چئوره فعاللاری ساوالان داغی‌نین یاماجلاریندا یوللارین سالینماسینا اعتراضلارینی داوام ائتدیریرلر
سون هفته‌لرده چئوره فعاللاری‌نین ساوالان داغی‌نین (سبلان) یاماجلاریندا «قیزیل کمربند» آدلاندیریلان یول سالمایا قارشی اعتراضلاری آرتدی.
قیزیل کمربند پروژه‌سی مشکین‌شهردن سردابه و بو شهردن سرعینه گئدن یول تیکینتیسی پروژه‌سیدیر.
اردبیل والیسی اکبر بهنامجو، قیزیل کمربند پروژه‌سینی باشا چاتدیرماق اوچون 30 میلیارد تومن اعتبار آیریلدیغینی آچیقلادی و دئدی: «بو پروژه‌نین حیاتا کئچیریلمه‌سی ایله مشکین‌شهر، سرعین و اردبیلین ایستی و مینئرال سولاری بیر-بیرینه باغلاناجاق.»
بهنامجو بو پروژه‌نین تاماملانماسی‌نین نتیجه‌لرینی اقتصادی گلیشمه و اردبیل ایالتی‌نین توریزم مرکزلرینه یاخینلاشماسی کیمی گؤسترمه‌یه چالیشدی.
بونونلا بیرلیکده، اردبیل ایالتی‌نین چئوره فعاللاری، قیزیل کمربند پروژه‌سینی چئوره‌یه ضرر وئره‌جه‌یینی و بؤلگه‌نین بیوموخته‌لیفلیگینی تهلوکه آلتینا آلاجاغینی دئییرلر.
گنج پاکبانان درنگی ساوالانین اتکلرینده یوللارین تیکینتیسینی دایاندیرماق اوچون «نجات ساوالان» آدلی بیر کامپانییایا باشلادیبلار. بو، اردبیل ایالتینده چئوره‌نین قورونماسی ساحه‌‌‌سینده قئیری-حؤکومت (مردم نهاد)، تشکیلاتیدیر.
گنج پاکبانان درنگی طرفیندن درج اولونان بلگه‌سلده درنک عضوو و چئوره مودافیه‌چیسی آیدین آذردخت پروژه‌نین بیرباشا والی‌نین امری ایله باشلادیلدیغینی وورغولایاراق دئییر: «آشاغیدا کؤچری یوللار اولدوغو حالدا ساوالانین اتکینده یول تیکیلیر. اونلارین ساوالاندا یول تیکمک ایذنلری بئله یوخدور. اونلارین یئگانه ایذنی کؤچری یولو یاخشیلاشدیرماقدیر.»
آذردخت دئییر «بعضیلری تهلوکه آلتیندا اولان حئیوانلارین یاشاییش یئرلرینی ایسکی پیستی قورماق بهانه‌سی ایله محو ائدیرلر»، او علاوه ائدیر «بورا یئرلی اهالی‌نین و کؤچریلرین فولکلوروندا خوصوصی بیر یئری اولان قدیم بیر بؤلگه‌دیر.»
گنج پاکبانان درنگی‌نین مسوولو سعید بلندی دئییر: «لازیمی یاپیلاردان محروم اولان اوغورسوز بیر آلوارز ایسکی یاماجی وارکن، نییه 500 متر مسافه‌‌ده یئنی بیر ایسکی پیستی اینشا ائتمکده ایصرار ائدیرلر.»
ساوالانین اتکلرینده یوللارین سالینماسینا اعتراض یالنیز چئوره فعاللاری طرفیندن دئییل. اردبیل ایالتینده‌کی مجازی مکان قوللانیجیلاری، ژورنالیستلر، صنعتچیلر و سیاسی فعاللاردا بو اعتراضلارا دستک وئرنلر آراسیندادیلار.
تبریزلی بیر کاریکاتورچی «رحیم بقال اصغری»، اینشا ائدیلن یولو ساوالان داغی‌نین اطرافیندا یاتان و سانجمایا حاضر اولان بیر ایلان کیمی کاریکاتورا چکرک بو پروژه‌یه اعتراض ائتدی.
مشکین‌شهرده یاشایان یازیچی و ژورنالیست ابراهیم رشیدی اینستاگرام صفحه‌‌‌سینده ساوالانین یاماجلاریندا یول تیکینتیسینی تنقید ائدن بیر یازی یاییملادی: «ساوالان کمربندی‌نین اینشاسی اوچون نظرده توتولان یول ایگیرمییه یاخین چایین منبعییدیر. ساوالان کمربندینی اینشا ائدنلرین بو آخینلارین هر بیری اوچون بیر کئچید تیکمه‌سی مومکون دئییل و او آخینلار یولون گوجلو بندی‌نین آرخاسیندا اؤله‌جک و داغین آشاغیسینا چاتمایاجاق. اورمیه گؤلونده باش وئرنلر کیمی بو تورپاغین دا آسیلی اولدوغو چایلارین اؤلومونو گؤره‌جییک.»
«دوغرودان آذربایجاندا یاندیریلمیش تورپاق پروژه‌سینی حیاتا کئچیرمک ایسته‌ین و صحرانی بیزه تسلیم ائتمک نيتینده اولانلارمی وار؟» دئیه سوروشاراق علاوه ائتدی: «مشکینه آخان سولارین بؤیوک بیر حیصه‌‌‌سی ساوالانین دوغو طرفیندن (سرعین-سردابه یولو) آخان و یوخاریداکی چایلارین بیر حیصه‌‌‌سی ایله بیرلشه‌رک نهایت ساوالانین دوغو و قوزئی حلقه‌لری (اردبیل و مشکین) کیمی بیزی احاطه ائدن آخان قاراسویا تؤکولور و ایلده 200 میلیون متر مکعب سو وئریر. حتی اردبیل اراضیسینده یول چکیلسه ده، بو چای جدی تهلوکه ایله اوزلشه‌جک.»
اردبیلده‌کی مدنی و چئوره فعاللاری دا اردبیلده دیوار یازمالارلا قیزیل کمربند پروژه‌سینی دایاندیرماغا چاغیردیلار. شهر دیوارلارینا «ساوالانین محوینه یاتیریم قویماغی دایاندیرین»، «داغلار، دنیز، مئشه، چئوره اوچون ال-اله وئرین»، “ساوالانی قورویون، گله‌جیی اوشاقلار اوچون قورویون»، «داغی ترک ائدین» دئیه یازدیلار. و …
بوندان علاوه، بیر ایران‌وایر وطنداش ژورنالیستی، مشکین‌شهرین اهالیسی و چئوره فعاللاری‌نین قیزیل کمربند پروژه‌سینه اولان اعتراض میتینقی‌نین ویدئوسونو ایران‌وایره گؤندره‌رک دئییر: «نه اوچون اردبیل ایالتی‌نین مسووللاری چئوره فعاللاری‌نین اعتراضلارینی ائشیتمک عوضینه پولیسی بیزه گؤندریرلر؟ جناب عاملی (اردبیل جوما ایمامی) نییه خالقا دستک اولماق عوضینه بو یولو سالیب ساوالانا خسارت ووراراق ویلا تیکمک ایسته‌ین بیر اوووج سرمایه‌دارین آرخاسیندا دورور؟ جناب بهنامجو (اردبیل والیسی)، چئوره‌یه ضرر وئرمک اوچون بیت‌المال‌دان خرج‌له‌مک عوضینه بو پولو ایالتین یوللاری‌نین تعمیرینه خرجله‌سه‌نیز داها یاخشی اولمازدی. نه واختا قدر پارس آباد-اردبیل یولوندا اؤلوملره شاهید اولاجاییق، آما حؤکومت خالقین سسینی ائشیتمک عوضینه عناد ائدیر؟»
