کند مخابرات ایشچیلری مجلیسین قارشیسیندا میتینق کئچیردیلر
بیر قروپ کند مخابرات کمیسیونجوسو (کارگزار) و چالیشانی مجلیس قارشیسیندا میتینق کئچیردی.
دیگر رسمی مخابرات چالیشانلاری ایله معاشلاری‌نین برابر‌لشدیریلمه‌مه‌سینه اعتراض اولاراق ایسلام مشورت مجلیسینین قارشیسیندا توپلاشانلار معاشلاری‌نین و ریفاه سوییه‌لری‌نین دیگر رسمی مخابرات چالیشانلاری ایله برابر اولماسینی طلب ائدیرلر.
مخابرات شرکتی‌نین اؤزل‌لشدیریلمه‌سیندن اؤنجه کند مخابرات کمیسیونجولاری کند مخابرات مرکزلرینده ایشله‌ییردی و حاضردا مخابرات شرکتی ایله دایمی و رسمی آنلاشمالاری واردیر. آنجاق هله ده دیگر دایمی چالیشانلار ایله برابر معاش و یا مادی گلیره صاحب دئییللر. اونلار دئییرلر کی، 25 ایلدن چوخ ایش تجروبه‌لرینه باخمایاراق، هله ده مخابراتدان «امک قانونلارینا» گؤره معاش آلیرلار.
کند مخابرات کمیسیونجولاری، مخابرات شرکتی ایله دایمی و رسمی آنلاشمالاری اولسادا، هله دیگر دایمی چالیشانلارلا عینی معاش و مادی گلیره صاحب اولمادیقلارینی ادعا ائدیرلر.
اؤلکه‌نین کند مخابرات کمیسیونجولاری جمعيتی‌نین تمثیلجیلری معاشلاری‌نین آرتیریلماسینی طلب ائتدیلر. اونلارین سؤزلرینه گؤره، قانون‌وئریجی‌نین 83-جو ماده‌‌نی قبول ائتمکده مقصدی ایش تهلوکه‌‌‌سیزلیگینی یاراتماق، آیری‌سئچکیلیگی آرادان قالدیرماق و امک حاقی عدالتینی یاراتماق ایدی. لاکین مخابرات شرکتی مسئله‌‌یه فرقلی بیر نظر سالدی و ساده‌جه امک حاقی عدالتی‌نین ایزی اولمایان دایمی بیر آنلاشما اوچون قرار وئردی.
