محکمه‌‌سی‌نین ۲۳ سایلی شؤبه‌سی طرفیندن حاکم حمید رضا امانی‌نین باشقانلیغی ایله چیخاریلدی و زهرا ناظوری‌یه بیلدیریلدی.
بو جزایا گؤره ناظوری، “ایسلام جمهوریییتینه قارشی تبلیغات فعالیتی” اتهامی ایله بیر ایل حبس جزاسینا محکوم ائدیلدی.
ایران-عراق ساواشی غازیسی و اوین حبس‌خاناسیندا سیاسی محبوس اولان عبدالرسول مرتضوی‌نین حیات یولداشی زهرا ناظوری، ایسلام اینقیلابی‌نین لیدری علی خامنه‌ای‌‌نین ایستعفاسینی طلب ائدن ۱۴ مدنی فعالدان بیریدیر و بو مکتوبونو ایمضالادیغی اوچون ۱۱ ایل حبس جزاسینا محکوم ائدیلدی.
ناظوری‌نین پرونده‌سی ایله تانیش اولان بیر منبع، زهرا ناظوری یه قارشی محکمه‌‌نین بوتون مرحله‌‌‌لرینده حیات یولداشی‌نین موحاکیمه اولونماسینا اعتراض اولاراق سانال اورتامدا یاییملادیغی ماتئریاللارا ایستیناد ائدیلدیگینی سؤیله‌دی.
زهرا ناظوری داها اؤنجه “رهبری تحقیر ائتمک” اتهامی ایله اصفهان اینقیلاب محکمه‌‌سی‌نین بیرینجی شؤبه‌سی طرفیندن ایکی ایل و “روح‌الله خمینی‌نی تحقیر ائتمک” اتهامی ایله ایکی ایل حبس جزاسینا محکوم ائدیلمیشدی کی بو جزا دؤرد ایل بویونجا تاخیره آلیندی.
