ابراهیم ساولان ; او بیر ایلده، من بیلن 23 جیلید کیتاب نشر ائدیلدی
او بیر ایلده، من بیلن 23 جیلید کیتاب نشر ائدیلدی
میرزه علی معجزون سئچیلمیش اثرلری، حئیران خانیمین سئچیلمیش اثرلری، شاه اسماعیل ختایی‌نین شعرلری و شفق مجله‌سی‌نین اؤزل ساییلاری قالیبینده ائلیم آذر، دسته گول، نغمه، لایلا و ظفر نغمه‌لری کیمی معاصیر شاعیرلرین شعر مجموعه‌لری یاییملاندی. اوف اوف جلیل محمدقولوزاده‌‌نین بیوقرافیسی و اوستا زئینال حیکایه‌سی، اوزئییر حاجی‌بیوف‌ون اثرلری خالقیمیزا تقدیم ائدیلدی.
قدیم اشکانی دیلینده یازیلمیش منظوم داستان «بختیارنامه» ایلک افسانه‌لریمیزدندیر. بو داستان 600جو ایللرده شمس‌الدین‌محمد دقائقی‌مروزی الیله فارس دیلینه ترجمه ائدیلمیشدیر. شاعیر فدایی ایلک دفه نشر اولان بو اثری تورکجه‌یه ترجمه ائتدی. محمدبن زکریای‌رازی‌نین «طیب علملر یئنی کشفیات شرحی» دکتر تقی موسوی طرفیندن دیلیمیزه ترجمه اولوب چاپ اولدو او بیر ایلده.
دده‌قورقود کیتابی حاقدا بؤیوک طنطنه‌لی ییغینجاقلار کئچیریلدی. میرزه‌حسن روشدیه‌نین 220 ایللیگینه حصر اولموش کنگره قورولوب آیدینلار طرفیندن علمی مقاله‌لر اوخوندو. بو کنگره‌ده دؤرد میندن آرتیق ادبیات و دیل هوسکاری توپلانمیشدی. هله ماکسیم گورکی‌نین وفاتی‌نین اون ایللیگینه حصر ائدیلمیش کنگره ده قورولدو. روس یازارلاری گریلوف‌ون بیوقرافیسی و تمثیللری، ماکسیم گورکی‌نین رساله‌لری، چوخوف و گریبایدوف‌ون اثرلری ترجمه ائدیلرک آذربایجان اوخوجولارینا تقدیم ائدیلدی. اوکراین یازاری شیوچنقو، آشیق صعنتی‌نین بؤیوک خادیمی و مسیحی شاعیر سایات نووا، دونیا رساملیق صنعتی‌نین اؤلمز یارادیجیسی صعنتکار پره‌پین حاقدا مقاله‌لر اوخوندو او بیر ایلده.
آذربایجان تاریخی حاقدا میللی کنگره‌لر کئچیریلدی. 19 دفه کئچیریلن بو کنگره‌لرده 8 میندن آرتیق ضیالی اشتراک ائتمیشدی. آذربایجان تاریخی جغرافیاسی حاققیندا، ماد حکومتی‌نین قورولوشو و اونلارین بؤیوک موباریزه و پارلایان مدنیتلری باره‌سینده، بابک عیصیانی، آذربایجان حؤکمرانلاری و اؤلکه‌نین مدنی تاریخی خصوصوندا کنفرانسلار وئریلدی. فریدون ابراهیمی، آذربایجان قدیم تاریخی و میرزه ابراهیموف، آذربایجان دیلی حاقدا علمی مقاله‌لر یازیب دانیشیق آپارمیشدیلار. بو کنگره‌لرین هامیسیندا شریفلی جنابلاری آذربایجان تاریخی منبعلری حاقدا دانیشیق آپاریب دینله‌یجی‌لرین میللی شعورونون یوکسلمه‌سینه سبب اولموشدو.
جهانگیر جهانگیروف تربیه‌سی آلتیندا، میثلی تاپیلمایان گنج ملی ارکستر دسته‌سی تشکیل ائدیلدی. معلملر صینفی، یازیچیلار جمعیتی، اوشاقلار باخچاسی، رساملار موزه‌سی، بهزاد موزه‌سی، شاعیرلر درنگی و .. یاراندی. آرشین مال‌آلان، سلوا، تاجیکستان و کندلیلره تای 180 فیلیم تاماشایا قویولدو او بیر ایلده.
یازرین فیسبوک صحیفه سیندن
