آزربایجان دمکرات بیرلیکی نین بیاناتی ؛ 21 آذر1324 میللی حکومتین خاطیره سی
مشروطییت انقلابی نین ان سون نفس لری چه کیلرکن، انگلیس کومپلوسو قاپسامیندا رضا خان ایقتیدارا یاخینلاشدیریلدی و سونوندا بیر سیاسی چئولیش له شاهلیق تاج و تختی نی اله گئچیرمک له سونوجلانمیشدیر و یئنی بیر ایقتیدار، یعنی یئنی بیر استبداد ایران گمی سینین سوکانینا اوتوردولموش و بو اؤلکه یئنی بیر فلاکته سورکلنمیشدیر. رضا خان و تئزلیک له اونا وئریلن یئنی آد، رضا شاه، ایقتیدارا گلدیکده، ایرانی یالنیز یئنی بیر استبدادا دئیل، اونو غیرفارس خالق لارا قارشی ایچ سؤمورگه چیلییه معروض قویموشدور و گون دن گونه خالق لار و او جمله دن تورک خالقی نین وارلیغی دانیلمیش، هئچه سایلمیش و غیرفارس خالق لار چوخ گئنیش بیر آیری سئچگیلییه معروض قویولموشدورلار. گون گئچدیکجه تورک خالقی داها چوخ ازیلمه یه و داها چوخ حقارته اوغرامیش و فلاکت خالقیمیزین باشینا کوچموشدور. ایکینجی دونیا ساواشی عرفه سینده رضا شاه هیتلرین آلمانیاسینا یاخینلاشماسی و فاشیزمین یانیندا دورماسی اوچون اربابی انگلیس طرفیندن دئوریلیر و گونئی آفریقانین بیر آداسینا سورگونه گؤنده ریلیر و اونون بیرینجی اوغلو محمد رضا پهلوی آتاسینین شاهلیغین دئور آلیر و ایچ سیاستینده هئچ بیر دئیشیکلیک اولمادان هم استبداد و همده ایچ سؤمورگه چیلیک سیاسیتی دوام ائتدیریلر. مشروطه اینقلابی نین گئدیشاتی، و او عرفه ده رضا شاهین ایقتیدارا گئچمه سی اؤزلویونده تورک خالقی نین سیاسی گوجونون اوندان آلمیش و اونو بیر اسیر خالق دورومونا سئوق ائتمشیدیر. رضا شاه و اونون اوغلو محمد رضا شاهین ایقتیداری، و غیرفارس خالق لارا قارشی یورودولن ایچ سؤمورگه چی سیاستی تورک خالقینی گوجونو سارسیلتمیش و وارلیغین تهلوکه یه سالمیشدیر.
ایکینچی دونیا ساواشینین سونلاریندا، آزربایجان دا تورک خالقی نین سیاسی اؤنجوللری و آیدین کسیم لر ایران دئولتینین ایچ سؤمورگه چی سیاستینه قارشی بیر جیددی تشبوثه ال ورموش و آزربایجانی آزربایجانلی لار ایداره ائتسین لر دئیه بیر سیاسی پارتیانین قورولوشونا چالیشمیشدیرلار و 1324نجی ایلده آزربایجان دموکرات فیرقه سین سید جعفر پیشه وری باشچیلیغیندا 12 ماده لی بیر طلب له آزربایجانین سیاسی ساحه سینده گون ایشیغینا چیخارتمیشدیرلار و بو واسیطه ایله آزربایجانلی لار آزربایجانی ایداره ائتسینلر دئیه چوخ سرعتله آزربایجان میللی حکومیتین قورولوشونا نائیل اولموشدورلار. آزربایجان میللی حکومتی، بیر ایل حیاتینا دوام ائتمیشدیر. بو حکومت بیرایلده گؤرویو ایشلرله اؤز جیدیتین و مسئولیتین تورک خالقی نین تاریخینین زیروه لرینه قازمیشدیر و آزربایجانین میللی حکومتی، بیر ایل عرفه سینده، سیاسی، اقتصادی، سوسیال و ائتیم ساحه لرینده اینانیلماز نائلییترالده ائتمیشدیر. آمما او شرایط ده کوره سل سیاسی گوجلرین چاتیشمامازلیق لاری اوچون آزربایجانین میللی حکومتی بیر قوربان کیمی باشی کسیلمیشدیر و حاکمیت دن یئندیریلمیشدیر و بو حادیثه ایله تورک خالقینی تاریخی بیر کدرده بوغموشدور. 21 آذر 1324 ایران دا یاشایان تورک خالقی نین حاکمیت طلبی نین سیمگه سی، و بو خالقین حاکمیت برپا ائتمک کاپاسیته سینین اولماسینا بیر آیدین ایشارت دیر.
تورک خالقی، بوگون، آزربایجان میللی حکومتی نین حسرتی ایله ده یاشاسا، آمما خالق حاکمیتین آزربایجان دا برپا ائتمه سی اوچون 21 آذری اؤزونه بیر سیمگه کیمی، بیر باشاری کیمی و بیر وورقو کیمی ده یرلندیرمک ده دیر. آزربایجان میللی حکومت برپا اولوبسا، تورک خالقی نین آزربایجان وارلیغین گؤسترمک ده دیر. بو خالق اوزون بیر زامان گئچسه ده گینه ده تاریخی آرزولارین گرچکلشدیرمک اوچون تاریخین اؤ دؤنه مینین طلبینی برپا ائتمک اوچون تاریخی بیر دؤنوش نوکتاسیندا دیر. تورک خالقی وارسا 21 آذر 1324 خاطیره سی یاشایاجاق و زامان ایچینده بیر داها آزربایجان میللی حاکمیتی نین برپاسینا جاندان باشادان گئچه رکن نم حیات وئره جکدیر.
یاشاسین 21 آذر شانلی خاطیره سی
آزربایجان دمکرات بیرلیکی – بیرلیک
2020.12.06
