۹ شهریور صمد بهرنگی نین مشکوک بیر حادثه ده فوت اولان گونو مناسبتیله صمددن بیر خاطره -ح . احمدزاده

صمدین بؤیوک قارداشی اسد بهرنگی نین ده مستقل ائوی وار ایدی اما اودا بو ایشلره قاریشماز ایدی.

صمدین بالا قارداشی «جعفر» ، و صمدین باجسی لاری و آتاسی عزت آغا و آناسی بو بالاجا سلیقه لی ائوده یاشیاردیلار‌ . عزت آغادا صمدین بو دوست بازلیغینی و سیاسی ایشلرینی سئومز ایدی . صمد بیر یئرده یازیر :« بابام دییر : اگر ایرانی ، ایرانلیلار آراسیندا عدالت ایله بؤلوشدوره لر ، سنه بوندان آرتیق یئتیشمز».

او اوزدن صمد تبریزه گلر کن مطلقا بیزیم ائوه گلردی. صمد بیر چوخ زامان آیلیغین آلارکن ، بیر نئچه اوشاق چکمه سی آلیب ، گتیریب ننه یه وئره ر دی کی بیزیم محلله نین یوخسول اوشاق لارینا پایلانسین .

او چکمه لردن بیر نئچه سیده ، ننه نین کندی نین یوخسول اوشاقلاری «تیلیم خان» کندینده پایلانمیشدیر.

صمد فوت اولدقدان سونرا او جریان فکری ، علیرضا نابدل و عیباد و مجید آغا ایروانی و کاظیم سعادتی ، ننه نین حیاطینی ساتدیلار و یاردیملاشیب بیر تراختور آلیب ، تیلیم خان کندینده اؤز فیکیرلرینی یایماقا چابا گؤستردیلر و هشتری نین «تیلیم خان» کندیندن باشلادیلار. او زامان علیرضا نابدل ده، دده سی ائوینده قالاردی ، یعنی ۲۰ و شاید ۲۱ یاشی وار ایدی و یا یوخ ایدی . اولاریندا عائله لری چوخ مقتدر و حساب کیتابیلی بیر عائله ایدی . یعنی باباسی رییس اداره ثبت و آناسی فرهنگی و فرانسه دیلی نین عالیمی و او زامان اولارین ائولرینده «پیانو» وار ایدی . باشقا اوشاقلاردا عینا ایله ایدیلر. یعنی اوشاقلارین ایچینده مستقل ائوی اولان یالنیز بیزیم ائومیز ایدی . یعنی او زامان تکجه ننه نین ائوی ایدی کی بوتون اوشاقلارین امید ائوی ایدی .

صمد فوت اولان زامانلارا یاخین ، کاظیم سعادتی ده هله قونقا باشیندا « کوره باشی» محلله سینده مستاجر ایدی . من آلتینجی کلاسدا متفرقه اوخویاندا ، مطبعه ده ایشله دیغیم اوچون مدرسه یه گئده بیلمه دیم ، صمد بهرنگی و کاظیم سعادتی نین مصلحتی اوزره ، او ایل توفارقاندا( آذرشهرده ) من و نوروز داداشیم ششم ابتدایی نی متفرقه امتحان وئرمک اوچون توفارقاندا یازیلدیم . اما ششم ابتدایی درسی نی ، کاظیم سعادتی نین ائوینده ، روح انگیز عباس زاده دهقانی دن آلمیشام . بعضا ده روح انگیز ایله کاظیم بیزیم ائوه گلیب و بیزه درس وئرردیلر. اصلینده او زامان من هرگون کاظم سعادتی نین ائوینه گئدیب و روح انگیز دهقانی نین محضرینده ششم ابتدایی کتابلارینی اوخوموشام . او اوزدن روح انگیز دهقانی نین معنوی حاقی منیم بوینوندا قورتولماز دیر‌. آنجاق شهریور آیی نین ایلک گونلرینده یئنه اوشاقلار ایله داغدا ایدیق . صمد اورادا سؤیله دی کی هفته اوچو ( دوشنبه گونو) آراز قیراغینا گئدجکدی . چوخ سئوینیردی . سانکی تویا گئدن کیمی . او گون داغدا ، صمد تماما آرازدان دانیشدی ، علیرضا نابدل ده آراز آراز شعرینی گؤزل سسی ایله اوخودو . اما کیم نه بیلیردی کی بو گئدیش صمدین سون گونو اولاجاقدی .

نهایت آیریلیق گونو گلدی چاتدی و هفته سونو صمدین قره خبری آذربایجانین بوتون شهرلرینی قاپسامیشدی. گل گئدک داش بولاغا سویو سرخوش بولاغا بیرین سن دئه ، بیرین من تؤکک قان یاش بولاغا شهریور آینین دوقوزنجو گونو صمدین اؤلوم گونو آنلاشیلیر . نهایت تبریزین چرنداب محلله سینده ، قانلی مسجدده ، صمدین تعزیه مراسیمی کئچیریلدی . اما اوشاقلار ، بیله بیلمیه بو ایتگینی ، ساواک و شاهین حسابینا ویریب و او گوندن اعتبارا ، مبارزه قهرآمیزین تمل داشی آتیلدی . آنجاق کاظیم سعادتی نین ائوی بو حرکتین باشلانقیج نقطه سی اولماسی کسین دیر. مرحوم کاظیم سعادتی نین، باباسی نین ائوی ده ، همان کوره باشی محلله سینده ایدی . اصلینده کاظیم سعادتی مرند طرفیندن ایدی . سونرالار کاظم سعادتی، بو ائوی قونقا باشیندان راه آهنه طرف گئدنده کوره باشی محلله سینده ( شهریار) محلله سینده ایدی آلدی .( بیر قورو یئر ایدی آلدی) و بیزلر هامیلیقجا ، او ائوی بنا ایله مکده ، فیزیکی و احیانا الیمزده اولان آز پولدا اولسایدی اورادا بیر دوز قاتدیق و اورتاق لیق قاتدیق. اصلینده او زامانلار اوشاقلار هرنقدر پوللاری اولسایدی ، مجید آغا ایروانی نیه امانت وئره ردیلر ، او اوزدن عیباد ، نوروز ومنده احیانا آز پولوموزدا اولسایدی مجیدآغایا امانت وئردیق. یعنی بانک لارا ویرمزدیک. او اوزدن هرکسینده پول نیازی اولسایدی ، مجید آغا ایروانی دن آلاردی . بو ائو باشا گلدیکدن سرنرا ، داها تبریز شاخه سینین مبارزه لرینین اصلی یئری اولدو . اصلینده تام بو ائوده دیر کی گله جگین بیر چوخ سیاسی ایشلری چوخ گیزلین اولاراق دانیشیلیردی و اجرایا قویولوردو. و مبارزه نین ریشه سی باسیلیردی. یعنی صمد بهرنگی مبارزه مسلحانه نین ایراندا (آذربایجان شاخه سی نین) تمل داشی بو ائوده باسیلمیشدیر . او ائوده اساسی جلسه اولاندا ، بهروز دهقانی ، کاظیم سعادتی ، عیباد احمدزاده ، علیرضا نابدل ، مناف فلکی تبریزی او اوتاقدا توپلانیپ ، و دانیشاردیلار. ح . احمدزاده