قادینلارا قارشی زوراکیلیق و تحقیر ائدیجی داورانیشلارا و سئکسیستی اهانتلره سون قویولمالیدیر

دونیانین بیر چوخ اؤلکه‌لرینده قادینا قارشی آشاغیلاما، سالدیری و قادینلاری اؤلدورمه، تانینمیش بیر فئنومئن‌دیر. ناموس یا غیرت قتللری دونیانین ان وحشی زوراکیلیق فورمالاریندان دیر کی، کیشیلرین، قادینلارین جنسی داورانئشلارینا مطلق کونترولوندان و بو کونترولو الده ساخلاماق اوچون اویغولانان بوتون زوراکیلیق مئتودلاری و اونون نهایی مجازاتی اولان قتلدن بئله چکینمه مکدن عبارت دیر. 

هارداسا بوتون دونیا دا یایقین اولان”ناموس و شرف“ جنایتلرینین دقیق ائستاتستیک معلوماتینا ال تاپماق چوخ چتین بیر مسئله دیر و اونا دا سبب بو جنایتلرین بؤیوک بیر قسمی نین “انتحار” پرده سی ایله اؤرتولمه سیدیر. بونا باشقا بیر سبب ده آتا ارکیل جمعیتلرده حتّی محکمه و پولیس اورقانلارینین کیشیلردن ترکیب تاپماسی، بو قتللری ائله بو ”مسئول“ اورقانلارین الی ایله اؤرت- باسدیر ائتمک عنعنه سی دیر. 

بو قتللره، حتّی دینلرین الی ایله قادینلارا قارشی قویولان قاداغالار اساسیندا، چوخ اؤنجه لردن راست گلمک اولار! اما دین عامیلی اونو داها ” نورمال“ ، ”حلال“ و ”مشروع“ بیر بیچیمه سالمیشدیر. ایران دؤولتی بیر دینی/ شیعه تئوکراتیک سیستئمده اداره اولان دؤولت کیمی، حتّی اؤزونون قانونلاریندا بئله رسماً ناموس قاتیللرینی مختلیف یئرلرده جزادان معاف توتور! مثلاً قاتیلین آتا اولماسی، اونو قصاص ویا اؤلوم جزاسیندان قورتاریر و بونونلا قانوندا زوراکیلیغا زمین یارادیلیر. 

ایران‌دا تکجه سون هفته‌لرده، ناموس آدی ایله بئش قادین و بیر قیز اوشاغی اؤلدورولموشدور. او جمله دن دیر:

 هاجر حسین بر, سارا نارویی , رومینا اشرفی, فاطمه برخیو، ریحانه عامری و…. 

قادینلارا قارشی جنایت، ایرانین هر بیر طرفینده انسانلار و عایله‌لری کدرلندیریب پریشان ائدیر. بو جنایتلری دایاندیرماق اوچون بیر چوخ دئموکرات انسان و قادین حقلرینی مُدافعه ائدن آکتیویستلر، مختلف چابالار گؤسترمکده دیرلر. 

بئله بیر دورومدا چوخ تأسّفله گؤروروک کی، آذربایجان تورک ملّی حرکاتی‌نین ایچینه سیزمیش بعضی شخصلر، قادینلارا قارشی دوشمنچیلیگی‌ و زوراکیلیغی، مئدیایا چکمیشلر و آشکار فورمادا قادینلارا قارشی آشاغیلاما و سالدیریلاری، گونده‌لیک خبره چئوریلمکده‌دیر. تورک خالقی دا ایستهر- ایسته‌مز بو گئدیشاتدان هر گون ‌تأثیر آلماقدادیر. تورک قادینی گونئی آذربایجان‌دا و عمومیتله ایران‌دا هر زامان مترقی و توپلوسال فعالیتلرده اؤن سیرالاردا گئدن بیر مؤوقعده دوراراق، قادین حقلریندن مُدافعه ائتمکده بیرینجی یئرده یئرلشمیشدیر. اؤرنک اولاراق 1945-جی ایلده آذربایجان ملّی-دئموکراتیک حکومتی برپا اولدوقدا، قادینلارین حقلری بو حکومتین قانونولاریندا هارداسا اوروپا قانونلاری سویّه سینده بلکه داها دا آیدین گؤزه چارپمیشدیر. آذربایجان ملّی دئموکراتیک حکومتی نین بیرینجی آددیملاریندا، او دؤنَمین ضرورتلرینه دایاناراق و حتّی ایران دا و دونیانین بیر چوخ اؤلکه‌لرینده هله قادین‌لارا حق کیمی قبول اولونمایان، سئچیب-سئچیلمه حقّینی رسمیّته تانیمیشدیر. قادینلار بوتون عرصه‌لرده، او جمله‌دن ملّی اوردونون سیرالاریندا فعالیته باشلامیشدیرلار. حال بو کی او دؤنمده نادر حاللاردا سایر اؤلکه لرده قادینلار اوردو سیرالارینا قبول اولونوردو ! آذربایجان تورک ملّی دئموکراتیک حرکاتی چالیشقانلاری بو عنعنه‌یه دایاناراق، توپلومدا قادینلارین برابر حقّیندن مُدافعه ائتمه‌سینی اؤزونه بیر بورج بیلمیش و فئمینیزیمی دَرین سایغی ایله آلقیشلامیشدیر. تأسفله بو گئچمیشه باخمایاراق، آذربایجان تورک ملّی حرکاتی‌نین سیرالاریندا یئرلَشن و اؤزلرینی تورک آکتیویستی کیمی تانیتدیرانلارین بعضیلرینین، هله ده آتا ارکیل دوشونجه، دیل و کولتور ایله چیخیش ائتمه سینی گؤرمک مومکوندور. بونا شاهد سون زاماندا اؤزونو آذربایجان آکتیویستی کیمی تانیتدیران بعضیلری سالدیریجی و حتّی سکسیستی و لومپنیستی بیر دیل ایله حرکاتیمیزین سیرالاریندا چالیشان تانینمیش حؤرمتلی قادینلاریمیزا؛ او جمله‌دن سایین دوکتور سیمین خانیم صبری، سایین سئویل خانیم سولیمانی و ایسوئچ پارلمانیندا مجلس نوماینده‌سی اولان سایین آیلین خانیم فاضلیانی آشاغیلاماغا چالیشمیشدیرلار. بونون ثبوتو اوچون سوسیال مئدیادا یئترلی قدر ویدئو و چیرکین یازیلار موجود دور. 

بیز قادین حقلرینه سایغی دویاراق؛ بو کیمی قبول ائدیلمز و دئمکراتیک ملّی حرکتیمیزه یاراشماز داورانیشلاری قینایاراق، تاریخیمیزده اولان” قادینلارا قارشی سایغیلی داورانیش“ ایزلرینی تعقیب ائدیب، تورک آذربایجان توپلوموندا قادیلارین هر قونودا برابر حقلر ایله یاشاماسینا ایناناراق و او حقلرین حیاتا گئچیریلمه سینه زمین یاراتمایا چالیشاراق، وار گوجوموز ایله اُصولی مجادله ائتمه یه حاضرلیغیمیزی بیلدیریریک. 

قادینلارین حقلری تانینمامیش بیر توپلومدا دئمکراسیدان دانیشماق چوخ ائرکن دیر. آذربایجان تورک آکتیویستی اولاراق، آذربایجان تورک توپلوموندا آتا ارکیل کولتورون گئری‌یه قالمیش بیر کولتور اولدوغونو گؤسترمه‌یه چالیشیب و عین حالدا هر بیر آنتی دئموکراتیک داورانیشی یئرینده قیناییب افشاء ائده جه ییک. 

بو بیان نامه نی ایلک امضا ائدنلر: 

مهندس حسن راشدی، شاهین خیا وی، امیر ماکویی، شهرام رادمهر، سجاد رادمهر، دوکتور محمد حسین یحیایی، دوکتور ضیاء صدرالاشرافی،سئویل سلیمانی, مهدی دادگر، مهندس محمد حسین خشتی، مهندس میلاد طالبی، شهریار شکاری، تقی سلیمان جاه، ابراهیم مددزاده، سلیمان سلیم، سهیلا عزیزی، سعید عزیزی، احمد حکاکپور، احد وکیلی، آراز نسیمی، وحید فخیم، رسول رحیمعلی، انصافعلی هدایت، فریده نفیسی، دوکتور سیمین صبری، یونس شاملی