آذربایجان تاریخینده تورک میللتینه۲۱ آذر هم غرور وئرن و هم اورکلری یاندیران اونودولماز بیر خاطیره کیمی نسیلدن نسیله یاشایاجاقدیر. زومار آینین اوچو ۱۲۹۹ اینجی ایل انگلیس واسطه سیله باش وئرن قارا کودتا و انتقال قدرتی آذربایجان و ممالک محروسه نین بوتون غیر فارس خالقلارینا مخصوصا اکثریت اولان تورک میللتینه فرهنگی باخیمدان مدنی بیر سوی قیریم دئسک هئچده یانیلمامیشیق. بوتون بونلارا قارشی ۱۳۲۴ نجو ایل آذربایجان دمکرات حزبی ویا خود دمکرات فیرقه سی آذربایجان تورک میللتینه و دیگر غیر فارس میللتلره اولونان ظولمه؛ اهانته و عدالتسیزلیگه قارشی تبریزده تشکیل تاپمیشدی.
۱۳۲۴ زومار(شهریور)آیندا فرقه اوز تشکیل تاماق مانیفستینه بیانییه وئریب؛ آذربایجانین خود مختارلیقین اعلان ائدرکن میللی حکومت تشکیل وئرمه یه باشلامیشدی. او زامان ایرانین ۶۰ الی ۷۰ فایزی تورک اولدوغونا گوره بوتون تورک ریجاللاری ایران آدلانان اولکه نی تورک یوردو یعنی آذربایجان دوشونه رک؛ آنا یاسادا اولان ایالت ولایت ماده سینه آرخالانیب؛ ایران چارچوواسیندا بیر خود مختار جمهوریت یاراتماقی هئچده قانونا هایقرماق بیلمیردیلر.دئمک فیرقه پارتییاسی آذربایجانا خود مختارلیق ایرانا آزادلیق دوشونجه سیله یارانمیشدی. آنجاق بو دوشونجه نی غیر تورک و مخصوصا غیر آذربایجانلیلار دوشونه بیلمه دیلر! بلکه انگلیس قوران پهلوی رژیمینه قوشولوب؛ آذربایجانا یعنی عدالت و آزادلیق جارچیسینا قارشی دوردولار.
۱۳۲۴ نجو ایل تدقیقات اوچون آذربایجانا گلن ویلیلم داگلاس(امریکالی قاضی) بیر گونده ایکی روایت آدلی یازیلاریندا یازیر فیرقه پارتییاسی قاچان مالیکلرین اکین یئرلرین رعیتلر آراسیندا بولدو؛ رشوته قارشی آغیر جزالار قئیده آلدی؛ هر شئی ارزان ائله تدیردی؛ یعنی اتین کیلوسون ۲۵ قیراندان ۱۸ قیرانا یئندیردی؛ رشوتی اولکه یه خیانت آدلاندیردی؛ سون درجه گووه ن( امنیت) یاراتدی. جامعه نین ساوادسیزلیق چاغیندا تبریز دانشگاهین آچدی؛ بوتون کندلرده شهرلرده مدرسه آچیب درس اوخوماغی اجباری ائلتدیردی؛ بئکارچیلیق قانونو قویدو(یعنی بئکارلارا حقوق وئرمک قانونو)؛ یوللار چکدیردی؛ خسته خانالار؛ بلدیه لر دوزلتدیردی… . ویلیام داگلاس آمریکا دولتینه یازیر آذربایجان ائله سرعتده انکیشاف ائدیر بو حکومت اگر اون ایل داوام ائتسه دونیادا علم تئکنولوژو ساحه سینده بیرینجی صفده یئر تاپاجاقدیر!
آنجاقکی اجنبی قوللوقچوسو اولان حکومت؛ شئونیست اولان پان ایرانیستلر؛ مانقورتلار؛ هندیزاده لر؛ مالیکلر؛ جهل و خرافات عامیللری؛ اراذیل اوباش؛ انگلیس سیلاحیلا. آمریکا ژنرالینین کاماندالیقیلا… ال اله وئریب؛ بیر ایلدن آرتیق عومرو اولمئیان میللی دولتی؛ یعنی میللی دولت تشکیل وئرن آذربایجانی قانا بلشدیردیلر. انگلیسه باغلی اولان رسانه لر؛ بیر سیرا دین خادمی پالتاری گئیه نلر؛ بئیگلر؛ مالیکلر و اونلارین قوللوقچولاری؛ ال بیر اولوب قانلی قدداره لی بیر سوی قیریما ال ویردیلار! اوز جنایتلرین توجیه ائتسینلر دئیه میلی حکومتی روس کومونیستینه باغلی اولماقلا اتهام ائتدیلر و حله ده وار ائدیرلر! ۵۰ میندن آرتیق آدام قتل و عام اولدو ائویندن ائلیندن در بدر اولدو! بوتون ائولر تفتیش اولدو تورکو کیتابلاری قالاق قالاق توپلایب؛ تونقال ائدیب؛ یاندیردیلار! اوتانمادان بو قانلی قدداره لی جناینین آدین روز نجات آذربایجان قویدولار! بو جنایته بولاشان پهلوی رژیمی تاریخه قوشولدو.
آنجاقکی اسلام بایراغیلا مئیدانا گلن یئنی حکومت بیر یولدا اولسا اونلاری قینامادی! سانکی یالنیز شکیللر ده یشیلمیشدی! و یئنه پهلوی رژیمینین یولو ایده سی داوام ائله دی! بلی ۷۸ ایل فیرقه حکومتیندن و آذربایجان سوی قیریمیندان کئچیر هله ده وار آذربایجان و دیگر غیر فارس میللتلر آنا دیلده درس اوخوماقدان محروم دولار! میللی فعاللار حبسلره؛ اشکنجییه؛ یاراماز اتهاملارا توش گلیرلر! و نه یازیق کی بو نژادپرستلیک بو گونه دک آذربایجانا حتی کل ایرانا آغیر ضربه لر ویریب و بوتون اینکیشاف یولون باغلایبدیر! بو قونودا میللی اویانیش اولماسین دئیه مختلف بحرانسازلیقلار یارادیرلار؛ میللی فعاللارا یالان یالان اتهاملار ویریرلار”مدام ساواش طبلی چالماقلا ذهنلری چاشدیریرلار؛ عمدی تورم؛ باهالیق سالماق …و مینلرجه حیله ائتمکله میلتین اینانجینادا لطمه ویردیلار!
آذربایجان و تورک کلمه سیندن ائله قورخویا دوشوبلر هر ایشی بوراخیب یالنیز آنتی تورک پروژه سینی ایره لی سورورلر! آنجاقکی نقدر قاباغا گئتدیکلرینی دوشونسه لرده داها آرتیق؛ داهادا چوخ ایچ اوزلرین آچیب؛ مسلمان یوخ بلکه بیر نژادپرست اولدوقلارینی بروزه وئریرلر. نژاد پرستلیک بوتون شعورلارین اللریندا آلیب گوزلرینی کور ائتمکله میللی اویانیشی؛ اوزلرینه دوشمان بئجرتمه یی؛ مملکتی اوچوروما سوروتله مه یی هئچ دوشونه بیلمیرلر! اسلام شعاری وئریلر بیر حالدا کی مسلمانی سوی قیریم ائدن داشناکلارا قوجاق آچیرلار! و مینلرجه بئیله چیرکین اویونلارا بولاشیرلار! آنجاقکی بوتون بونلارا باخمئیاراق میللی شعور گونو گوندن چوخالیر و چوخ کئچمه دن بو میللت بوتون ایسته دیکلرینه چاتماغا یاخینلاشیرلار. یاشاسین آذربایجان؛ یاشاسین میللی حکومت؛ یاساسین عدالت؛
آزادلیق. ۱۳”۹”۱۴۰۳. آذردخت
