بابک چلبیانی نین بؤلگه سل سیاسی آنلایشینا اینانا بیلریک می؟

آذ قولوبال تله نئت ده گئدن مصاحیبه حاقیندا

مقاله نی سسلی دینله مک اوچون بورایا تیخلایین

یونس شاملی
سون گونلرده، آذگلوبال تله کانالی “بیرلیکین سؤزچوسو سعید بئی عزیزی” ایله “دیرنیش” تشکیلاتی سؤزچوسو بابک بئی چلبیانی ایله بیر موصاحیبه آپاریب و آزربایجان تشکیلات لاری آراسیندا ایتتیفاق لارین برپا اولماسی حاق دا دانیشیلیب. بو موصاحیبه نین چوخ بؤلومو صمیمی بیر فضادا و دیالوق ماهیت لی بیر فورمادا آپاریلمیشدیر. البته مصاحیبه نین بو بؤلومونو آلقیشلاماق لازیمدیر. آمما مصاحیبه نین بیر بؤلومده دانیشیق قیلیفیندان چیخیر و بابک بئی چلبیانی منیم حاقیمدا مثبت سؤزلر دئدیکدن سونرا، سؤزو تورکییه ده پ ک ک تشکیلاتینا گتیریر و منی غیراخلاقی بیر جمله ایله غئیر مستقیم پ ک ک دستک چیسی کیمی گؤسترمه یه چالیشیر و دئموکراتیک قورالاردان جایاراق یالنیش، و شانتاژ ماهیت لی بیر بیچیمده، یوخاریدا گتیردییم ایتتهامی منیم سققه لیمه یاپیشدیرماغا تشبوث گؤستریر.

آمما آیدینلق گتیرمک اوچون ایلک اؤنجه دئمه لییم کی من هئچ بیر یازیدا و حتتا دانیشیق دا بوگونه قدر پ ک ک حاقیندا فیکر دئمه میشم. بونا گؤره ده هر کیم منیم آغزیمدان پ ک ک دسته یی چیخارتماغا چالیشیرسا، نه دئموکراتیک، نه اینسانی و نه ده اخلاقا دایانان بیر ایش گؤرمور. آمما بوندان اساسلی بیر سؤز ده وار. دیکتاتورلار و فاشیست لر سیاست عالمینده بیر اساسا دایاناراق دئموکراتیک دوشونجه یه سالدیرارلار. او دوشونجه ده بوندان عبارت دیر کی؛ “یا منیم یانیمدا دوراجاقسان یا منیم دوشمانیم حئساب اولاجاقسان”. پ ک ک دا دقیقن بو خاصییت ده بیر تشکلات اولاراق، فاشیستی دوشونجه یه دایانان و اونا چوخ قابا فورمادا عمل ائدن بیر تشکیلات دیر. ایران مخالفیتی قوروپلارینین ایچینده اولان خلق موجاهیدلری ده فاشیست یاچیسی اولان بیر تشکیلات دیر. بابک بئی چلبیانی اؤزو ویا منسوب اولدوغو تشکیلات ایرانین خالق موجاهدلرینی، کی پ ک ک دان بیزیم خالقیمیزا قات قات تهلوکه لی بیر قوروپدو و گؤنئی آزربایجانین هامیسیندا گؤز واردیر، تروریست آدلاندیرمیر. آمما قونشو اؤلکه، تورکییه ده بیر کورد تشکیلاتی تروریست آدلاندیرماغا داها چوخ ماراق گؤستریر!! عجبا بو ماراغین کؤکلری هاردادیر؟ ایرقیچیلیق دا می، یوخسا تیتیز بیر سیاستین اولماماسیندا؟

حتتا ایران ایسلام جمهورییتی یعنی خالقیمیزین اصلی دوشمانی دا یوخاریدا ایشارت ائتدییم ایدولوژیایا دوشگون دور. یعنی ایران رئژیمی ده فاشیستی یاپی سی واردیر و عمومیت ده هر کسی و یا هر تشکیلاتی عئینی رنگه، یعنی اؤز رنگینه چئویرمک ایستیر. ایران ایسلام جمهوریسی ده بو اساسا دایانیر کی، “منیم له دئیرسن سه، دوشمانیملاسان”!

اما بابک بئی چلبیانی یا دئمک لازیمدیر کی، دئموکراتیک بیر دوشونجه آچیسیندان مسئله لری یالنیز آغ- و یا قارا گؤرمک کؤکوندن یالنیش و گئریجی بیر دوشونجه دیر. چون آغ ایله قارا آراسیندا یوزلرجه رنگ، یوزلرجه باخیش، توتوم، فیکیر و دوشونجه اولابیلیر، نئجه کی واردیر. اونلارین بیریدی منیم فیکیرمدی. من پ ک ک تشکیلاتینی آنتی دئموکراتیک دوشنجه یه دایانان فاشیستی بیر یاپی تانییرام و چلبیانی بئی، تاسوفله یوخاریدا آدین چکدییم آنتی دئموکراتیک مفکوره یه اساسلاناراق منی و بیرلیکی بو تشکیلاتا دستک وئرن تانیتدیریر. بو اوتانج وئریی ایفاده لره شانتاژدان باشاق بیر معنا وئرمک موموکن دئیل دیر. بابک بئی چلبیانی بیزه فاشیست یاپی لارین شوعارین تیکرار ائدیر و دئیر کی، “تروریست دئمه سز، ایتتیفاق یاپا بیلمه ریک”! چلبیانی بئی بورادا اؤزون حقیقت ترازیسی سانماقدادیر. چلبیانی بئی دن سورماق لازیمدیر کی، بو مصاحیبه یه قدر سیز 30 ایلدیر تورک میللی حرکاتی نی ایستیقلال شوعاری ایله، ایچ سیاستینده یالنیش یؤنه لتمیسینیز. بو مصاحیبه ده آلله شکور فئدرال پیلاتفورم رئال یول اولماسین تصدیق ائدیرسینیز. بو تجربه یه دایاناراق اومید ائدیرم بیزدن، حرکاتیمیزین بؤلگه سل سیاستی ساحه سینده 30 داها یالنیش سیاست آپاردیغینیزا اینانمامیزی گؤزله مییه جکسینیز.

آمما یئری گلمیش کن، تروریست سؤزونون ایشله تمه مه سبب لریمین بیر نئچه سین ممنونیت له بورادا قیسساجا ایضاح ائدیرم. البته کی سبب لریمین هامیسینی سیاست ایجاباتی یازماق ایسته میرم. او سبب لردن بیرسی بیر سوسیال دئموکرات اولاراق شونیست ایقتیدارلارین ادبیاتیندان ایستفاده ائتمه دن  ایمتینا ائده رم. بو منیم ایناندیغیم سیاسی و اعتراضی فلسفه یه باغلی بیر قورالدیر.

ایکینجی سی، بیر نئچه ایل بوندان اول، آکپ و اردوغانین باریش سوره جی آددا بیر پروسس باشلادی و بیر گئجه ده عبدالله اوجالان تروریست بیر تشکیلات باشچیسی دوروموندان “سایین اوجالانا” آد دئیشدی. بو تورکییه و آکپ نینن سیاست لرینین ایجابیندا گرچکلشدی. ایندی دوشونجه ایفاده سینده حیسسیاتا یاسلانمادان بابک بئی چلبیانی دان سورماق لازیم دیر کی، توتالیم بیر نئچه آی و یا نئچه ایلدن سونرا، تورکییه حاکمیتی “تروریست پ ک ک” ایله گینده باریش موذاکیره سی باشلادی، نئجه  کی گئچمیش ده بو ایش دفعه لرجه باش وئرمیشدیر. بئله بیر سورج گینه ده باشلاییرسا، سایین چلبیانی بئی و تمثیل ائتدییی تشکیلات، تورکییه حاکیمیتینی تروریست لرله باریش موذاکیره سی اوچون اؤزونونه دوشمن توتاجاق می؟! یوخسا چلبیانی بئی مجبورن بیر گئجه ده ده اولماسا، بیر ایکی هفته ایچینده تروریست عبدالله اوجالانی سایین اوجالان آدلاندیراجاق می!؟ چون پ ک ک پئرسپئکتیوده تورکیه دئولتی نین پروبلئمی دیر و او مسئله نی چؤزمک ده هر یولو تئست ائده بیلیر. اوندا چلبیانی بئین صوراتی آغاراجاق یوخسا قیزاراجاق؟ ائله بونا گؤره ده بیز بیر سیاسته اویونجاق اولماق ایسته میریک. ائله بونا گؤرده اؤز آنالیزیمیزه و اؤ ادبیاتیمیزا دایاناراق حرکت ائتمه نی دوشونمه لییک.

چلبیانی بئی و اونون کیمی دوشونلره گینه ده سوآل وئرمه لییم کی، بیرگون تورکییه دئولتی، پ ک ک ایله باریش سورجی باشلاییرسا اونلارین سیاسی توتومو نه اولاجاقدیر؟ تورکیه حاکیمیتی نین  اویونجاغی کیمی داوراناجاقلار، یوخسا تورکییه یه قارشی دوراجاقلار؟ آرخاینام کی بابک بئی و اونا منسوب اولا تشکیلات مکانیکی بیر سیاسی باخیشا دایانمالاری اوچون مسئله نین مورککب پرده لرینه دوشونمه میش و یا دوشونه بیلمه میشدیرلر. آمما بیزیم قراریمیز موستقیل ذهق سیاست اورتمک و او اساسدا عمل ائتمک دیر. بیز گونئی آزربایجان و ایران دا یاشایان تورک خالقی نین میللی ماراقلاری اوچون چالیشیریق و بو چالیشمانی تورکیه دئولتی نین قویروق اولماق لا  موموکن اولمادیغینی بیلیریک. بیر تورکییه سیاست لرینه خالقیمیزین میللی ماراقلاری پنجره سینده باخماغی سئچمیشیک و بیزیم بعضی آکتیویست لریمیز کیمی تورکییه نی گونئی آزربایجانا هئچ زامان اوستون نه گؤروروک و نه گؤرمک ایستیریک. ائله بونا گؤره ده بیزیم سیاست لریمیزدیرنیش تشکیلاتی ایله بؤلگه و دونیا سیاست لرینه گلدیکده بیر بیریندن آیریلیر. بیز آکپ معیاری ایله بؤلگه و دونیا سیاستینه باخمیریق، بلکه خالقیمیزین میللی دئموکراتیک ایستک و طلب لری اساسیندا بولگه و دونیا سیاستین ده موستقیل بیر ایستراتئژی ایزله ییریک.

آدین چکدیمیز مصاحیبه نین بیر باشقا یؤنونه ده دیقت  چکمک ایسته رم. ایکی ساعات آزربایجان تشکیلات لارینین ایتتیفاقلاری حاقدا دانیشیلیر و  چلبیانی بئی بو سونوجا واریر کی ایتتفاقلارین برپا اولماماسینین سببی پ ک ک تشکیلاتی نی تروریست تانیماماق دیر! دیققت ائدین، ایران سیاسی جغرافیاسیندا گونئی آزربایجانین سیاسی تشکیلاتلارینین ایتتیفاق قورماسی، تورکییه ده پ ک ک یا نه دخلی واردیر؟ بو ساچما سؤزلره ایناماق اولور مو؟ بئله دیسه نه اوچون ایستیقلالچی تشکیلاتلار ایندیه قدر هئچ بیر ائتلاف قورابیلمه یبدیرلر؟  بو 10 قوروپ هم ایستیقلالچی دیرلار، هم بوتؤوچیدیرلر، هم میللتچی دیرلر (ناسیونالیست دیرلر)، هم پ ک ک یا تروریست دئیرلر، هم اردوغانین حئیرانلاریدیرلار… نه اوچون بونلار بیر آرایا گله بیلمیرلر؟ ایستیقلالچی قوروپلار بیر آرایا گلمه ینجه، نه اوچون بعضی ایستیقلالچی قورپلار “بیرلیک”له، یعنی بیر فئدئرالیست تشکیلات لا ایتتیفاق قورماغا ماراقلیدیرلار؟ بو عجایب بیر گلیشمه دئیل می؟ سیاست  تاریخینین هاراسیندا یازیر کی تشکیلات لار هامیسی عینی دوشونمه سه لر ایتتیفاقلار یارانابیلمز؟

سونوج بودور کی، حرکاتیمیزین تشکیلات لاری تئوری ساحه سینده گوجلنمه یه یوخ ، بلکه  فورمالیزمه یؤنه لیک چابا و چالیشمادادیرلار. عین حالدا بو تشکیلات دا اولان فعالارین دوشونجه و داورانیش طرزلری دئموکراتیک قوراللارا اویماماغی اوچون بو قدر پریشان و ضعیف دیرلر. آنتی دموکراتیک و شانتاژچی کولتورون بو تشکلات لاردا یایقین اولماسی سایه سینده بوقدر داغینیق بیر دورومدادیرلار. چون کو بابک بئی چلبیانی بو موصاحیبه ده گؤزوموزه باخا باخا بیر ارکک اؤکوزو دوغورماغا چالیشدی.

تشکیلات لاریمیزین بیر بیرینه یاخینلاشماسی البته کی خوش بیر حالدیر. آمما بو تشکیلات لار بیلدینیز کیمی آرزو ائله دییمیز تشکیلات لاردئیرلر. آرزو ائله دییمیز تورک تشکیلات لاری درین سیاسی تئوریه لر داینماق و رئال بر ایستراتئژیه اساسلاناراق خالقیمیزین ماراغی چکمه لی و اونایین آلمالیدیر. من تاسفوله موجود تشکیلات لاریمیزدا بو کاپاسیته نی هله گؤرمورم.

20200622

آدین چکدییم مصاحیبه نین لینکی

Az Qulubal telenetdə gedən musahibə haqqında

?Babək Çələbiyaninin bölgəsəl siyasi anlayışına inanabilərik mi

Yunus Şamili

Son günlərdə, AzQulubal telenet kanalı “Birlikin sözçüsü Səid bey Azizi” və, “dirəniş” təşkilatının sözçüsü Babək bey Çələbiyanı ilə bir müsahibə aparıb və Azərbaycan təşkilatları arasında ittifaqların bərpa olması haqqda danışılıbdır. Bu musahibənin çox bölümü səmimi bir fəzada və diyaloq mahiyətli bir formada aparılmışdır. Əlbətdə müsahibənin bu bölümünü alqışlamaq lazımdır. Amma musahibənin bir bölümüdə danışıq qılıfından çıxır və Babək bey Çələbiyanı mənim haqqımda müsbət ifadələrdən sonra, sözü Türkiyədə Pkk təşkilatına gətirir və əxlaqsız bir biçimdə, dolayısı ilə məni pkk dəstəkçisi kimi göstərir və demokratik ilkələrə hayqırı olaraq, yalnış bir formada yuxarıdakı itihamı mənim saqqalıma yaxmağa çalışır.

Amma aydınlıq gətirmək üçün ilk öncə deməliyəm kı mən heç bir yazıda və hətta danışıqda bügünəqədər pkk haqqında fikir deməmişəm. Buna görədə hər kim mənim ağzımdan pkk dəstəyi çıxartmağa çalışırsa, nə demokratik, nə insani və nə də əxlaqa uyan bir iş görmür. Amma bundan əsaslı bir sözdə vardır. Diktatorlar və faşistlər siyasət aləmində bir əsasa dayanaraq demokratik düşuncəyə saldırarlar. O düşüncədə bundan ibarətdir ki; “ya mənim yanımda duracaqsan ya mənim düşmanım hesab olacaqsan”. Pkkda dəqiqən bu xasiyətdə bir təşkilat və faşistı düşüncəyə dayanan və ona çox qaba furmada əməl edən bir təşkilatdır. iran muxalifəti quruplarının içində olan xalq mucahidləridə faşist yapısı olan bir təşkilatdır. Babək bey çələbiyani özü və ya mənsub olduğu təşkilat iranın xalq mucahdlərini, kı pkkdanda bizim xalqımıza qat qat təhlükəli bir qurupdu və Güney Azərbaycanın topraqlarının hamısında gözü vardır, tərörist adlandırmır? Amma qonşu ölkə, türkiyədə bir kürd təşkilatı terörist adlandırmağa daha çux maraq göstərir!! Əcəba bu marağın kökləri hardadır? İrqçılıqda mı yoxsa titiz bir siyasətin olmamasında?

Hətta iran islam cumhuriyəti, yəni xalqımızın asli düşmanıda yuxarıda işarət etdiyim ideolojiya düşgündür. Yəni iran rejimidə faşist yapısı vardır və umumiyətdə hər kəsi və ya hər təşkılatı eyni rəngə, yəni öz rənginə çevirməyə çalışır. İran islam cumhüriyətidə bu əsasa dayanır ki, “mənimlə deyirsənsə, düşmanımlasan”!

Amma Babək bey Çələbiyaniyə demək lazimdir ki, demokratik bir düşüncə açısından məsələləri yalnız ağ – və ya qara görmək kökündən yalnış və gerici bir düşüncədir. Çün ağ ilə qara arasında yüzlərcə rəng, yüzlərcə baxış, tutum, fikir və düşüncə olabilir, necə ki vardır. Onların biridə mənim fikirimdi. Mən pkk təşkilatını antidemokratik düşüncəyə dayanan faşisti bir yapı tanıram və çələbiyani bey, təəsüflə yuxarıda adın çəkdiyim anti demokratik məfkürəyə əsaslanaraq məni və birliki bu təşkılata dəstək verən tanıtdırır. Bu utanc verici ifadələrə şantajdan başqa bir məna vermək mümkn deyildir. Babək bey Çələbiyani bizə faşist yapıların şuarın tikrar edir və deyir ki, “terörist deməsəz, ittifaq yapabilmərik”! Çələbiyani bey burada özün həqiqət tərəzisi sanmaqdadır. Çələbiyanı beydən sormaq lazimdir ki, bu musahibəyə qədər siz 30 ildir Türk milli hərəkatını iç siyasətdə istıqlal şüarı ilə yalnış yönəltmişsiniz. Bu müsahibə də allaha şükür fedəral pilatformu real yol olmasın təsdiq edirsiniz. Bu təcrübeyə dayanaraq ümid edirəm bizdən, hərəkatımızın bölgəsəl siyasəti sahəsində 30 il daha yalnış siyasət apardığınıza inanmamızı gözləmiyəcəksiniz.

Amma yeri gəlmişkən, terörist sözünün işlətməmə səbəblərimin bir neçəsin məmnuniyətlə burada qıssaca izah edərəm. Əlbətdə ki səbəblərimin hamısını siyasət icabatı üçün yazmaq istəmirəm. O səbəblərdən birsi bir susyal demokrat olaraq şovinist iqtidarların ədəbiyatından istifadə etmədən  imtina edirəm. Bu mənim inandığım siyasi və etrazi fəlsəfəyə bağlı bir quraldır.

İkincisi, bir neçə il bundan əvvəl, A K P və Ərduğanın barış sürəcı adda bir pruses başladı və bir gecədə Abdullah Ocalan tərörist bir təşkilat başçısı durumundan “sayın Ocalana” adı deyişdi. Bu siyasət Türkiyə və AKP,nin siyasətlərinin icabatında gərçəkləşdi. İndi hissyata yaslanmadan Babək bey Çələbiyanidan sormaq lazimdir ki, tutalım bir neçə ay və ya neçə ildən sonra, Türkiyə hakimiyəti “tərörist pkk” ilə ginədə barış müzakirəsi başladı, necə  ki geçmişdə bu iş dəfələrcə baş vermişdir. Belə bir sürəc ginədə başlayırsa, sayın Çələbiyani bey və təmsil etdiyi təşkılat, Türkiyənin hakimiyəti təröristlərlə barış müzakirəsi üçün özlərinə düşmən tutacaqlar mı?! Yoxsa Çələbiyani bey məcburən bir gecədədə olmasa, bir iki həftə içındə tərörist Abdullə Ocalanı sayın Ocalan adlandıracaq?! Çün pkk Perspektivdə Türkiyə devlətinin problemidir və O məseləni çözməkdə hər yolu test edə bilir. Onda Çələbiyani beyin suratının rəngi ağaracaq mı, yoxsa qızaracaqdır? Elə buna görə də biz bir siyasətə oyuncaq olmaq istəmirik. Elə buna görədə öz analizimizə və ədəbiyatımıza dayanaraq hərəkət etməni düşünməliyik.

Çələbiyani beyə və onun kimi düşünənlərə ginədə sual verməliyəm ki, birgün Türkiyə iqtidarı, p k k ilə barış sürəci başlayırsa onların siyasi tutumu nə olacaq? Türkiyə hakimiyətinin  oyuncağı kimin davranacaqlar, yoxsa Türkiyənin qarşısında duracaqlar?!  Arxayınam ki Babək bey və ona mənsub olan təşkilat, mekaniki bir siyasi baxışa sahib olduğu üçün məsələnin mürəkkəb pərdələrinə düşünməmiş və ya düşünəbilməmişdir. Amma bizim qərarımız müstəqil bir siyasət ürətmək və o əsasda siyasət aparmalıyıq. Biz güney Azərbaycan və İranda yaşayan türk xalqının milli maraqları üçün çalışırıq və bu çalışmanı Türkiyə iqtidarının quyruğu olmaqla mümkün olmadığını bilirik. Biz Türkiyə siyasətlərinə xalqımızın milli maraqları pəncərəsindən baxmağı seçmişik və bizim bəəzi aktvistlərimiz kimi Türkiyəni güney Azərbaycana heç zaman üstün, nə görürük və nədə görmək istirik. Elə buna görə də bizim siyasətlərimiz Dirəniş təşkilatı ilə bölgə və dünya siyasətlərinə gəldikdə bir birindən ayrılır. Biz AKP kiritərləri ilə bölgə və dünya siyasətlərinə baxmırıq, bəlkə xalqımızın milli demokratik istək və tələblər əsasında bölgə və dünya siyasətı üzredə müstəqil bir istrateji izləyirik.

Adın çəkdiyimiz musahibənın bir başqa yönünədə diqqət çəkmək istərəm. İki saat Azərbaycan təşkilatlarının ittifaqları haqda danışılır və  Çələbiyanı bey bu sonuca varır ki güya ittfaqların bərpa olmamasının səbəbi pkk təşkılatını tərörist tanımamaqdır! Diqqət edin. İran siyasi cuğrafiyasında Güney Azərbaycanın siyasi təşkilatlarınin ittifaq qurması, Türkiyədə PKKya nə dəxli və nə əlaqəsi vardır?  Belədisə, nə üçün 10 istiqlalcı indiyə qədə quruplar bir ittifaq qurabilməyiblər? Bu 10 qurup həm, istiqlalçıdırlar, həm bütövçüdülər, həm millətçidilər (nasiyonalistdilər), həm pkkya terörist deyirlər, həm Ərdoğanın heyranlarıdırlar… nə üçün bunlar bir araya gələbilmirlər? İstiqlalçı təşkilatlar bir araya gəlməyincə, nə üçün bəzi istiqlalçı quruplar Birliklə, yeni bir Federalist təşkilatlar ittifaq qurmaya maraqlanırlar? Bu əcayib bir gəlişmə deyil mi?

Siyasət tarixinin harasında yazır ki təşkilatlar hamısı eyni düşünməsələr ittifaqlar yaranabilməz?

Sonuc budur ki, hərəkatımızın təşkilatların teori sahəsində güclənməyə  yox , bəlkə formalizmə yönəlik çaba və çalışmadadırlar. Eyni halda bu təşkilatlarda üzv olan fəaların düşüncə və davranış tərzləri demokratik qurallara uymamağı üçün bu qədər pərişan və zəifdirlər. Anti dəmokratik və şantajçı kültürün bu təşkilatlarda yayqın olması sayəsində buqədər dağınıq bir durumdadırlar. Çün kü Babək bey Çələbiyani bu musahibədə gözümüzə baxa baxa bir öküzü doğurmağa çalışdı.

Təşkilatlarımızın bir birinə yaxınlaşması əlbətdə ki xoş bır haldır. Amma bu təşkilatlar bildiyimiz qədər arzı elədyimiz təşkilatlar deyirlər. Arzı elədiyimiz təşkilatları dərin siyasi teorilərə dayanaraq və real bir istratejiyə əsaslanaraq xalqımızın marağın çəkməli və onayını almalıdır. Mən təəsüflə mocud təşkilatlarımızda bu kapasitəni hələ görəbilmirəm.

20200622
Adın çəkdiyim musahibənin linki