مجلیس خاریجی مئساژلاشما اویغولامالارینی بلوکلاماغا چالیشیر
2020ایران وایر
ایسلامی مشورت مجلیسی‌نین بیر قروپ عضوو، بوتون خاریجی مئساژلاشما اویغولامالاریینین یئرلی شرکت واسطه‌‌‌سیله واحید پنجره سیستمینده قئیدیاتدان کئچمه‌لری‌نین طلب اولوندوغو بیر پلان تکلیف ائتدی. بو پلانین حیاتا کئچیریلمه‌سی ایله ایرانداکی بوتون خاریجی مئساژلاشما اویغولامالاری بلوکلاناجاق.
ایران‌وایرین معلوماتینا گؤره، ایللردیر ایراندا سوسیال شبکلر و خاریجی مئساژلاشما اویغولامالاری فیلتئرله‌نیر. ایراندا فیلتئرلنن ایلک سوسیال شبکلردن بیری فیس بوکدو. توییتر و تلگرام ایسلام جومهورییتی وطنداشلاری اوچون انگلله‌دیگی دیگر مشهور سوسیال شبکلر ایدی.
سون آیلاردا، ایرانلیلار آراسیندا ان پوپلر سوسیال شبکه اولان اینستاگرامین فیلتئرلنمه مسئله‌‌سی دفعه‌‌لرله گونده‌مه گلیب. بوتون بو محدودیتلردن سونرا یالنیز واتساپ فیلتئر اولمامیشدیر. آنجاق گؤرونور کی، ایسلام جومهوریییتی حاکیميتی بو اویغولامالارین هاممیسینی باغلاماغا چالیشیر.
آنجاق سون ایللرده گئنیش فیلتئردن سونرا، خوصوصاً ده تلگرامین فیلتئریندن سونرا فیلتئر قیرانلارین ایستیفاده‌سی چوخلو میقداردا آرتمیشدیر.
دونن مجازی اورتام عالی شوراسی‌نین عضوو رسول جلیلی ایران مئدیالارینا آچیقلاماسیندا رهبرین بو شورادان مجازی اورتامدا ایسلام جومهورییتی‌نین حاکیميتی اوچون داها چوخ چالیشمالارینی ایسته‌دیگینی سؤیله‌دی.
خامنه‌ای دئییب: «بیز مجازی اورتامین اهميتینی و بونون اینسانلارین حیاتی‌نین بیر حیصه‌‌‌سینه چئوریلدیگینی قبول ائدیریک، لاکین مجازی اورتام ایله باغلی آرقومئنتیمیز بودور کی، بو اورتام کناردان ایداره اولونور و چاره‌سیز اینسانلاری تک باشینا قویا بیلمریک.»
او علاوه ائدیب کی: «بو، میلی معلومات شبکسینه دفعه‌‌لرله وورغو ائدیلمه‌سینه و عالی شورانین و میلی مجازی اورتام مرکزی‌نین یارانماسینا و اوچ قووه باشقانلاری‌نین ایشتیراکینا سبب اولوب، لاکین تأسف کی، بو مسئله‌‌یه لازیمی دقت یئتیریلمیر. میلی معلومات شبکسی‌نین بیلشنلری اؤز پروقراملاریندان گئری قالمامالیدیر.»
سوسیال مئدیالارین و خاریجی مئساژلاشما اویغولامالارینین فیلتئرلنمه‌سی ایله باغلی کئچمیش تجروبه‌لر فیلتئر قیرانلارین ایستیفاده‌سی‌نین گؤرونمه‌میش قدر آرتماسی سببیندن بو گونه قدر اوغورسوز اولدو. نتیجه‌ده ایسلام جومهوریییتی حاکیميتی ایرانین مجازی اورتامینا تام نظارت ائتمک ایسته‌ییر. بونونلا بیرلیکده، بین الخلق اینترنتین تامامیله کسیلمه‌سی، 1398-جو ایلین آبان آییندا، خالق اعتراضلاری ایله عینی واختدا باش وئردی و بیر هفته‌دن چوخ، ایلک دفعه ایران وطنداشلارینا عوموم‌دونیا اینترنت شبکسینه داخیل اولماسی قاداغان ائدیلدی.
بو تجروبه ایسلام جومهوریییتی‌نین مقاملارینا گؤستردی کی، لازیم اولدوقدا اینترنتدن ایستیفاده‌نی دایاندیرا بیلر. نتیجه‌ده سون آیلاردا سیستمین یاخشیلاشدیریلماسی اوچون بیر چوخ سیناق کئچیریلمیشدیر.
ایندی ایسه مجلیس ده بو ساحه‌‌‌یه گیردی. ایسلام جومهوریییتی ملت وکیللری‌نین پلانینا «اورقانیزه کومیته‌سی» آدی وئریلن مرکزی بیر قورومون یارادیلماسی دا داخیلدیر. بو کومیته هیاتینه میلی مجازی اورتام مرکزی‌نین رئیسی، ایلتیشیم و تکنولوژی ناظرلیگی، کولتور، اطلاعات، باش ساوجیلیق، مجلیسین کولتور کمیسیونو، رادیو و تلویزیون قورومو، اینقیلاب کئشیکچیلری اطلاعات تشکیلاتی، ایسلام تبلیغات تشکیلاتی، پولیس تشکیلاتی و پاسسیو مودافیه تشکیلاتی‌نین تمثیلجیلری داخیلدیر.
پلان، حؤکومتین وطنداشلارین معلومات الده ائتمک آزادلیغینی آزالتماق اوچون یئنی بیر گیریشیمدی و گئنیش ديیشیکلیکلر گتیره‌جکدیر. بو لاییحه نتیجه‌سینده بوتون ایستیفاده‌چیلرین کیملیگی بللی ائدیله‌جک و داخیلی مئساژلاشما قورما، باشلاما و ایداره‌ائتمه خرجلری، مئساژلاشمالارا دستک وئرمک اوچون دؤولت فوندو یاراتماقلا تامین ائدیله‌جک، بودجه‌سی اینسانلارا باند گئنیشلیگی ساتماقلا ماليه‌لشدیریله‌جکدیر.
اصلینده، تشکیلات کومیته‌سی، ایسلام جومهورییتی‌نین سون اون ایلده حیاتا کئچیردیگی ان واجیب وظیفه‌‌‌لردن بیرینی یئرینه یئتیره‌جک و محدود مئدیا ساحه‌‌‌سینده اولمایاجاقدیر. سوسیال مئدیانین تشکیلی اوچون قالان 6 پلان اساسیندا بوتون اینترنت ایستیفاده‌چیلری‌نین کیملیکلری‌نین بلیرلنمه‌سی اوچون تعلیماتلار بو شورا طرفیندن ایسلام جومهوریییتی‌نین اساس طلبلریندن بیری اولان قایدالار شکلینده ترتیب ائدیلیر. او، معلوماتلارین گیزلیلیگینه‌ده اطلاعات ناظرلیگی و سلاحلی قوه‌لرین باش قرارگاهی‌نین نظرینه تابع اولدوغونو سؤیله‌ییب.
بو پلانین باشقا بیر حیصه‌‌‌سینده «وی‌آی‌پی» و فیلتئرقیران ساتماق، چوخالتماق، یایماق، تیجارت و یاییملاماق و یا تقدیم ائدنلره حبس و یا آلتینجی درجه جریمه جزاسی وئریله‌جکدیر.
دونیانین بیر چوخ اؤلکه‌سینده خاریجی خیدمت شرکتلری‌نین اؤلکه‌ده بیر تمسیلجیلیگی اولمالی اولدوغو بیر قانون اولسا دا، آنجاق ایراندا مؤوجود اولان پروبلئملرله، اینترنتله علاقه‌‌‌لی‌دیر و وطنداشلارا محدودیتلر قویسا دا بو پلان یالنیز ایران وطنداشلاری‌نین فیکیرلرینی سربست ایفاده ائتمه‌لری‌نین یگانه یئری اولان مئساژلاشما اویغولامالارینین بلوکلانماسینا سبب اولاجاق.
بو پلان ایسلام مشورت مجلیسی طرفیندن تأخیره‌سالینماز بیر مسئله اولاراق قبول ائدیلدیگی اوچون (تعجیلی اولاراق) بو یاخینلاردا آچیق اوتورومدا تقدیم ائتمک ایمکانی اولمایاجاقدیر. بونونلا بیرلیکده، 11-جی مجلیسین موحافیظه‌کار و تک‌سس عضولری‌نین پلانین یارارینا سس وئره‌جیی و یا ایران وطنداشلارینا قارشی مجازی مکاندا محدودلاشدیرماغین باشقا یوللارینی تاپیب-تاپمایاجاغی هله ده گؤرولمکده‌دیر.
