یئنی ایلده ارزاق قیمتینده یوزده ۳۰ و حبوبات قیمتینده یوزده ۵۰ آرتیم اولوب
تهران ایالتی‌نین ارزاق بانکئرلری بیرلیگی‌نین رئیسی انتخاب ایله موصاحیبه‌سینده بیلدیریب کی، سون ایکی هفته‌ده ارزاق قیمتینده یوزده ۳۰ آرتیم موشاهیده ائتمیشیک.
رضا کنگری وورغولاییب کی، بعضی ماللاردا یوزده ۳۰ آرتیملا یاناشی، بیر سیرا ماللار دا بازاردا قیتلیقلا اوزلشیر و هر کس ایسته‌دیگی قیمت ایله ساتیر.
مثلا، حبوباتدا ارز پروبلئمی وار و ایدخالچیلار طرفیندن پایلانماماسی یوزده ۵۰ قیمت آرتیمینا سبب اولوب. ایران دویوسو سون واختلار باهالاشیب، چونکی خاریجدن دویو ایدخالینا بیر سیرا محدودیتلر قویوبلار و دئییبلر کی، ایدخال ائتمک ایسته‌ییرسینیزسه، هر ایکی کیلو ایدخالا بیر کیلو ایران دویوسو آلمالیسینیز.
بو ایلین باشیندان ارز (دلار، یورو و….) قیمتی‌نین قالخماسی ایله برابر، ضروری ماده‌‌لردن ساییلان ارزاق محصوللاری‌نین دا قیمتی قالخیب.
مرکزی بانکین رئیسی و حؤکومت سؤزچوسو کیمی بعضی دؤولت یئتکیلیلری ارزین باهالاشماسی‌نین اساس ماللارا و خالقین سوفره‌سینه هئچ بیر ائتکیسی‌نین اولمادیغینی ایصرار ائدرکن، بو ماللارین ۲۸ مین ۵۰۰ تومنلیک ارز ایله ایدخال ائدیلدیگینی بیلدیریرلر.
