کرونا آشی‌سی ووردورما تورلارینی قضایی قارشیلیق گؤزله ییر
کولتورل ارث، توریزم و ال صنعتلری ناظری «علی‌اصغر مونسان»، کرونا آشی‌سی تورلاری آدلانان توریزم تورلاری‌نین قانونسوز اولدوغونو و بو تورلارا موطلق محکمه یولو ایله قضایی قارشیلیق وئریله‌جه‌یینی بیلدیردی.
ایرنانین راپورونا گؤره، کرونا آشی‌سی تورلاری‌نین رئکلاملاری‌نین سوسیال مئدیادا یاییملانماسینی نظرده توتان مونسان، «بؤلگه‌ده تصدیقلنمیش آشی یوخدور» دئدی.
او بو تورلارین ساختاکار اولدوغونو و وطنداشلار اوچون چوخ تهلوکه‌‌‌لی اولدوغونو سؤیله‌دی.
سون هفته‌لرده دونیانین بیر سیرا اؤلکلرینده کرونا آشی‌سی‌نین تاپیلماسی و پایلانماسی خبرلریندن سونرا، سوسیال شبکه قوللانیجیلاری و ایران صحیه ناظرلیگی‌نین رسمیلری‌نین تپکی‌لرینه نه‌دن اولان کرونا آشی‌سی ووردورماق اوچون ایستانبول تورو ایله باغلی رئکلاملار یاییملاندی. بو تور دی آیینین سونو اوچون «سیاحت و ساغلاملیق» شوعاری ایله ان آشاغی قیمت اولاراق ۱۲ میلیون تومن ديَرینده بیر مبلغایله پلانلاشدیریلمیشدی.
ایران هاوا سیاحتی و توریزم خیدمتلری اوفیسلری درنگی ایداره هئیتی‌نین باشقانی «حرمت الله رفیعی»، بو باغلامدا سؤیله‌دی: «اؤلکه‌ده هئچ بیر قوروم بونو ائتمه‌ییب. البته کی، بو ساختاکارلیق باره‌ده محکمه اورقانلارینا بیلگی وئردیک.»
سون زامانلاردا تورکیه مقاملاری اؤلکه‌نین طبّ ایشچیلری‌نین آشیلانماسی‌نین دسامبر آیینین سونونا قدر باشلایاجاغینی آچیقلادی.
