کرج‌ده سون ایکی گونده ۷ محبوسون اعدام جزاسی ایجرا ائدیلیب
اینسان حاقلاری تشکیلاتلاری‌نین راپورونا گؤره، سون ایکی گونده البورز ایالتی‌نین حبس‌خانالاریندا ان آزی ۷ محبوس نارکوتیکله باغلی کیمی اتهاملارلا اعدام ائدیلیب.
هنگاو اینسان حاقلاری تشکیلاتی بیلدیریب کی، چارشنبه گونو، ۹ آبان‌دا محمد جلالی» کیرمانشاهلی، «سامان انبری» و یزدلی اولان «مصطفی غلام‌زاده» آدلی اوچ محبوس کرجده‌کی قزل‌حصار حبس‌خاناسیندا اعدام ائدیلیب.
بونونلا یاناشی، کرج مرکزی حبس‌خاناسیندا ان آزی داها دؤرد محبوسون اعدام حؤکمو ایجرا ائدیلیب.
ایسلام جمهورییتی حبس‌خانالاریندا اعدام حؤکملری‌نین ایجراسی سون آیلاردا کسکینله‌شیب و “ایران اینسان حاقلاری” تشکیلاتی‌نین راپورونا اساساً، بو ایل ان آزی ۶۲۰ نفر اعدام ائدیلیب کی، اونلاردان ۲۱ نفری قادین، بیری ایسه ۲۱ یاشدان آشاغی ایدی.
ایرانین حوقوق ساوونوجولاری قروپونون اورقانی اولان هرانا دا ۱۰ اکتبر ۲۰۲۳-جو ایلدن ۸ اکتبر ۲۰۲۴-جو ایله دک ایران حبس‌خانالاریندا ان آزی ۸۱۱ وطنداشین، او جومله‌‌‌دن دؤرد اوشاق سوچلونون اعدام ائدیلدیگینی بیلدیریب.
