تورک مدنی فعال علیرضا فرشی‌یه قارشی تضییقلر آرتمیشدیر
علیرضا فرشی‌نین اوین حبس‌خاناسیندان فشافویه‌یه کؤچورولمه‌سی، تورک (آذربایجانلی) مدنی فعالین عائله‌‌‌سی طرفیندن تنقیدلرله قارشیلاندی.
کئچن هفته ۱۸شهریور ۱۳۹۹-جو ایلده علیرضا فرشی عائله‌‌‌سی ایله تماسدا اولاراق اوین حبس‌خاناسیندان فشافویه حبس‌خاناسینا کؤچورولدویونو بیلدیردی.
ایران‌وایرین معلوماتینا گؤره، دونن جناب فرشی‌نین عائله‌‌‌سینه بو محبوسون کؤچورولمه‌سی‌نین تهران اطلاعات ایداره‌سی‌نین قراری اساسیندا حیاتا کئچیریلدیگی بیلدیریلدی.
آنجاق بیر محکومون بیر حبس‌خانادان دیگرینه کؤچورولمه‌سی اوچون حؤکمو وئرن محکمه‌‌دن ایجازه آلینمالیدی.
جناب فرشی عائله‌‌‌سی ایله علاقه ساخلایاراق فشافویه حبس‌خاناسی‌نین ۵-جی تیپینین رئیسی‌نین حبس‌خانا مودورونه اعتراض مکتوبو گؤندرمه‌سی‌نین قارشیسینی آلدیغینی و مکتوبونون گئری قایتاریلدیغینی بیلدیردی.
علیرضا فرشی‌یه، حبس اولونما قایداسی، پرونده‌سینه باخیلما پروسه‌سی و اوین حبس‌خاناسی‌نین اویغون اولمایان وضعيتی ایله باغلی حبس‌خانادان آچیق مکتوبلاری‌نین درج ائدیلمه‌سی سببیندن تضییقلر آرتیبدیر.
بیر نئچه گون اؤنجه فرشی، محکمه اورقانی‌نین باشقانینا عائله‌‌‌سی طرفیندن نشر اولونان آچیق بیر مکتوب یازاراق تهلوکه‌‌‌سیزلیک قوه‌لری‌نین داورانیشلارینی ایضاح ائده‌رک بو ایشلرین نتیجه‌لرینه گؤره خبردارلیق ائتدی و گوناهکارلارا تبکی گؤستریلمه‌سینی ایسته‌میشدی
مکتوبون بیر حیصه‌‌‌سینده سوروشور کی، «اطلاعات ناظرلیگی‌نین سورغو ائدنلرینه کیم نظارت ائدیر؟» سورغویا چکیلدیگی آدامین سؤزلری ایله یازدی: «من اؤزوم شکایتچی، موستنطیق، حاکم، ساوجی و حبس‌خانا کئشیکچیسییم. منه تابع اولماقدان باشقا چاره‌نیز یوخدور؛ و حؤکمونوزده بیر آزالما ایسته‌سه‌نیز ده منیم یانیما گلمه‌لیسینیز.»
علیرضا فرشی آنا دیلینده تحصیل طلب ائدن فعاللاردان بیریدیر. شریف بیلیم‌یوردوندا کامپیوتر موهندیسلیگی اوزره یوکسک‌لیسانس درجه‌‌‌سی آلیب، سراج بیلیم‌یوردونون قووولموش استادی‌دیر و جولفا بین الخلق بیلیم‌یوردونون کئچمیش اؤیرتیم عضوودور و ایران – عراق ساواشیندا آتاسی شهید اولموشدور.
جناب فرشی، آذربایجانین محروم کندلرینده آذربایجان تورکجه‌سینده کیتاب‌خانالارین یارادیلماسی و آنا دیلینده تدریس اوچون دستک کامپانییالاری‌نین قورولماسی دا داخیل اولماقلا، بو مدنی فعالیتلرینه گؤره بیر نئچه دفعه توتوقلانمیشدیر.
علیرضا فرشی بو ایلین ۲۱ تیرینده تهراندا ائوه دؤنرکن توتوقلاناراق اوین حبس‌خاناسینا کؤچورولدو.
کئچن ایل علیرضا فرشی، اکبر آزاد، حمید منافی و بهنام شیخی ایله بیرلیکده تهران تمییز محکمه‌‌سی‌نین ۵۴ سایلی شؤبه‌سی طرفیندن دونیا آنا دیلی گونو مراسیمینده ایشتیراک ائتمک اتهامی ایله ایکی ایل حبس و ایکی ایل سورگون جزاسینا محکوم ائدیلمیشدیلر.
