200 حؤکومت مامورو بهایی ائولرینی داغیتماق اوچون روشنکوه کندینه باسقین ائتدی
چارشنبه آخشامی، ۱۱ مرداد سحر ساعتلاریندان اعتباراً ۲۰۰ یاخین دؤولت مامورو آغیر قازما تجهیزاتی ایله مازنداران ایالتی‌نین روشنکوه کندینه داخیل اولوب و بو کندده‌کی بهایی ائولرینی داغیدیبلار.
دونیا بهایی ایجماسی‌نین سؤزچوسو سیمین فهندژ بو خبری اؤز توییتر صفحه‌‌‌سینده آچیقلاییب و یازیب کی، مامورلار کند ساکینلری‌نین موبیل تلفونلارینی دا اله کئچیریبلر کی، بو باره‌ده هئچ بیر بیلگی وئریلمه‌سین.
وئریلن بیلگیلره گؤره، مامورلار ساکینلرین گیریش-چیخیشی اوچون کند یوللارینی کسیرلر.
شاهیدلرین سؤزلرینه گؤره، بهاییلرین ائولرینی داغیتماق اوچون بو هوجومدا ۵۰ پولیس ماشینی، ایکی یوکلییجی و بیر اتوبوسدان ایستیفاده ائدیلیب.
بوندان اؤنجه پولیس امکداشلاری و گوونلیک اورقانلاری بعضی ائولری سؤکمک اوچون یئنیدن روشنکوه کندینه داخیل اولموش و ۳ ائوی سؤکدوکدن سونرا کند قادینلاری‌نین مانعه‌لری ایله اوزلشمیشلر، بو سببدن پولیس و گوونلیک امکداشلاری آراسیندا قادین مامورلارین اولماسی بو دفعه گؤزه چارپیردی.
مازنداران ایالتی‌نین چهاردانگه‌سی‌نین بیر حیصه‌‌‌سی اولان بو کند اونیللیکلر ایچینده بهاییلرین مسکنی اولوب، لاکین طبیعی ثروتلر ایداره‌سی اونلارین اکینچیلیک و تیکینتی ایشلری‌نین مئشه تورپاقلاری‌نین ایشغالی ایله باغلی اولدوغونو ادعا ائدیر.
ایراندا بهایی ائولری‌نین سؤکولمه‌سی میثلی گؤرونمه‌میش حادثه دئییل و ۱۳۹۹-جو ایلین آبانیندا اوخشار حادثه‌‌‌ده ساری‌نین ایول کندینده بیر بهایی ائوی داغیدیلیب.
بو کندده داغیدیلمیش ۵۰ ائو و ۲۷ بهایی مولکو ایمامین امری‌نین ایجرا قرارگاهی‌نین خئیرینه موصادیره اولونوب.
حؤکومت قوه‌لری‌نین روشنکوه کندینه هوجومو حؤکومتین بهایی وطنداشلارا قارشی ۹ مرداددا باشلایان و بیر نئچه بهایی وطنداشین حبس اولوندوغو سون هوجومونون داوامیدیر.
#ایران_خبرلری #بهایی #دینی_آزلیقلار
