سیاسی محبوسلارین کؤچورولمه‌سی اوچون بؤیوک تهران حبس‌خاناسینا اؤزل قوه‌لر گتیریلدی
۹ مهر ۱۳۹۹ چارشنبه آخشامی، چوخو ۱۳۹۸-جی ایل آبان اعتراضلاری زامانی توتولان بؤیوک تهران حبس‌خاناسی‌نین سیاسی محبوسلاری کوتلوی شکیلده بو حبس‌خاناداکی باشقا بیر حوجره‌‌یه کؤچورولدو. بو یئردییشمه‌نین تضییقی آرتیرماق و اونلارا قارشی دورومو داها چتین‌لشدیرمک آنلامیندا اولدوغو دئییلیر.
وکیل اولان مصطفی نیلی، توییتر حسابیندا بو خبری اعلان ائدرکن بئله یازدی: “حبس‌خانا مسووللاری بو گون ایچری گیره‌رک سیاسی محبوسلاردان اشیالارینی توپلامالارینی و کؤچورولمه‌یه حاضر اولمالارین، هامیسی‌نین باشقا بیر حوجره‌‌یه کؤچورولمه‌سینی ایسته‌دیکلری و یا باشقا حوجره‌لرده‌کی عادی محبوسلار آراسیندا بؤلوشدورولمه‌سینه قرار وئردیکلری آیدین دئییل.”
او، حبس‌خانا مسووللاری‌نین محکوملارین حبس‌خانا ماغازاسیندان آلدیغی آیاق‌قابیلار دا داخیل اولماقلا اشیالارینی گؤتورمه‌لرینه ایجازه وئرمه‌دیکلرینی ده قئید ائتدی.
نیلی، کئچن ایلکی آبان آیی اعتراضچیلاری محکوملاری‌نین کؤچورولدویو بؤیوک تهران حبس‌خاناسی‌نین ۲-جی تیپی‌نین ۴ نؤمره‌لی سالونونون چوخ داها کیچیک و بؤجکلر دولو اولدوغونو یازدی.
بوندان علاوه، بو محبوسلارین بو تله‌سیک و ساغلیقسیز کؤچورمه اوصولو سایه‌سینده کرونایا یولوخمالاری احتیمالیندان قایغیلارینی دیله گتیردی.
هرانایا گؤره، بیر چوخو ایشچی صینیفلریندن اولان بو سیاسی محبوسلار، حبس‌خانایا گیردیکدن سونرا اؤزلری اؤز پوللاری ایله سویودوجو و تلویزیون کیمی اشیالار آلیبلار کی بو کؤچورمه ایله بونلارین آپاریلماسینا ایجازه وئریلمه‌ییب.
آچیقلامادا، محکوملارین دا بو حرکته قارشی دیرندیکلری گؤستردیکلری و اؤزل قوه‌لرین ده حوجره‌‌ده اولدوغو و محکوملاری کؤچمه‌یه مجبور ائتدیکلری بیلدیریلیر.
