اصفهاندا اوچ نفر بی‌بی‌سی ایله علاقه قورماق اتهامی ایله توتوقلاندی
بی‌بی‌سی تلویزیونونا شکیللر گؤندرمک اتهامی ایله اصفهاندا اوچ نفر توتوقلاندی.
اصفهان ایالتی‌نین پولیس کوماندیری محمدرضا میرحیدری بو خبری آچیقلایاراق دئدی: «بو اینسانلار دینی یئرلردن فیلم چکرک بو یئرلرین کرونا ویروسونون یاییلما مرکزلری اولدوغونو گؤسترمه‌یه چالیشیردیلار.»
میرحیدری علاوه ائدیب کی، بو اینسانلار سون ۱۰ گونده معین ائدیله‌رک توتوقلانیبلار.
او دئدی، «بی‌بی‌سی فارسجا ایله علاقه‌‌‌لی اولان بو شخصلردن بیری لنجان شهرینده بیر قادین ایدی و توتوقلاندیغی آندا اوندان بعضی سندلر الده ائدیلیب.»
بو پولیس مقامی‌نین سؤزلرینه گؤره، بو شخص «توپلومدا بو یولوخوجو ویروسون یاییلماسی‌نین منبعیی‌نین فردلر و دینی ییغیناجاقلار اولدوغونو ثبوت ائتمه‌یه چالیشیردی.»
میرحیدری علاوه ائدیب کی، «تیران» شهرینده توتوقلانان ایکینجی شخصین «خاریجی شخصلرله ایچکی ایچدیگینه دایر ثبوتلار الده ائدیلیبدیر.»
او توتوقلانان اوچونجو شخصین کیملیگی باره‌ده آچیقلاما وئرمه‌ییب.
