یوزدن چوخ اتومبیلین اؤزل اولاراق مجلیس عضولرینه وئریلمه‌سی تصدیق ائدیلدی
۱۰ اردیبهشت‌ده صمت ناظری رضا فاطمی امینین استیضاح اولونماسینا سبب اولان مجلیس عضولرینه روشوت وئرمه‌سی ایله باغلی موباحیثه‌لی آچیقلامادان سونرا ابراهیم رئیسی‌نین اؤزل موفتیشی قرعه چکیلمه‌دن بیر سیرا ملت وکیلینه یوزدن چوخ اتومبیلین وئریلدیگینی تصدیقله‌ییب. او ایران‌خودرو شرکتی‌نین مودیری‌نین اسفند آییندا ایشدن چیخاریلماسینین بوندان اؤتورو اولدوغونو بیلدیریب.
دونن چارشنبه گونو، ۱۳ اردیبهشت جمهورباشقانی‌نین اؤزل موفتیشی حسن درویشیان حؤکومتین ایجلاسی چرچیوه‌سینده کئچیردیگی مطبوعات کونفرانسیندا بیلدیریب: سوو اتومبیللرین تداروکو اوچون آنلاشما ۱۴۰۰-جو ایلین یاییندا و ابراهیم رئیسی‌نین حؤکومت کابینه‌سی‌نین توپلانماسیندان اؤنجه ایمضالانیب و او زامانکی ناظر رضا قاطمی امین اونون باش وئرمه‌سی و یا حجمی باره‌ده هئچ بیر بیلگیسی یوخ ایدی و بیر سیرا نوماینده‌‌لر ده بوندان خبرسیز ایدی.
درویشیان آرتیردی: ۱۳-جو حؤکومتین کابینه‌سی توپلانمادان اؤنجه رادین مبین غرب آدلی هئچ بیر وارلیغی اولمایان بیر شرکت ایله اتومبیل اتومبیل آراسیندا آنلاشما باغلانیب و الده ائدیلن سندلره گؤره، یئتکیلی شخصلرین بیری‌نین مجلیسده یوزدن چوخ اتومبیلی فابریک قیمتینه و قرعه اولمادان ملت وکیللرینه وئریلمه‌سی آدی‌چکیلن صوری شرکتین واسطه‌‌‌چیلیگی اساسیندا حیاتا کئچیریلیب.
تبریزین مجلیسده‌کی ملت وکیلی اؤتن هفته ادعا ائدیب کی، صمت ناظرلیگی بو ناظرلیگین ناظری‌نین استیضاحینی گئری گؤتورمک اوچون ملت وکیللرینه ۷۵ اتومبیل باغیشلاییب.
مجلیسین صنایع و معدن کمیسیونونون عضوو احمد رسولی‌نژاد دا اؤتن هفته چارشنبه گونو اعلان ائدیب: فاطمی امین استیضاحیندان اؤنجه‌کی گئجه صمت ناظرلیگی‌نین سمیه کوچه‌سینده‌کی بیناسیندا ملت وکیللرینه رشوت اولاراق ۷۰-۷۵ دنه اتومبیل وئریلیب.
صنایع، معدن و تیجارت (صمت) ناظری رضا فاطمی امین استیضاحی زامانی مجلیسده‌کی بعضی ملت وکیللری بیلدیریبلر کی، ابراهیم رئیسی و حتی صمت ناظری‌نین اتومبیل مافیاسی‌نین مؤوجودلوغونو تصدیقله‌ییبلر.
گؤرونور، رئیسی‌نین اؤزل موفتیشی بو ادعا ایله صمت ناظری‌نین استیضاحینی شوبهه آلتینا آلماق ایسته‌ییر و مسئله‌نی ابراهیم رئیسی حؤکومتی‌نین قورولماسیندان اؤنجه ایله علاقه‌‌‌لندیریب. لاکین ایران خودرونون او زامانکی باش مودیری گؤرودن آلیندیغی زامان اونون اؤزل شرطلرله بیر سیرا دؤولت ایشچیلرینه وئردیگی دئییلیردی آنجاق ملت وکیللریندن سؤز آچیلمامیشدی.
