۶ تیکان تپه‌لی ایشچی اورمیه مرکزی حبس‌خاناسیندا بلیرسیز دورومدا ساخلانیلیر
باتی آذربایجانین تیکان تپه (تکاب) شهرینده یئرلشن آغدره‌نین ایکی قیزیل و داش معدنی‌نین ایشچیلریندن آلتیسی گوونلیک اتهامی ایله اورمیه‌نین مرکزی حبس‌خاناسیندادیر.
بو ایشچیلردن ۲۶-سی سون هفته‌لرده ۶۰۰ میلیون تومنلیک گیروولا آزادلیغا بوراخیلسا دا، اونلاردان ۶-سی هله ده اورمیه حبس‌خاناسیندا حبسده‌دیر.
بو محبوسلارین محکمه سورجی‌نین ایلکین مرحله‌‌‌سینده اتهاملاری “توپلومسال آسایشی پوزما”، “اؤلکه‌نین ایچ گونلیگینه قارشی حرکت” و “آدام اوغورلوغو” آدلاندیریلیب.
امک قایناقلاریندان الده ائتدیگیمیز بیلگیلره گؤره، اؤتن آی کئچیریلن اعتراض آکسییاسیندا ایشتیراک ائدن آغدره‌دن اولان ایشچیلرین حاقی اؤده‌نیلمه‌ییب، حبسدن گیروو قارشیلیغیندا آزادلیغا چیخان بیر سیرا ایشچیلرین ده حاقی اؤده‌نیلمه‌ییب و اونلارا ایشله‌مه‌یه ایجازه وئریلمیر.
قئید ائدک کی، ۹ مرداد ۱۴۰۲-ده باتی آذربایجانین تیکان‌تپه آغدره کندینده ۳۲ نفر معدن ایشچیسی بو بؤلگه‌نین “یئرلی اینسانلاری‌نین ایشه گؤتورولمه‌سی” طلبی ایله معدنین قارشیسینا توپلاشیب و نهایت ، پولیسین موداخیله‌سی ایله آتیشما و یارالانمالارلا سونوجلانان موناقیشه باش وئریب و ایکی نفر توتولاراق حبس‌خانایا گؤندریلیب.
آغدره معدنلرینده چالیشان ایشچیلرین توپلاشماسی و اعتراضی قارشیدورمالارا، ساخلانما، حبسلره، جریمه‌لره و قامچیلانمالارا سبب اولموشدو.
