۱۵ بهایی قادین اصفهان تئمییز محکمه‌‌سی طرفیندن محکوم ائدیلیب
اصفهان ایالتی‌نین تئمییز محکمه‌‌سی ۱۳ بهایی قادینین ایلکین حؤکمونو تصدیق ائده‌رک، اونلارین هر بیرینه حبس، جریمه، سوسیال حوقوقلاردان محروم ائتمه و اؤلکه‌دن چیخیش قاداغاسی جزاسی وئریب. ایکی نفرین ایسه حبس جزاسی آرادان قالدیریلیب آنجاق اک جزالاری تصدیقله‌ییب.
وئریلن حؤکمه اساساً، مژگان پورشفیع، نسرین خادمی، آزیتا رضوانی خواه، شعله آشوری، بشری مطهر، سارا شکیب، رویا آزادخوش، نوشین همت، شورانگیز بهامین، ساناز راسته، مریم خورسندی، فرخنده رضوان‌پی و فیروزه راستی نژاد هر بیری ۵ ایل حبس، ۵۰ میلیون تومن جریمه و اک جزا اولاراق بئش ایل سوسیال حوقوقلاریندان محروم ائدیلیب و ایکی ایل اؤلکه‌دن چیخیشلارینا قاداغا قویولوب.
آیریجا، محکمه سمیرا شکیب و مژده بهامینی ۵۰ میلیون تومن جریمه‌یه محکوم ائدیب.
بو ۱۵ بهایی وطنداش بو ایلین اردیبهشت آییندا اصفهان اینقیلاب محکمه‌‌سی‌نین ۱-جی شؤبه‌سینده “ایسلام شریعتینه ضد اولان آزغین ائیتیم فعالیتلرینده ایشتیراک ائتمک” اتهامی ایله ۷۵ ایل حبس جزاسی و جریمه، سوسیال حوقوقلاردان محروم ائتمه و اؤلکه‌دن چیخیش قاداغاسی جزاسی وئریلیب.
بو ۱۵ بهایی قادینین محکوم ائدیلمه‌سی آوروپا پارلمانی‌نین بهاییلره، اؤزللیکله ده بهایی قادینلارینا قارشی باسقیلاری پیسله‌ین قراری قبول ائدرکن باش وئردی.
بوندان اؤنجه تشکیلاتین ۱۸ اوزمانی و موخبیری مکتوبلا ایراندان بهایی قادینلارا تضییق و تعقیبلره سون قویماسینی ایسته‌ییب.
اونلارین فیکرینجه، ایراندا بهایی قادینلار هم قادین اولدوقلارینا، هم ده بهایی اولدوقلارینا گؤره ایکی‌قات تضییقه معروض قالیرلار.
