۳۱ دسامبر -دونیا آزربایجان تورکلرینین بیرلیک گونو قوتلو اولسون
۳۱ دسامبر، دونیا آذربایجانلیلارینین هم‌رای‌لیگی (دایانیشما) گونو، آذربایجان میلتی بیرلیک شعاری‌نین سمبولیک گونودور.
بو بایرام آیری-آیری اؤلکه‌لرده یاشایان آذربایجان‌لی‌لارلا ایلیشکیلر قورماق، اونلار آراسیندا بیرلیک و دایانیشما یاراتماق اوچون اؤنملی رول اویناییر.
آذربایجان‌لیلار مین ایللیکلر بویو اؤزلرینین تاریخی تورپاغی اولان آذربایجان اراضی‌سین‌ده یاشایاراق، بشر مدنیتینه بؤیوک قاتقیلار وئریبلر. ساواشلار، اینقیلابلار، حربی چاتیشمالار، دونیادا گئدن اجتماعی-سیاسی پروسه‌لر نتیجه‌سین‌ده آذربایجان پارچالانیب، آذربایجان‌لیلارین بیر قیسمی یورد-یووالارین‌دان دیدرگین سالینیب، سورگونلره معروض قالیب، ایش تاپماق، تحصیل آلماق مقصدی ایله دوغما وطنی ترک ائد‌رک باشقا اؤلکه‌لرده مسکونلاشیبلار. حاضردا دونیانین هر یئرین‌ده آذربایجان‌لیلار یاشاییرلار.
اوزون بیر دؤور وطن‌ده یاشایان آذربایجان‌لیلار باشقا اؤلکه‌لرده مسکونلاشمیش هم وطنلری ایله گؤروشمک، ایلیشکیلر یاراتماق ایمکانین‌دان محروم اولوبلار. سووئت دؤولتینین قاداغالاری قارداشین قارداشلا گؤروشمه‌سینه ایمکان وئرمیردی. سووئت رژیمینین ضعیفله‌مه‌یه باشلادیغی ۱۹۸۰.جی ایللرین سونلارین‌دا آذربایجان خالقی اؤز هم وطنلری ایله ایلیشکیلر یاراتماق اوچون چابالارینی آرتیردی.
۱۹۹۱.جی ایل، دسامبرین ۱۶سیندا ناخچیوان اؤزارک جمهوریتینین عالی مجلیسی ایران و تورکیه ایله سرحدده تیکان‌لی مفتیللرین سؤکولدویو گونو یعنی، ۳۱ دسامبری، دونیا آذربایجانلیلارینین دایانیشما گونو اعلان ائتدی. بوندان سونرا بایرامین بوتون اؤلکه‌ده رسمی قوتلانما‌سی باره‌ده آذربایجان جمهوریتینین عالی شوراسیندا قرار قبول اولوندو.
دونیا آذربایجانلیلارینین هم‌رای‌لیک گونو قوتلو اولسون!
