گرمی‌ده‌کی سئل سونوجوندا اؤلنلرین سایی ۷ نفره چاتیب
گرمی و بیله سوار شهرلرینده باش وئرن داغیدیجی سئل سونوجوندا ایتکین دوشموش ۵ نفرین جسدی خالق یاردیم قوّ‌لری طرفیندن چئشیدلی بؤلگه‌لرده تاپیلیب و سئل سونوجوندا اؤلنلرین توپلام سایی ۷ نفره چاتیب.
آغ‌داش کندی یاخینلیغیندا ایتکین دوشنلردن ۲ نفرین جسدی، احمدکندی کندی یاخینلیغیندا ۱ نفرین جسدی، مچیدلی کندی یاخینلیغیندا ۱ نفرین جسدی و شاهمار بی‌لی و غریب حاجی‌کندی کندلری آراسیندا اؤلنلردن بیری‌نین جسدی تاپیلیب.
ایلک گون اؤلن ایکی نفردن باشقا کی بیر قادین و بیر آزیاشلی اوشاق ایدیلر، دونن ۲۵ خرداد ۱۴۰۲-جی ایلده خالق یاذدیم قوه‌لری طرفیندن تاپیلان ایتکین دوشموش دؤرد جسد ۷، ۸، ۱۲ و ۱۳ یاشلی قیزلار و باشقا جسد ایسه ۲۵ یاشلی و ائولی بیر ارکک ایدی. جسدلرین حادثه یئریندن تخمیناً ۱۰، ۱۵ و ۳۵ کیلومتر اوزاقلیقدا تاپیلیب.
آلینان بیلگیلره گؤره سو باسمیش بؤلگه‌لرده یاشایانلارین یوزلرله مال-حئیوانی دا تلف اولوب.
آیریجا زرگر، میکائیل دره سی، توووز (طاووس) دره‌سی، دام‌داباجا، قارا آغاج، تیکانلی و… کندلری‌نین ساکینلری‌نین دورومو ناراحات وئریجیدیر و ساکینلر طرفیندن ایچمه‌لی سویون اولماماسی و یوللارین باغلی اولماسی باره‌ده بیلگی وئریلیب.
