سککیز بهایی وطنداش حبس جزاسینا محکوم ائدیلدی و مذهبی موشاویره دؤوره‌سینه قاتیلاجاقلار
بندر عباس ایسلام اینقیلاب محکمه‌‌سی‌نین ایکینجی شؤبه‌سی، حاکم بلادرین باشقانلیغی ایله سککیز بهایی وطنداشی “بهایی توپلومونا عضو اولماقلا میلی گوونلیگه قارشی گیزلی آنلاشماق” اتهامی ایله توپلام اون دؤرد ایل حبس جزاسینا محکوم ائتدی.
بو وطنداشلارا وئریلن جزایا گؤره، «مارال راستی»، «آرش راسخی»، «نسیم قنواتیان»، «مهناز جان نثار»، «مهراله افشار» و «امید آفاقی» هر بیری ایکی ایل حبسه، قانونون ۲-جی ماده‌‌سی‌نین قئیدینه اساساً حبس مدتلری آزالدیلاراق «فرهاد امری» و «ادیب حق پژوه» ایسه هر بیری بیر ایل حبس جزاسینا محکوم ائدیلدیلر.
محکمه، آیریجا بوتون وطنداشلارا “علاوه جزا اولاراق” اونلاری سیاسی و اجتماعی پارتییالارا و قروپلارا عضو اولماقدان ایکی ایل مدتینه محروم ائتدی و بهایی ضیافتلری و مجلیسلری تشکیل ائتمه‌لرینی قاداغان ائتدی.
“بندر عباسداکی سجادیه دوشونجه انستیتوسونون اوستادلاری نظارتی آلتیندا مذهبی مسئله‌‌لره دایر بئش موشاویره ایجلاسی‌نین کئچیریلمه‌سی” بو فردلر اوچون وئریلن علاوه جزانین باشقا بیر بؤلومودور.
محکمه‌‌یه گؤره، بو وطنداشلارین ائولرینده آختاریش آپاریلارکن موصادیره اولونان بوتون کیتابلار، بروشورالار، فوتو چرچیوه‌لر، لؤوحه‌‌‌لر و سی‌دی‌لر محو ائدیلمه‌لیدیر.
بو حؤکمده فردی و فیزیکی جزالارا علاوه اولاراق، مهراله افشاردان تاپیلان اوچ یوز مین ریال، ایکی کیچیک آسقی، بیر سیرا بیلرزیکلر، بو وطنداشلارین ائولریندن تاپیلان بهایی دیزاینلی کیچیک بیر قیزیل اوزوک حاکمین امری ایله حؤکومتین منافعیینه موصادیره ائدیلدی.
بو سککیز بهایی وطنداش، ۱۳۹۶-جی ایل فروردین آیینین سونوندا بندرعباس و قشمده ایسلامی جینایت قانونونون ۵۰۰-جو ماده‌‌سینه اساساً “بهایی اینانجینی تبلیغ ائتمک” اتهامی ایله حبس اولوناراق ایکی آی سونرا گیروو موقابیلینده سربست بوراخیلمیشدیلار.
