گوونلیگی بیلینمه‌ین و ۱۲ قات داها باهالی اولان واکسنلرین ایدخالی؛ خامنه‌ای‌نین امری‌نین ایرانلیلارا یاراتدیغی اذيتلر
ایرانا کرونا واکسنی‌نین ایدخالی یاواش و مبهم‌دیر و علی خامنه‌ای‌نین اینگیلیس و آمریکا واکسنلری‌نین گتیریلمه‌سینی قاداغان ائتمه‌سی امری واکسنلرین ایدخالیندا قاریشیقلیغا و دوزنسیزلیگه سبب اولوب.
۱۳ اردیبهشت بازار ائرته‌سی گونو، کرونایا قارشی موباریزه اوزره میلی قرارگاهین سؤزچوسو علیرضا رئیسی، اوچ میلیون چین کرونا واکسنی آلیندیغینی آچیقلادی، آنجاق واکسن ساتیجیلاری‌نین شرطلری‌نین شرکتین واکسنین یان ائتکیلری ایله باغلی هئچ بیر عهده‌‌لیگی‌نین اولماماسی اولدوغونو سؤیله‌دی.
کرونا قرارگاهی‌نین سؤزچوسو، چین واکسنی‌نین گوونلیگی‌نین بیلینمه‌دیگینی و یالنیز سککیز آیدان بیر ایله‌دک گوونلیگی تامین ائده بیله‌جه‌یینی سؤیله‌دی.
رئیسی، خامنه‌ای‌نین اینگیلیس و آمریکا واکسنلری‌نین گتیریلمه‌سینی قاداغان ائتمه‌سینه دایر امرینی ده شرح ائده‌رک، واکسن مارکاسی‌نین آمریکا اولدوغو و باشقا بیر اؤلکه‌ده اورتیلدیگی تقدیرده، واکسن آلینماسینا ایجازه وئره‌جکلرینی سؤیله‌دی.
او آرتیردی “مثلا، اؤزل سئکتور مدرنا آدلی آمریکا واکسنینی آلمان و یا هلنددن آلا بیلر و یالنیز آمریکا و اینگیلتره‌ده اورتیلن واکسنلرین ایدخالی قاداغاندیر.”
میلی کرونا قرارگاهی‌نین سؤزچوسو: “بیلین او کی، آکسفورد استرازنکا واکسنی ده اینگیلیس واکسنیدیر، آنجاق بو واکسنی گونئی کره‌دن آلمیشیق. “
عینی زاماندا، قیدا و درمان تشکیلاتی‌نین سؤزچوسو کیانوش جهانپور، کلاب‌هاوس‌دا اؤزل سئکتور فعاللاری ایله مجازی گؤروشده شرکتلرین واکسن ایدخالی اوچون اؤن فاکتورلاردان ۱۲ قات داها باها وئردیکلرینی سؤیله‌دی.
او ۴ دلارلیق واکسن اوچون ۵۰ دلارلیق بیر فاکتورا تکلیف اولوندوغونو و “واکسن گیت” باش وئرمه‌سی ایله باغلی ناراحاتلیقلارین اولدوغونو قئید ائتدی.
جهانپور، اؤزل شرکتلر طرفیندن تقدیم اولونان فاکتورلاردا 10 دلارلیق واکسنین قیمتینی ۲۵-۷۰ دلار آراسیندا یازدیقلارینی دئدی.
صحیه ناظرلیگی‌نین تقدیم ائتدیگی ایستاتیستیکایا گؤره، بو گونه قدر ایراندا یالنیز ۱ میلیون و ۲۵۲ مین اینسان ایلک دوزا کرونا واکسنی ووروب.
سون گونلرده حؤکومت مقاملاری‌نین ایرانداکی اؤنجه‌لیکلی قروپلارین واکسن سهمیه‌سیندن ایستیفاده ائتمه‌لری باره‌ده چوخ سایدا خبر وار.
بونونلا یاناشی، ایران صحیه ناظرلیگی اولوسلار آراسی حوقوقو پوزدوغونو اساس گتیره‌رک واکسن وورموش شخصلرین آدلاری‌نین آچیقلانماسینی قاداغان ائدیب.
iranwire
