جعفر عظیم‌زاده گؤزله‌نیلمز بیر شکیلده رجایی شهر حبس‌خاناسینا کؤچورولدوکدن سونرا آجلیق آکسییاسی کئچیردی
ایران آزاد ایشچیلر بیرلیگی ایداره هئیتی‌نین کاتیبی جعفر عظیم‌زاده گؤزله‌نیلمه‌دن رجایی شهر حبس‌خاناسینا کؤچورولدو.
اؤنجه‌لر اوین حبس‌خاناسیندا اولان عظیم‌زاده، کؤچورولمه‌سینه اعتراض ائتمک اوچون رجایی شهر حبس‌خاناسینا گلدیکدن بری آجلیق آکسییاسی کئچیریر.
اؤتن هفته محکوملاردان آلینمیش تصادوفی تستلردن سونرا جعفر عظیم‌زاده نین بو حبس‌خاناداکی ۱۱محکوملا بیرلیکده کئچیردیگی کرونا تستی موثبت اعلان ائدیلدی و او اوین حبس‌خاناسی‌نین ۸-جی حوجره‌‌سینده‌کی ۱۲محکوملا بیرلیکده حبس‌خانانین ساغلاملیق مرکزینه کؤچورولدو. «جعفر عظیم‌زاده»، «اسماعیل عبدی»، «امیرسالار داوودی»، «مجید آذرپی»، «فریدون احمدی» و «سعید شریفی» بو اینسانلار آراسیندا ایدی.
۲۶مرداددا بو شخصلر موعاینه ائدیلدیکدن سونرا اوین حبس‌خاناسی‌نین ساغلیق مرکزی‌نین حکیمی جعفر عظیم‌زاده نین دورومونون کؤتو اولادوغونو و درحال طالقانی خسته‌خاناسینا گؤندریلمه‌سینی امر ائتدی. بو ایشچی فعالی‌نین عائله‌‌‌سی‌نین تعقیبی ایله تانیش اولان بیر منبع دئدی « طالقانی خسته‌خاناسینا کؤچورولدویونو بیلدیکدن سونرا عائله‌‌‌سی اورایا گئتدی»، لاکین خسته‌خانا گؤرولیلری اونون خسته‌خانادا اولدوغوندان خبرلری یوخدو. ائرته‌سی گون بو فعالین حیات یولداشی اونون حبسینی ایزله‌مک اوچون حبس‌خانانین نظارت شؤبه‌سینه گئتدی، لاکین محبوسون وضعيتیندن خبرسیز اولان «وزیری»، بو باره‌ده هئچ بیر کؤچورمه امری وئرمه‌دیگینی بیلدیردی. «بو تعقیبلردن سونرا عظیم‌زاده عائله‌‌‌سی اوین حبس‌خاناسینا گئتدی و حبس‌خانا گؤرولیلری اونون کرج‌ده‌کی گوهردشت حبس‌خاناسینا کؤچورولدویونو ادعا ائتدی.»
۲۹ مرداد ۱۳۹۹گونورتادان سونرا، ایران آزاد ایشچیلر بیرلیگی ایداره هئیتی‌نین کاتیبی‌نین حیات یولداشی «اکرم رحیم‌پور»، رجایی شهر حبس‌خاناسینا باش چکدی و اونونلا گؤروشه بیلدی. خانیم رحیم‌پورون سؤزلرینه گؤره، ائشی کرونا خسته‌لیگیندن جدی شکیلده ضعیفله‌میش و آلدادیلماسینا و رجایی شهر حبس‌خاناسینا کؤچورولمه‌سینه اعتراض اولاراق آجلیق آکسییاسینی اعلان ائتدی.
ایران آزاد ایشچیلر بیرلیگی‌نین ایداره هئیتی‌نین کاتیبی ۱۳۹۵-جی ایلده اوین حبس‌خاناسیندا اولدوغیندا دا ۶۳ گون آجلیق آکسییاسی کئچیرمیشدی. او آغ‌جییر و اورک خسته‌لیکلریندن اذيت چکیر.
جعفر عظیم‌زاده ۱۳۹۳-جی ایلین اسفند آییندا حاکم «ابوالقاسم صلواتی»نین ریاستینده‌کی اینقیلاب محکمه‌‌سی‌نین ۱۵-جی شؤبه‌سی طرفیندن «میلی تهلوکه‌‌‌سیزلیگه قارشی حرکت ائتمک و توپلاشما» و «عومومی قایدانی پوزماق»، اتهاملاری ایله موحاکیمه اولوندو و ۶ ایل حبسه محکوم ائدیلدی و ۲ایل مجازی شبکه‌لر و مئدیالارداکی فعالیتدن محروم ائدیلدی. بو حؤکم ديَیشمه‌دن تمییز محکمه‌‌سی‌نین ۵۴-جو شؤبه‌سی طرفیندن تصدیقلندی.
ایران آزاد ایشچیلر بیرلیگی ایداره هئیتی‌نین کاتیبی، ۱۷آبان ۱۳۹۴-جی ایلده، اوین محکمه‌‌سی‌نین ۳۳-جو بؤلگه جینایت حؤکملری‌نین ایجرا دایره‌سی‌نین بیرینجی شؤبه‌سی‌نین ابلاغی نتیجه‌سینده ۶ ایللیک جزاسینی چکمک اوچون اؤزونو اوین حبس‌خاناسینا تقدیم ائتدی و بو حبس‌خانانین ۸-جی حوجره‌‌سینه کؤچورولدو.
