۲۰ یاشلی قیز بیر ملت وکیلی‌نین اوچونجو حیات یولداشی اولوب
دیدبان ایران خبر سایتی یازیر کی، ۱۱-جی دؤنمده مجلیسده اولان ملت وکیللردن بیری‌نین بیرینجی و ایکینجی حیات یولداشلاری بو ملت وکیلی‌نین عینی زاماندا اوچونجو حیات یولداشی دا اولدوغو اوچون اونلارین دوروملارینین بللی ائدیلمه‌سینی ایسته‌ییبلر.
دیدبان ایران صبح ما سایتینا ایستناداً بیلدیریب کی، بو ملت وکیلی‌نین بیرینجی و ایکینجی حیات یولداشی اؤز دوروملارینی بللی ائتمک ایسته‌ییرلر، چونکی بو ملت وکیلی بو یاخینلاردا ۲۰ یاشلی قیزلا ائوله‌نیب.
بو خبرده بو ملت وکیلی‌نین سون ائولیلیگینده ۲۰ یاشلی قزوینلی قیزی حیات یولداشی سئچیب، بو قیز اونون بیلیم یوردوندا اؤیرنجیسی اولوب.
مجلیسین حساس کمیسیونلاریندان بیری‌نین بو عضوونون بیرینجی و ایکینجی حیات یولداشلاری مجلیسین مسوول شخصلریندن حاق و حوقوقلارینی ایزله‌میی خواهش ائدیبلر کی، حیات یولداشی‌نین مادی و معنوی پوزونتولاری ایله باغلی پرونده مجلیسین نظارت شوراسینا وئریلسین.
ایران مئدیاسی‌نین بیلگیلرینه گؤره، بو ملت وکیلی‌نین شهر ری‌ده قائم شهر پاساژیندا ۱۷۰ ماغازاسی وار و عبدالعظیم حسنی حرمی‌نین یاخینلیغیندا، باغ طوطی کوچه‌سینده حووض، ساونا و جاکوزی اولان اوچ مرتبه‌لی ائوده یاشاییر.
اصلاحاتچیلارا یاخین اولان دیدبان ایران اینترنت سایتی بو ملت وکیلی‌نی (م-الف-ب) آدلاندیریب.
