اردبیلده سون اعتراض آکسییالاریندا توتولانلاردان بیری‌نین حیات یولداشی اولان افسانه اکبرزاده توتوقلاندی
تهراندا و تورکلرین یاشادیغی بعضی شهرلرده آذربایجان جمهورییتینه دستک میتینقلریندن سونرا تورک وطنداشلارین توتوقلانماسی داوام ائدیر. حبسلرین سون توروندا علی خیرجونون حیات یولداشی افسانه اکبرزاده، اردبیلین ۱۰ سایلی سوروشدورما شؤبه‌سینه گئتدیکدن سونرا توتوقلاندی.
دونن ۱۲ مهر شنبه گونو، افسانه اکبرزاده، اردبیلده سون اعتراضلار زامانی توتولانلارین بیر قروپ آناسی ایله بیرلیکده حیات یولداشلاری و اوشاقلاری‌نین وضعيتینی ایزله‌مک اوچون اردبیلین ۱۰ سایلی سوروشدورما شؤبه‌سینه گئتدیلر. لاکین شؤبه‌نین باشقانی حاکم نونهالین سرت داورانیشی ایله قارشیلاشدیلار.
افسانه اکبرزاده علی خیرجونون و دیگر فعاللارین حبس اولونماسینا اعتراض ائتدیگی و تهلوکه‌‌‌سیزلیک قوووه‌لری‌نین داورانیشی و حاکم باباک نونهالین تحقیرینه اعتراض ائتدیگی اوچون بیرباشا نونهالین امری ایله حبس اولوندو.
علی خیرجو اردبیللی بیر مدنی فعالدیر. تهلوکه‌‌‌سیزلیک قوه‌لری ۱۰ مهر ۱۳۹۹-جی ایل گونورتادان سونرا اللرینده بیر حؤکم اولمادان علی خیرجونون ائوینه باسقین ائتدیلر و بو آذربایجانلی مدنی فعالی و عائله‌‌‌سینی دؤیه‌رک توتوقلادیلار.
قاراباغین آزاد ائدیلمه‌سینه دستک و ایران ایسلام جمهوریییتی‌نین و روسیه‌نین ارمنیستانا دسته‌یینه اعتراض میتینقینده توتوقلانان شخصلردن بیری اولان مرضیه جوانشیرده اردبیل حبس‌خاناسیان کؤچورولدو.
خانیم جوانشیرین بیر قوهومو، اونون اردبیل حبس‌خاناسینا کؤچورولمه خبرینی آچیقلادی و تهلوکه‌‌‌سیزلیک قوه‌لری‌نین عائله‌‌‌نین محبوسلا علاقه ساخلاماسینا و زیارتینه ایجازه وئرمه‌دیگینی سؤیله‌دی.
ایران‌وایرین آلدیغی خبرلره گؤره، سون بیر هفته عرضینده ۱۰۰-دن چوخ ایران وطنداشی تهران، اردبیل، زنجان، اورمیه، مشکین‌شهر و ایرانین بعضی دیگر شهرلرینده تهلوکه‌‌‌سیزلیک قوه‌لری طرفیندن توتوقلانیبلار.
دونن سحردن بری اورمیه، تبریز، اردبیل، زنجان و مشکین‌شهر شهرلری‌نین اطلاعات و تهلوکه‌‌‌سیزلیک پولیسی تلفون چاغیریشی ائده‌رک بو شهرلرده اونلارلا مدنی فعالی توتوقلاما ایله تهدید ائدیبلر.
