گاندی هتل خسته‌خاناسیندا دهشتلی یانغین؛ تهراندا پولیس و اورژانسین خبردارلیغی
دونن ۵ بهمن گونو تهراندان یاییلان ویدئولارا گؤره، گاندی کوچه‌سینده‌کی گاندی هتل خسته‌خاناسیندا گوجلو یانغین باش وئریب. بعضی موشاهیده‌لر بو حادثه‌‌‌نین شدتینی بو خسته‌خانادا خسته‌لرین چوخونون یاشی‌نین یوکسک اولماسینی گؤستریر.
جوما آخشامی آخشام ساعت ۱۹-دا (۵ بهمنده) گاندی خسته‌خاناسی‌نین دوغو طرفینده یانغین باش وئریب و خسته‌خانانین باشقا قاتلارینا یاییلیب. بو خسته‌خانانین رئیسی‌نین سؤزلرینه گؤره، حاضردا گاندی خسته‌خاناسیندان خسته‌لر تخلیه ائدیله‌رک باشقا طب مرکزلرینه کؤچورولور.
بو یئرده اولان بعضی ژورنالیستلرین شکیللرینده چوخلو سایدا خسته بو خسته‌خانادان کؤچورولور. گاندی کوچه‌سی تامامیله باغلانیب، اطراف کوچه‌لرده نقلياتین حرکتینه محدودیت قویولوب. بو خبرلره علاوه اولاراق، خسته‌لرین یولداشلاری اونلاری ان قیسا زاماندا خسته‌خانادان کؤچورمک اوچون قایغیلانیرلار.
ایران خبر آژانسلاری‌نین وئردیگی بیلگیلره گؤره، گاندی خسته‌خاناسی‌نین رئیسی ده بو خسته‌خانانین بوشالدیلماسینی اعلان ائدیب و دئییب: بو خسته‌خانایا دين زیانلا باغلی هله ده بیلگیم یوخدور. لاکین یانغین خسته‌خانانین دوغو طرفیندن باشلاییب. حاضردا خسته‌خانانی تخلیه ائدیریک، لازیم گلرسه، خسته‌لر باشقا خسته‌خانالارا کؤچوروله‌جک.
عینی زاماندا تهران اورژانسی‌نین رئیسی اعلان ائدیب کی، شهرده‌کی اورژانس قوه‌لری تام حاضر اولمالیدیر. قضا یئرینده اولان تهران ایالتی‌نین اورژانسی‌نین مودیری محمد اسماعیل توکلی بیلدیریب کی، تهراندا اورژانس حاضر حالا گتیریلیب. آیریجا، گاندی خسته‌خاناسینا ایکی تعجیلی یاردیم اتوبوسو، دؤرد تعجیلی یاردیم ماشینی و ایکی موتورلانس گؤندریلیب.
بوندان علاوه، بؤیوک تهران یول پولیسی‌نین معاونی گاندی کوچه‌سی‌نین باغلاندیغینی و گاندی خسته‌خاناسی‌نین اطرافینداکی “نقليات محدودیتلرینی” اعلان ائتدی و اینسانلاردان بو خسته‌خانایا آپاران یوللاردان چکینمه‌لرینی ایسته‌دی.
عدليه مئدیا مرکزیندن وئریلن بیلگیلره گؤره، حادثه ایله باغلی پرونده آچیلیب و یانغینین سببلری آراشدیریلیر. بونونلا باغلی تهرانین گاندی خسته‌خاناسیندا باش وئرن یانغیندان سونرا تهران ساوجیسی علی صالحی‌نین امری ایله تهران ساوجیلیغی‌نین معاونلریندن بیری و اؤزل موستنطیق حادثه یئرینه گئدیب.
ایران خبر آژانسلاری‌نین بو حادثه‌‌‌نین سببی ایله باغلی ایلکین بیلگیلرینه گؤره، جوما آخشامی، ۵ بهمن آخشام ساعت ۱۹ جیواریندا تهرانین ولی عصر کوچه‌سینده یئرلشن گاندی خسته‌خاناسی‌نین دوغو حیصه‌‌‌سینده یئرلشن هتل بیناسیندا یانغین چیخیب و بو خسته‌خانانین اؤن اوزونون ماتئریالی سببیندن یانغین باش وئریب. یانغین سرعتله بو طب مرکزی‌نین باشقا حیصه‌‌‌لرینه ده کئچیب.
یانغین‌سؤندورمه ایداره‌سی‌نین سؤزچوسو سید جلال ملکی‌نین سؤزلرینه گؤره، خسته‌لرین هامیسی خسته‌خانادان چیخاریلیب و تهرانین باشقا طب مرکزلرینه کؤچورولوب.
