کرونا ویروسونون باشلانغیجیندان بری ایران حکیملری آراسیندا ۳۰۰ اؤلوم و ۳ مین کؤچ باش وئریب
ایران طب سیستمی تشکیلاتی‌نین معاونی علی فتاحی، ایراندا کرونا ویروسونون باشلاندیغی گوندن بری ۳۰۰ حکیمین ویروسون قوربانی اولدوغونو سؤیله‌دی.
رکنایا گؤره ایران طب سیستمی تشکیلاتی‌نین معاونی، ۲۱ دی ۱۳۹۹-جو ایل بازار گونو، طب ایشچیلری‌نین ایلک گوندن بری خالقین یانیندا اولدوغونو آچیقلادی: “حکیم و طب باجیلاری همکارلاریمیز، بوتون چتینلیکلره باخمایاراق، هله ده دؤیوش مئیدانیندادیرلار و اوزون مدت خسته‌لرین یاتاقلاری‌نین باشیندا ماسکالار و قورویوجو پالتار گزیرلر.”
او، آیریجا ایراندا تحریملر ایله باغلی “تجهیزات و درمانلار” باخیمیندان چاتیشمازلیقلار اولدوغونو سؤیله‌دی.
داها اؤنجه ۲۰ دی ۱۳۹۹-جو ایل تاریخینده ایران طب سیستمی تشکیلاتی‌نین توییتر حِسابی، کرونا دؤورونده ۳ میندن چوخ ایران حکیمی‌نین کؤچ ائتدیگینی آچیقلادی: “کرونا باشلانغیجیندان بری اون آیدان چوخ مدت عرضینده ۲۰۰ نفردن چوخ حکیمین شهید اولماسی آغیر بیر دورومدور. آنجاق، عینی زاماندا بو اون آیدا بلکه ده ۳ مین نفردن چوخ حکیمین اؤلکه‌دن کؤچ ائتمه‌سی داها دا آجی وئریجی‌دیر.”
کروناویروسدان سونرا طب باجیلاری‌نین دورومو ایله باغلی اولاراق، ۲۷ آذر ۱۳۹۹-جی ایل تاریخینده طب باجیلاری تشکیلاتی‌نین رییسی “محمد میرزابیگی” خسته‌لرین یاتاقلاری‌نین باشیندا ایشله‌ین تخمیناً ۱۴۵ مین طب باجیسیندان ۶۰ مینی کووید-۱۹ خسته‌لیگینه یولوخوب و ۶ مینی ایسه قرنطینه آلتیندادیر و یا ایزینه چیخیبدیر و تخمیناً ۱۰۰ نفر بو خسته‌لیکدن حیاتینی ایتیریب.
