محکمه اورقانی «اعدام ائتمه‌یین» هشتگینه تبکی وئردی
محکمه اورقانی‌نین اینسان حوقوقلاری قرارگاهی‌نین خبرلشمه مرکزی سوسیال شبکلرده میلیونلارلا اینسانین «اعدام ائتمه‌یین» هشتگینه تبکی گؤستردی.
امیرحسین مرادی، سعید تمجیدی و محمد رجبی 1398-جی ایلین آبان اعتراضلاریندا ایشتیراک ائتدیکلرینه گؤره اعداما محکوم اولان اوچ گنجدیر و بو حؤکمون وئریلمه‌سی بین الخلق اعتراضلارا سبب اولموشدور.
توییترده فارسجا «اعدام نکنید» هشتگی دؤرد میلیون دفعه قوللانیجیلار طرفیندن ایستیفاده ائدیله‌رک بو حؤکمون لغو ائدیلمه‌سینه بیر چاغیریش اولاراق بیلدیریلیب و قوللانیجیلار بو حؤکمه قارشی ایسلام جمهورییتی و محکمه اورقانی مسووللارینا توییترده هوجوم ائدیبلر.
میلیونلارلا توییتر قوللانیجی‌سینین یاراتدیغی دالغانین آردیندان چارشنبه گونو محکمه اورقانی‌نین اینسان حوقوقلاری قرارگاهی، اعدام جزاسینا محکوم ائدیلمیش ایکی نفرین گوناهی‌نی «سلاحلی سویغونچولوق» اولاراق ادعا ائتدی.
قرارگاه، «بو ایکی نفره اعدام حؤکمونون وئریلمه‌سی‌نین 98-جی ایلین آبان اعتراضلاری ایله هئچ بیر علاقه‌‌‌سی‌نین اولمادیغینی»، «جینایت تشبوثو» و «وطنداشلارین تهلوکه‌‌‌سیزلیگینی تهدید ائتمکله» اتهام ائدیلدیکلرینی سؤیله‌دی.
قرارگاه، «بو ایکی شخصه، اؤلکه‌دکی بعضی اقتصادی پروبلئملره قارشی آپاریلان اعتراضلاردا خالقین اعتراضلارینی قارقاشایا آپاران آداملار» آدینی وئردی.
محکمه قرارلارینا اولان اعتراضلاری تنقید ائدن محکمه اینسان حاقلاری قرارگاهی سانال شبکلرده «اعدام ائتمه‌یین» و «کرونا ایله ایشگنجه» هشتگلرینی، ایران خالقینی «هدف آلان» بیر قروپ طرفیندن اولدوغونو یازماقدادیر.Iranwair
