کرجلی یئنی‌یئتمه قیز ملیکا برجی مامورلارین آتشی سونوجوندا آلدیغی یارالار سونوجوندا حیاتینی ایتیریب
ایران خبر آژانسلاری‌نین وئردیگی بیلگیلره گؤره، اؤتن ایلین اسفند آییندا مامورلارین آچدیغی آتش سونوجوندا یارالانان کرجلی یئنی‌یئتمه قیز ملیکا برجی آلدیغی یارالار سونوجوندا خسته‌خانادا دونیاسینی ديیشیب.
ایسنا دؤولت خبر آژانسی‌نین اؤتن ایل ۲۴ اسفند ده وئدیگی بیلگیلره گؤره، البورز پولیسی‌نین خبرلشمه مرکزی کرجین بیر حیصه‌‌‌سینده دئوریه آپاران پولیس امکداشلاری‌نین آغ رنگلی ۲۰۶ پژو مارکالی اتومبیلی ساخلاماغی ایسته‌دیگینی و او ماشینین پولیسدن قاچدیغینی آچیقلاییب.
بو خبره گؤره، البورز پولیسی‌نین بیلدیریشینده بیلدیریلیب کی، مامورلار ماشینی ساخلاماق اوچون آتش آچیبلار، تأسف کی، آتیشما زامانی ایکی گولـله بیر قادین و بیر یئنی‌یئتمه قیزا ديیب، اونلار حادثه‌‌‌دن سونرا درحال ساغلیق مرکزینه آپاریلیبلار.
بو خبرده بیلدیریلیر کی، موتهیمین اتومبیلی بیر نئچه دقیقه‌دن سونرا ساخلانیلیب و اورادا اولانلار حبس ائدیلیب. تقصیرلندیریلن شخصین اتومبیلیندن خئیلی میقداردا نارکوتیک ماده تاپیلیب.
