کریم اسماعیل‌زاده تبریز اینقیلاب محکمه‌‌سینه چاغیریلیب
ایدمانچی، و تورک مدنی فعال کریم اسماعیل‌زاده الکترون بیلدیریش سیستمی (ثنا) واسطه‌‌‌سیله آلدیغی بیلدیریشه اساساً، ۲۹ آذر ۱۴۰۲ ساعت ۱۰-دا تبریز اینقیلاب محکمهسینین بیرینجی شؤبه‌سینده اولمالیدی.
جناب اسماعیل‌زاده اؤز اینستاگرام صفحه‌‌‌سینده سؤزوگئدن بیلدیریشی یایاراق بیلدیردی کی، تبریز اینقیلاب محکمهسینین بیرینجی شؤبه‌سی طرفیندن اونون اتهامی “داخیلی/خواریجی گوونلیگه قارشی جینایت تؤرتمک اوچون توپلاشماق و ال‌بیر اولماق” و “ ایران ایسلام جمهورییتینه قارشی تبلیغات” آدلاندیریب.
تهدیدلر، چاغیریشلار، دؤیولمه‌لر و حبسلر کئچمیشی اولان کریم اسماعیل‌زاده ۲۵ مرداد ۱۴۰۲-جی ایلده استادیوما داخیل اولارکن گوونلیک ایشچیلری و موغان شهری‌نین مدنی فعاللاری عبدالله انصاری، مهدی نصیرزاده و ابراهیم رضایی ایله بیرلیکده اونون قارشیسینی آلاراق دؤیه‌رک حبس ائتدیلر.
جناب اسماعیل‌زاده ۲۸ مرداد گونو گیروو قارشیلیغیندا تبریز عومومی و اینقلاب محکمهسینین ۱۰-جو شؤبه‌سی طرفیندن محکمهیه قدر سربست بوراخیلمیشدی.
آیریجا بو آذربایجانلی ایدمانچی اورمیه گؤلونون قوروماسینا اعتراض اولاراق ۵ شهریور گونو گوونلیک گوجلری طرفیندن حبس ائدیلیب و ۶ مهر گونو محکمهیه قدر ۶۰۰ میلیون تومن گیروو قویولاراق سربست بوراخیلمیشدی.
