یاللی رقصی غربی آزربایجان آدینا ثبت اولوندو
غربی آزربایجان کولتورل میراث ایداره سینین معاونی، حسن سپهرفر، “یاللی” و یا “جلمان” رقصینی غربی آزربایجان ایالتی نین سوموت اولمایان کولتورل میراثی اولاراق تانیتدیردی.
حسن سپهرفر خبرچیلره دئدی: قوزئ آزربایجان باکیا یاخین قوبستان داش قازیلاریندا گؤزوکن بو تاریخی رقص، ان یایقین و ائتنیک رقص دیر و هله ده اردبیل، غربی و شرقی آزربایجان‌دا یاللی و جلمان آدی ایله تانینیر. او آرتیردی : ” هارمونی ایچینده اولان حرکتلر و رقصلر بیر مللتین کؤک ، کولتور و فولکلوروندان نشات تاپیر. شیرخانی، اکملی، تک آیاق ایکی(جوت) اوچ آیاق، توولاما، یان باسدی،تن زره، کؤچری و یارپدا ، او دسته رقصلردن دیر کی غربی آزربایجانین بیر چوخ شهرینده و مراسیملرده خالق طرفینده اوینانیر “.
یاللی رقصینین غربی آزربایجان‌دا سوموت اولمایان کولتورل میراث اولاراق ثبت اولونماسیلا بیرگه توپلام بو ایالت ده ۶۰ سوموت اولمایان کولتورل میراث تثبیت اولوندو.
