لطیف حسنی نین حبس جزاسی سونا چاتیدی !

سون گونلرده لطیف بئی حسنی نین حبس سوره سینین سونا چاتماسی و اونون زیندان دا بوراخیلماسی تورک توپلوموندا و میللی مدنی آکتیویست لر چئوره سینده سئوینجه و شادلیغا سبب اولموشدور.

لطیف بئی حسنی باشقا دؤرد سیلاح داشی ایله برابر، 1391جی ایلده، یئنی گاموهون تشکیلی اوچون، یارامازجا و قانونسوز بیر بیچیم ده هر بیری 9 ایل حبس جزاسینا محکوم ائدیلمیشدیرلر. لطیف بئ حسنی ایندی اوزون ایل لر حبس چکندن سونرا آیاغینی زیندان ائشیک ده یئره باسدی و بیر قیسسا ویدئو کلیپ واسیطه سی ایله دوستلارینا و اونو سئونلره زیندان جزاسینین سونا چاتماسینین خبرین وئردی.

لطیف بئی حسنی نین موباریزه تاریخی، اونون ایران و گونئی آزربایجان دا تورک خالقی نین حق و آزادلیق لاری اوغوروندان آپاردیغی چالیشمالارینا بیر آیدین ثبوت دور. لطیف بئی حسنی حتتا زیندان دا اولان عرفه ده ده چالیشمادان دورمادی و تورک میللی دئموکراتیک حرکاتی نین نبضینی الده توتارکن ضرورت لره دایاناراق یازیلاری ایله میللی موباریزه یه قاتقی ساغلامیشدیر.

آزربایجان دئموکراتیک بیرلییی – بیرلیک، لطیف بئی حسنی نین حبسی نین سونا چاتماسینی خوش قارشیلایرکن، حبس حکمونون زمانی نین سونا چاتماسین لطیف بئی حسنی نین حقیقتا آزاد اولماسی کیمی ورقولامیر. چونکو ایران ایسلام جمهوریتینده لطیف بئی حسنی بالاجا بیر زیندان دان، یعنی حبس خانه دن، گئنیش بیر زیندانا یعنی ایران سیاسی جغرافیاسینا ترانسفر ائدیلمیشدیر.

ائله بونا گؤره ده آزربایجان دئموکراتیک بیرلییی – بیرلیک، اؤز موباریزه سینده، قیسسا وادی ده محبوس لارین آزادلیغینی طلب ائدیرسه، اوزون وادی ده ایران دا یاشایان خالق لار و اؤزللیکله تورک خالقی نین، ایران رژیمی نین اسارتیندن قورتاریلماسی اوچون موباریزه نی داها گئنیش واسیطه ده دوام ائده جکدیر.

یاشاسین تورک خالقی

یاشاسین آزربایجان

آزربایجان دئموکراتیک بیرلییی – بیرلیک 20210117