فرزانه قره‌حسنلو مشهدده‌کی وکیل آباد حبس‌خاناسی‌نین قرنطینه‌سینه کؤچورولوب
فرزانه قره‌حسنلونون وکیلی “محسن بیات” ۱۸ آذر ۱۴۰۳-ده امتداد خبر سایتینا مووکیلی‌نین سون دورومو ایله باغلی دئییب: “کئچن هفته جوما آخشامی گونو حبس‌خانا یئتکیلیلری هئچ بیر آچیقلاما وئرمه‌دن خانیم فرزانه قره‌حسنلویا جدی محدودیتلر تطبیق ائدیب و مشهدده‌کی وکیل آباد حبس‌خاناسی‌نین قرنطینه بؤلمه‌سینه کؤچوروب.
بو وکیلین سؤزلرینه گؤره، خانیم قره‌حسنلو ایله یاناشی، بو حبس‌خانانین اوچ سیاسی محبوسو دا قرنطینه‌یه کؤچورولوب و بونون سببی بو محبوسلارین هئچ بیرینه آچیقلانماییب.
محسن بیات آرتیریب کی، مشهدده‌کی وکیل آباد حبس‌خاناسی‌نین ۶-جی بندی‌نین سیاسی محبوسلاری خانیم قره‌حسنلو و داها اوچ محبوسون قرنطینه‌یه کؤچورولمه‌سینه اعتراض اولاراق آجلیق آکسییاسی کئچیرمک قرارینا گلیبلر.
بو وکیل فرزانه قره‌حسنلونون پرونده‌سینده‌کی سون دوروملا باغلی دا بونلاری دئییب: “جینایت- قانونونون ۴۷۴-جو ماده‌‌سینه ایستیناد ائده‌رک خانیم فرزانه قره‌حسنلونون پرونده‌سی اوزره یئنیدن باخیلما ایله باغلی باشووروموز تخمیناً ۵ آی اؤنجه عالی محکمه‌‌ده قئیده آلینیب، لاکین بو گونه قدر عالی محکمه‌‌ده بو باشوورویا باخیلما‌نین سونوجو اعلان اولونماییب”.
مشهدده‌کی وکیل آباد حبس‌خاناسی‌نین ۶-جی بؤلمه‌سینده حبسده اولان فرزانه قره‌حسنلو حیات یولداشی دوکتور حمید قره‌حسنلو ایله بیرلیکده ۱۴۰۱ اعتراضلاری زامانی حبس ائدیلیب. اتهاملارینی قبول ائتمسه‌لر ده، دفعه‌‌لرله گوناهسیز اولدوقلارینی بَیان ائتسه‌لر ده، “روح‌الله عجمیان” آدلی “بسیج قوه‌سی‌نین قتلینده ایشتیراک ائتمک” اتهامی ایله حبسه و سورگونه محکوم ائدیلیبلر.
خانیم قره‌حسنلو مشهد حبس‌خاناسیندا بئش ایل، جناب قره‌حسنلو ایسه یزد حبس‌خاناسیندا ۱۵ ایل سورگونده حبسه محکوم ائدیلیبلر.
