کرونا، محرمده قوزئیه اولان سفرلری لغو ائده بیلمه‌دی
کرونا بؤحرانیندان سونرا چوخ ساییدا اینسانین ایرانین قوزئی ایالتلرینه سیاحت ائتمه‌سی بو ایالتلرده‌کی بعضی مقاملار طرفیندن تنقید ائدیلدی.
صحیه ناظرلیگی‌نین موعالیجه اوزره معاونی قاسم جان‌بابایی، «مازاندارانا سیاحت ائدن یولجولاردان گیلئیلی اولدوغونو» دئدی.
جان‌بابایی دئدی «بو سفرلردن سونرا کرونا خسته‌لیگی ساییلاری‌نین آرتماسی بیزی قایغیلاندیریر و بعضی اینسانلارین سهلاًکارلیغی طبّ ایشچیلری‌نین یورولماسینا سبب اولوب».
او دئدی «قایدالارا عمل ائتمه‌ین و سیاحته چیخان اینسانلار اوچون داها جدی موداخیله‌لر ائدیلمه‌لیدیر.»
گیلان طبّ علملری بیلیم‌یوردونون رئیسی ارسلان سالاری دا دئدی «تأسف کی، ایالتده‌کی بعضی پارکلاردا ساغلاملیق قایدالارینی رعایت ائتمه‌دن دوشرگه قوران سیاحت ائدنلری گؤروروک.»
سالاری، گیلان ایالتینده کرونا ویروسو اولان ۷۵ یئنی خسته‌دن ۱۵نفری‌نین سیاحت ائدنلردن اولدوغونو دئدی.
آیریجا دیگر ایالتلردن اولان بیر چوخ سایدا سیاحین گیلاندا اولماسی‌نین قایغی وئریجی اولدوغونو سؤیله‌دی.
