گونئی آزربایجان دا اورمو گولو اوچون دووار یازمالاری
قئید ائدک کی، سون گونلرده آذربایجانلی مدنی فعاللارین اورمیه گؤلونون آجیناجاقلی دورومو ایله باغلی آچیقلامالاری یاییملاندیقدان سونرا تبریز، اورمیه، اردبیل، تیکان تپه، سولدوز، خوی و قوشاچای شهرلرینده تراکتلر چاپ ائدیله‌رک یاییلیب.
اورمیه گؤلونون قوروماسی سونوجوندا یارانان دوز فیرتینالاری‌نین یئنیدن باش وئرمه‌سی و توز مرکزلری‌نین ایشه دوشمه‌سی میلیونلارلا اینسانین ساغلاملیغینی تهلوکه آلتینا سالاجاق و بو سببدن ده بو گؤلون قوروماسی اولوسلارآراسی اکولوژی تهلوکه حساب اولونور.
اوزمانلارین فیکرینجه، اورمیه گؤلونون ساحللرینده توز طوفانلاری و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
کئچن آی دوغو آذربایجان اکین و طبیعی قایناقلار بیرلیگی تشکیلاتی‌نین رئیسی دئمیشدی: گؤل قورودوقجا بؤلگه‌نین اکینی و ۱۴ میلیون اینسانین حیاتی تهلوکه آلتینا دوشور.
او بیلدیرمیشدی کی، اورمیه گؤلونون جانلانماماسی ایله اؤلکه‌نین قوزئی-باتیسیندا دوزلو توز حادثه‌‌‌سی‌نین شاهیدی اولاجاغیق و یئرآلتی سو رزرولری‌نین شورانلاشماسی ایله یاناشی، بؤلگه‌ده اکینچیلیک ده محو اولاجاق.
ایندی ایسه آذربایجانلی فعاللار رییسی حؤکومتی‌نین بو مسئله‌‌یه ذره قدر دقت یئتیرمه‌دیگینی و بوتؤولوکده حؤکومتین بو بؤحرانی حل ائتمک اراده‌سی‌نین اولمادیغینی بیلدیریر.
#آذربایجان_خبرلری #اورمیه_گؤلو
