ایرانداکی کرونا؛ صحیه ناظری: کرونا ۹۰-جی دقیقه‌ده بیزه گل وورا بیلر
2020پویان خوشحال
«کرونا ۹۰-جی دقیقه‌ده بیزه میدانین کونجلریندن گل وورا بیلر. بیزه گل ووران شئی خسته‌لیگه اهمال و نورماللیقلا یاناشمامیزیدی.»
بونلار صحیه ناظری «سعید نمکی»نین 4 شهریور ۱۳۹۹-جی ایل تاریخلی سؤیله‌دیکلریدیر. ژورنالیستلرین یانیندا او یالوارارق اینسانلاری یاخین گونلرده سیاحته چیخماماغا چاغیریر: «اینسانلاردان خواهش ائدیرم کی، نورمال اولدوغونو سانماسینلار. اؤولادلاری‌نین بیلیم‌یوردونا گیریش ایمتاهانلاری باشا چاتدیقدا، یئنیدن توپلانیب و بو یوللا او یولا گئتمه‌مه‌لیدیرلر. مازانداران ایالتینده هله ده ان چوخ پروبلئمیمیز وار. مازانداران ایالتینده خسته‌لیگین یوکسه‌لیشی‌نین شاهیدیگیک. سیاحت سببییله مازانداران ایالتینده ان چوخ یولوخما ایمکانیمیز وار. سیاحت بیر رول اویناماسایدی چینلی ووهان ویروسو نئجه یاییلدی؟ یالواریرام کی، حقیقتاً سفر ائتمه‌یین.»
هر ایل اولدوغو کیمی، بیر چوخ ایرانلی تاسوعا و عاشورا تعطیللرینده گزیر و توریزم شهرلرینه گئدیر؛ هر زامانکیندن داها چوخ ناراحات ائدن شئی، بو تعطیلین یایین سون آیینا تصادوف ائتمه‌سی و طبیعی کی، عائله‌لرین داها اؤنجه گئتمه‌مه‌سینه سبب اولان بیلیم‌یوردونا گیریش ایمتاهانی‌نین کئچیریلدیگیدیر.
مازانداران طبّ علملری بیلیم‌یوردونون رئیسی «سید عباس موسوی»ده یولجولارا سرت شکیلده موراجعت ائده‌رک دئدی: «ایالتده یولجولارا هئچ بیر خیدمت گؤستریلمه‌دیگینی نظره آلساق، یاخشی سیاحت اینسانلاری گؤزلمیر. اینسانلار یاشادیقلاری عینی شهرلرده محرم و یاس مراسیملری کئچیرمه‌لی و مازاندارانا گئتمه‌مه‌لیدیرلر.»
تحصیل ناظری «محسن حاجی‌میرزایی» دئدی: «15 شهریور تدریس ایلینین باشلانغیجیدیر، آنجاق او گونلرین شرطلرینه اویغون اولاراق اؤیرنجیلرین باشلاما کئیفيتی او زامانین دورومونا گؤره دئییله‌جک.»
قئید ائتمک لازیمدیر کی، درسلر تام قیرمیزی وضعيتده اولان یئرلرده اوزاقدان، آغ وضعيتده مسافه‌‌لر آرالیغیندا اوزوزه و ساری وضعيتده، اوز اوزه و اوزاقدان تحصیلین بیرلشمه‌سی ایله کئچیریله‌جک.
ائله همین گون صحیه ناظری‌نین معاونی «علی‌اکبر حق‌دوست» بیلیم‌یوردلاری‌نین باغلانماسی ایله باغلی بوتون مجازی اورتامدا یاییلان شایعه‌لری تکذیب ائتدی و بیلیم‌یوردلاری‌نین یئنیدن آچیلماسی‌نین 15 شهریورده باش توتاجاغینی رسمی شکیلده بیلدیردی. میلی کرونا قرارگاهی‌نین اپیدمیولوژی کومیته‌سینین رئیسی صحیه ناظری ایله بیر ویدئو کونفرانسیندا. دئدی «بعضی شهرلرده بو مجازی اولاجاق و بعضی شهرلرده مجازی و اوز-اوزه بیرلشیمی اولاجاق. یئنی قبولون اساس حیصه‌‌‌سی گیریش ایمتاهانیندان بهمن آیینا کئچه‌جک. طلبه‌‌‌لری مزونیتینی تئز بیتیرمه‌یه و فاکولته‌لرین داهادا بوشالماسینا کؤمک ائتمه‌یه چالیشیریق.»
سون ایستاتیستیکایا گؤره، صحیه ناظرلیگی‌نین سؤزچوسو، کرونا ویروسو ایله علاقه دار گونده‌لیک ایستاتیستیکانی اعلان ائدرکن 4 شهریور 1399-جی ایل چارشنبه آخشامینا قدر 24 ساعت عرضینده بو اؤلومجول ویروس سببیندن اؤلنلرین سایی‌نین 125 اولدوغونو بیلدیردی. بو سایی علاوه ائتمکله اؤلنلرین توپلام سایی 20 مین 901 نفره چاتدی.
او، ویروس تشخیصی قویولانلارین سایی‌نین 2 مین 213 اولدوغونو، تخمیناً یاریسی‌نین خسته‌خانالارا یئر‌لشدیریلدیگینی سؤیله‌دی. اؤلکه داخیلینده خسته‌خانالارا موراجعت ائدنلرین عومومی ساییندان 3 مین 839 نفرین خسته‌لیگی کریتیک وضعيتینده‌دیر.
صحیه ناظری‌نین سؤزچوسونون آچیقلادیغی معلوماتا گؤره، تهران، مازانداران، گیلان، قوم، اصفهان، رضوی خوراسان، دوغو آذربایجان، کرمان، قوزئی خوراسان، سیمنان، یزد، زنگان و قزوین ایالتلری قیرمیزی وضعيتده‌دیر. خاتیرلاداق کی، قزوین و زنگان ایالتلری سون بیر نئچه گونده خبردارلیق وضعيتینده ایدیلر. باتی آذربایجان، البورز، فارس، لورستان، هرمزگان، اردبیل، بوشهر، کرمانشاه، کهگیلویه‌وبویراحمد، گونئی خوراسان، مرکزی، ایلام، چهارمحال‌وبختیاری، گولیستان و خوزیستان ایالتلری ده خبردارلیق وضعيتده‌دیرلر: “حال حاضردا 117 شهر قیرمیزی وضعيتده و 110 شهر ده خبردارلیق وضعيتده‌دیر و اؤلکه‌ده خسته‌لیک و خسته‌خانایا یئر‌لشدیرمه ساییلاری نیسبتاً آزالماقدادیر.»
ایالتلرین رنگینین بلیرلنمه‌سی ائله ائدیلیر کی خوزیستان ایالتینده‌کی کرونا ایداره‌ائتمه قرارگاهی‌نین سؤزچوسو رضا نجاتی‌نین سؤزلرینه گؤره، صحیه ناظرلیگی بونو اینسانلارا ایضاح ائتمه‌لیدیر، اینسانلار آغ رنگین خسته‌لیگین آرادان قالدیریلدیغی‌نین بیر علامتی اولدوغونو دوشونمه‌سینلر. اونون دئدیگینه گؤره وضعيتین قیرمیزی اولدوغونو دئینده اینسانلار خسته‌لیگین اولدوغونو سؤیله‌ییرلر آنجاق وضعيت آغ اعلان ائتدیکده، اینسانلار خسته‌لیگین بیتدیگینی سؤیله‌ییرلر؛ لاکین بو بئله دئییل و رنگلری یالنیز هر 100 مین اهالییه دوشن خسته ساییلاری معين‌لشدیریر. بیر و یا ایکی خسته‌نین آرتماسی و یا آزالماسی شهرلرین رنگینی ديیشدیریر. بئله‌لیکله، یولوخما سایی و رنگینین مسئله‌‌سی اینسانلاری کرونا ریسکی‌نین آرادان قالدیریلدیغینی دوشونمه‌یه یؤنلندیریر، اما هله ده کرونا ریسکی وار.»
دیگر طرفدن، صحیه ناظری‌نین سؤزچوسو سیما سادات‌لاری، خسته‌لرین و ایتکیلرین میلی ایستاتیستیکاسینی آچیقلارکن ساییلارین آزالدیغیندان خبر وئریر، لاکین اصفهان کیمی بیر ایالتده، مرداد آیینین سون هفته‌سیندن بری خسته‌خانالارا قبول ائدیلن خسته‌لرین سایی‌نین تخمیناً 800 نفردن 900 نفره چاتدیغینی بیلدیردی. مسووللارا گؤره، ایالتده یولوخما وضعیتی گئتدیکجه پیسلشیر و بو یالنیز اصفهان ایالتی ایله محدودلاشمیر.
