ایرانداکی کرونا؛ صحیه ناظرلیگی: تهلوکهسیز بیر ایالتیمیز یوخدور
صحیه ناظرلیگی‌نین گؤرولیلرینه گؤره، ایرانین ۲۷۱ شهری قیرمیزی و خبردارلیق وضعیتده‌دیر و ویروسون اؤتورولمه سرعتی اوچ تا یئددی قات آرتیب. خسته‌لرین خسته‌خانالارا گؤندریلمه‌سی‌نین طرزی ده ديیشیب و آغیر خسته‌لرین سایی‌نین آرتماسی ایله خسته‌خانا آی‌سی‌یو یاتاقلاری‌نین گوجو تاماملانیب. بو وضعیت داوام ائدرسه، بو اؤلکه‌ده خسته‌لیگین آرتماسی ایتالیا و اسپانیانین تجروبه‌سی‌نین تکرارلانماسینا سبب اولا بیلر؛ حکیملر خسته‌لر آراسیندا مجبور اولاراق سئچیم ائتمه‌لیدیرلر.
سون ۴۸ ساعتدا ایران خسته‌خانالاریندا کرونا خسته‌لیگی اولان ۳۹۷ خسته اؤلدو و رسمی ایستاتیستیکایا گؤره کرونا تشخیصی قویولان خسته‌لرین سایی ۳۱۷ مین ۴۱۳ نفره چاتدی. عینی زاماندا، صحیه ناظرلیگی، اؤلکه‌نین ۱۷۰ شهری‌نین قیرمیزی، ۱۰۱ شهرین خبردارلیق وضعیتینده اولدوغونو آچیقلاسا دا، عینی ناظرلیگین بیلیم‌یوردونا گیریش ایمتاهانی‌نین تعیین اولونموش تاریخده و محرم مراسیمینده کئچیریلمه‌سی اوچون ساغلاملیق پروتکللاری حاضرلادیغی بیلدیریلدی.
صحیه ناظرلیگی‌نین معاونی ایرج حریر‌چی‌نین سؤزلرینه گؤره، توپلانما پرینسیپی کرونا ایله موباریزه قایدالارینا ضد اولسا دا، محرملیک یاس مراسیملرینده پروتکللارا عمل اولونور. اینسانلار ماتم هئیتلری‌نین ساغلاملیق قایدالارینا عمل ائده‌جه‌یینه و دینی قوروملارین ساغلاملیق پروبلئملرینی رعایت ائده‌جه‌یینی ان یاخشی نومونه اولاجاغینا امین اولا بیلرلر.
حریرچی، عینی زاماندا اؤلکه‌نین موختلیف بؤلگه‌لرینده یاس مراسیملری‌نین موختلیف اوصوللارینا توخوندو، بعضی محرم مراسیملری‌نین کئچیریلمه‌سینی قاداغان ائتدی و دولایی یوللا اینسانلارین ساحیللر و بازارلاردا توپلانماسینی محرم مراسیمی ایله موقایسه ائده‌رک مودافیه ائتدی. هئیتلرین ساغلاملیق پروتکللارینا تام اویغون اولاجاغی و ساغلاملیق قایدالارینین رعایت ائدیلمه‌سی اوچون ان یاخشی مدل اولاجاغینی سؤیله‌دی. البته کی، 80مین رسمی هئیتی، ۸ مین موفتیشین نئجه نظارت ائده‌جه‌یینی سؤیله‌مه‌دی.
صحیه ناظری‌نین معاونی، شهر یئرلرینده اینسانلار طرفیندن ماسکه‌لرین ایستیفاده‌سی‌نین ۷۰ قدر یاخشیلاشدیریلدیغینا و اینسانلاری ماسکه‌لردن ایستیفاده ائتمه‌یه مجبور ائتمک اوچون جریمه‌لر کیمی قورخودان متدلاردان ایستیفاده ائدیلمه‌سینه توخوناراق دئدی کی، ماسکهالماق اوچون مادی ایمکانلاری اولمایان اینسانلار جزا قایدالاریندان خاریجدیلر.
بوتون شهرلرده محرمده‌کی یاس مراسیملرینه توخونان صحیه ناظری‌نین معاونی «علیرضا رئیسی»، بو گونلرده کروناویروسا یولوخانلارین سایی‌نین آرتاجاغینا دایر بیر ناراحاتلیق اولدوغونو سؤیله‌دی: «تهلوکهسیز شهریمیز یوخدور، محرملیک ماتم گونلرینده، اگر ساغلاملیق قایدالارینا تام عمل اولونماسا، کرونا خسته‌لیگی اولانلارین سایی ۹۰فایز آرتاجاق» دئدی.
محرم آیی باشلامادان اؤنجه ماتم اوچون بیر مدلین حاضرلانماسی و تلویزیوندا یاییملانماسی، بیر چوخ ماتم مراسیملری‌نین ایدمان استادیوملاریندا کئچیریلمه‌سینی و یا هر ائوین حسینیه اولاجاغینی و هر عائله‌‌‌نین ائوده یاس توتماسینی تکلیف ائتدی.
مجلیسین «تحصیل و آراشدیرما کمیسیونونون» سؤزچوسو «احمدحسین فلاحی»، بیلیم‌یوردونا گیریش ایمتاهانی زامانی ساغلاملیق پروتکللارینا عمل اولونماسینا نظارت ائتمک اوچون ملت وکیللریندن و صحیه ناظرلیگیندن عبارت ۱۳ نفرلیک بیر تمثیلجی هئیتی‌نین یارادیلماسینا توخوناراق، ایمتاهانین واختیندا، یعنی مردادین سونلاریندا ساغلاملیق پروتکللارینا اویغون اولاراق کئچیریله‌جه‌یینی سؤیله‌دی و ایمتاهان اوچون آیریلمیش یئرلرین یالنیز ۲۰فایزینین ایستیفاده ائدیلمه‌لی اولدوغو وورغولاندی.
کرونا ایله موباریزه قرارگاهی‌نین تهلوکه‌‌‌سیزلیک، سوسیال و اینتیظام کومیته‌سی‌نین رئیسی «حسین ذوالفقاری»، اؤلکه‌نین بوتون رسمی قوروملاری‌نین کرونا ایله بیرلیکده یاشاماق اوچون بیر ایللیک بیر پلان تقدیم ائتمه‌لری‌نین ضروری اولدوغونو سؤیله‌دی.
کرونا ایله موباریزه قرارگاهی‌نین عضوو «مسعود مردانی»، کرونا ویروسونون اؤتورولمه سرعتی‌نین اوچ ایله یئددی قات آرتدیغینی قئید ائتدی. ایراندا کرونا خسته‌لیگی و اؤلوملرین سایی‌نین هله ده آرتدیغینی و خسته‌لیگین یاییلماسی‌نین آزالدیلماسیندا هر کسین مسوولیت داشیدیغینی، عکس حالدا سویوق مؤوسومده وضعیتین داها دا پیس اولاجاغینی خبردار ائتدی.
«علیرضا سلیمی»، ایران طبّ بیرلیگی‌نین معاونی، ایرانداکی طبّ ایشچیلری و طبّ بیرلیگی آراسیندا یولوخمانین چوخ یوکسک اولدوغونو و تهراندا آغیر وضعیتین آرتدیغینی و نتیجه‌ده تهراندا ۶۰۰۰ طبّ چالیشانی‌نین کرونا خسته‌لیگینه یولوخدوغونو سؤیله‌دی و اونلاردان ۱۵۰نفری‌نین اؤلدویونو بیلدیردی.
او علاوه ائتدی کی، کرونا خسته‌لیگی اولان کریتیک وضعیتده‌کی خسته‌لرین سایی آرتدی و نتیجه‌ده آی‌سی‌یو یاتاقلاری‌نین گوجو آزالدی و خسته‌خانالارین آی‌سی‌یو جیهازلارینا و یاتاقلارینا احتیاج واردیر.
صحیه ناظرلیگی‌نین سؤزچوسونون دئدیگینه گؤره، بو ایلین تیر آییندان بری گیلان ایالتی‌نین اکثر شهرلرینده کرونا خسته‌لیگی یئنیدن آرتیب، گیلان ایالتی‌نین رشت، رودبار، آستارا، رودسر، لنگرود و لاهیجان کیمی توریستیک شهرلرینده خسته‌خانایا یئرلشدیرمه و ویروسا یولوخما داها سرعتلی بیر گئدیشاتدادیر.
اونون سؤزلرینه گؤره، یولوخانلارین و خسته‌خانایا یئر‌لشدیریلمه‌لرین ۳۰فایزی گیلان شهرلرینه سیاحت ائدن سیاحتچیلرله علاقه داردیر.
ایرانداکی کرونانین ایلک زیروه‌سی زامانی چوخ کریتیک بیر وضعیتده اولان قوم ایالتی یئنیدن قیرمیزی وضعیته دوشدو. ایالت طبّ علملری بیلیم‌یوردونون رئیسی «محمدرضا قدیر»، اینسانلاری ساغلاملیق پروتکللارینا عمل ائدیلمه‌مه‌سینده گوناهلاندیراراق، قوم خسته‌خانالاری‌نین توتومونون آشاغی اولدوغونو و حاضردا ۳۵۹ شوبهه‌لی خسته‌نین اولدوغونو و اونلاردان ۶۶ نفری‌نین وضعیتی‌نین آغیر اولدوغونو بیلدیردی.
قومون ایالت بؤحران وضعیتلرینده موباریزه عملیاتلاری فرماندهی، بو ایالت خالقیندان، ایالتده‌کی کرونا وضعیتی‌نین قیرمیزی اولدوغو سببییله مومکون قدر ائوده قالمالارینی ایسته‌دی. او اینسانلارین توی و یاس مراسیمیری، باش‌ساغلیغی و دفن مراسیملریندن ایشتیراک ائتمکدن چکینمه‌لرینی، عینی زاماندا سانال «قدیر بایرامی» کئچیرمه‌لرینی ایسته‌دی.
اصفهان طبّ علملری بیلیم‌یوردو طرفیندن وئریلن معلوماتا گؤره، چارشنبه گونو ایالتین طبّ مرکزلرینه موراجعت ائدن خسته‌لر قروپونا ۱۰۹ یئنی کرونا خسته‌سی علاوه ائدیلدی. ایالت خسته‌خانالارینا یئر‌لشدیریلن خسته‌لرین توپلام سایی ۸۳۰ نفره چاتدی و اونلاردان ۱۸۶ نفری اؤزل باخیم شؤبه‌سینه یئر‌لشدیریلیبلر.
هر گون یوز مینلرله اینسانین البرزدان تهرانا گئت گل ائدیرلر. البرز طبّ علملری بیلیم‌یوردونون رئیسی «حسین کریم»، چارشنبه آخشامی گونو ۵۷۰ نفرین ایالتین خسته‌خانالارینا گئتدیگینی و ۷۱ نفرین خسته‌خانایا یئرلشدیریلدیگینی سؤیله‌یه‌رک ایالتده خسته‌خانایا یئر‌لشدیریلنلرین سایی ۵۴۷ نفره چاتدیغینی دئدی. اونون سؤزلرینه گؤره، چارشنبه آخشامی گونو دیگر ۱۳ کرونالی خسته دونیاسینی ديیشیب و ایالتده اؤلنلرین توپلام ساییسینی ۷۷۰ نفره چاتدیریب.
چارشنبه آخشامی گونو همدان ابن سینا طبّ علملری بیلیم‌یوردونون موعالیجه ایشلری اوزره معاونی، هر گون اورتالاما کرونا خسته‌لیگی اولان ۲۵۰ خسته‌نین همدانداکی خسته‌خانالارا موراجعت ائتدیکلرینی و اونلاردان ۸۰ نفرنین خسته‌خانایا یئرلشدیریلدیگینی، بو گونه قدر ایالتده ۳۹۲ اینسانین کرونا خسته‌لیگیندن اؤلدویونو سؤیله‌دی.
«ابراهیم جلیلی»،نین معلوماتینا گؤره، سون بئش گونده همدان ایالتینده کرونانین یوکسه‌لیشی دایانیب و سون هفته‌لرده خسته‌لرین سایی ۶۵۰ نفردن ۴۵۰ نفره آزالیبدیر.
سون هفته‌لرده فارس ایالتی طبّ علملری خسته‌خاناسی‌نین گؤرولیلری، خسته‌لر آراسیندا اؤلوم سويه‌‌سی‌نین آشاغی اولماسی اوچون صحیه ناظرلیگی‌نین مقاملاری طرفیندن تقدیر ائدیلمیشدیر. آنجاق ایندی فارس ایالتینده کرونا خسته‌لیگی اولان خسته‌لرین سایی‌نین آرتماسینا توخونان شیراز طبّ علملری بیلیم‌یوردونون معاونی «عبدالرسول همتی»، ایالتده بو خسته‌لیک سببییله آرتان اؤلوم ساییلاری‌نین چوخ ناراحات ائدیجی اولدوغونو سؤیله‌دی.
فارس ایالتینده اؤلنلرین توپلام سایی ۵۴۶ نفره چاتیب و حاضردا ۹۲۱ خسته خسته‌خانایا یئر‌لشدیریلیب و اونلاردان ۱۰۱ نفری اؤزل باخیم شؤبه‌سینده‌دیر.
دوکتور همتی‌نین سؤزلرینه گؤره، کرونا خسته‌لیگی اولانلارین ۷۰ فایزینین یاشلاری ۱۰ ایله ۵۰ یاش آراسیندادیر و بو قروپداکی خسته‌لرین ۱۵ فایزی دا اؤلور.
مازانداران ایالتی‌نین ملّت وکیللری توپلولوغونون رئیسی، «مهدی سعادتی»، مازاندارانداکی کرونانین کریتیک وضعیتینه توخوناراق، بو ایالتین ایکینجی دالغادان سونرا جدی پروبلئملرله اوزلشدیگینی و هر گون یوزلرله اینسانین اؤلدویونو سؤیله‌دی. او ایالتین درمان، اکسیژن ژنراتورلاری و خوصوصی ایمکانلارین تامینینده پروبلئملرله اوزلشدیگینی دئدی.
صحیه ناظرلیگی بوشهر ایالتی‌نین خبردارلیق وضعیتینده اولدوغونو آچیقلادی. بو ناظرلیک سؤزچوسونون دئدیگینه گؤره، حاضردا بو ایالتین آلتی شهری قیرمیزی، ایکی شهریده خبردارلیق وضعیتینده‌دیر و بوشهر، برازجان و گناوه‌نین وضعیتی داها کریتیکدیر. بئله‌لیکله، وضعیتی آز کریتیک گؤرونن بیر شکیلده ایستاتیستیکا و معلوماتلار اوزرینده اویناما سیاستی ان پیس شکیلده صحیه ناظرلیگینده داوام ائدیر.
سون ۴۸ ساعت عرضینده، صحیه ناظرلیگی‌نین سؤزچوسونون آچیقلادیغی ایستاتیستیکایا گؤره، اؤلکه‌ده ۵ مین ۲۵۰ یئنی کرونا خسته‌سی تثبیت ائدیلدی و خسته‌لرین توپلام سایی ۳۱۷ مین ۴۱۳ نفره چاتدی. عینی ۴۸ ساعتدا، رسمی ایستاتیستیکایا گؤره، ۳۹۷ خسته خسته‌لیکلری‌نین آغیرلاشماسی سببییله حیاتینی ایتیردی و ایراندا کرونادان اؤلنلرین رسمی سایی ۱۷ مین ۸۰۲ نفره چاتدی.
«سیما سادات‌لاری»نین، وئردیگی معلوماتا گؤره، ۲۷۱ شهر قیرمیزی وضعیتینده‌دیر و دئمک اولار کی، اؤلکه‌نین بوتون مناطقی کرونا ویروسونا یولوخموشدور. بونلاردان ۱۴ ایالت اولماق اوزره مازانداران، تهران، گلستان، خراسان شمالی، اردبیل، اصفهان، البرز، رضوی خوراسان، کرمان، سمنان، دوغو آذربایجان، مرکزی، یزد و گیلان قیرمیزی وضعیتده و ۱۲ ایالت یعنی فارس، ایلام، لرستان، هرمزگان، زنگان، قزوین، باتی آذربایجان، بوشهر، همدان، قوم، چهارمحال و بختیاری و کهگیلویه و بویراحمد خبردارلیق وضعیتده‌دیرلر.
