۱۵ یاشلی رامهرمزلی قیزین اوچ خسته‌یه اورقان باغیشی
بیین اؤلوموندن سونرا “ویدا بدران” آدلی رامهرمزلی ۱۵ یاشلی بیر قیز، اورقانلارینی باغیشلایاراق اوچ خسته‌نین یاشاماسینا ایمکان ساغلادی.
ویدا بدران، ۱۷ آبان ۱۳۹۹ شنبه گونو بیین اؤلومو سببییله حیاتینی ایتیردی.
اهواز جندی‌شاپور بیلیم‌یوردو اورقان نقلی کووردیناسییون اوفیسی‌نین معاونی ایسنا خبر آژانسینا وئردیگی موصاحیبه‌ده دئدی: “حکیملرین بیین اؤلومونون باش وئردیگینی تصدیق ائتمه‌لریندن سونرا، عائله‌‌‌نین راضیلیغی ایله ۱۷ آبان شنبه گونو آخشام، بو خوزیستانلی یئنی‌یئتمه‌نین اورقانلاری احتیاجی اولان اوچ خسته‌یه باغیشلاندی.”
بو معلوماتا گؤره، بو یئنی‌یئتمه قیزین اورقان باغیشی اهوازداکی گلستان خسته‌خاناسی‌نین اورقان نقلی عملیاتی اوتاغیندا ائدیلدی و ایکی بؤیرگی و قاراجییری احتیاجی اولان اوچ خسته‌یه باغیشلاندی.
