کانادادا ایسلام جمهورییتی ایله امکداشلیق اتهامی ایله اوچ ایرانلی تعقیبه آلینیب کانادادا ایسلام جمهورییتی ایله امکداشلیق اتهامی ایله اوچ ایرانلی تعقیبه آلینیب
کانادانین سی‌بی‌سی خبر آژانسی‌نین وئردیگی بیلگیلره گؤره، آمریکا فدرال آراشدیرمالار اوفیسی (اف‌بی‌آی) یوز میلیونلارلا دوللاری گیزلتمکده و ایسلام جمهورییتینه آمریکا سانکسییالارینی دلمه‌سینه یاردیم ائتمکده اتهام اولونان و کانادا دا یاشایان اوچ ایرانلی شخصی تعقیبه آلیب.
بو کانادا خبر شبکه‌سی ۲۶ بهمن چارشنبه گونو راپوروندا بو اوچ نفری کانادادا داشینماز املاک بازاریندا فعال ایش آداملاری کیمی تقدیم ائتدی. بو اوچ نفرین، کیملیگی سلیم هناره، خلیل هناره و سعید (سام) تراب ابطحی اولاراق آچیقلانیب.
اؤز شخصی سایتیندا سلیم هناره اؤزونو تورنتودا اؤزل منزیل وامی شرکتی‌نین باش مودیری اولاراق تقدیم ائدیر. بونونلا بئله، آمریکا داها اؤنجه تورنتوداکی “پرسپولیس” و “راسکو” آدلی ایکی صرافی‌نی سلیم هناره‌نین فعالیتی ایله باغلی ایسلام جمهورییتی ایله امکداشلیقدا اتهام ائتمیشدی.
خلیل هناره سوسیال شبکه‌لرده اؤزونو انتاریو ایالتینده تورنهیل شهرینده یئرلشن داشینماز املاک بروکئری، شرکتین سایتیندا ایسه ایسلام جمهورییتی ایله امکداشلیقدا اتهام اولونان سام تراب ابطحی سلیم هناره ایله علاقه‌‌‌لی اؤزل منزیل وامی شرکتی‌نین یاردیمجیسی کیمی تقدیم ائدیب.
کالیفرنیا بؤیوک مونصیفلر هئیتی ۲۰۲۱-جی ایلین آوریل آییندا سالیم هناره، خلیل هناره و سعید تراب ابطحی‌نی اتهام ائتمک اوچون کیفایت قدر دلیل اولدوغو قناعتینه گلدی.
۲۰۲۱-جی ایلین آوریل آییندا کالیفورنییا محکمه‌‌سینده چیخاریلان اتهامنامه‌ده ادعا ائدیلیر کی، ان آزی ۲۰۲۲-جی ایلدن ۲۰۱۸-جی ایله قدر ۷۵۰ میلیون دوللاردان چوخ سانکسییادان یایینما اولوب، او جومله‌‌‌دن ديری ۵۱ میلیون دوللاردان چوخ اولان ایکی نفت تانکئری‌نین آلینماسی ایسلام جمهورییتی طرفیندن ده یاردیم ائدیلیب. محکمه قرار وئررسه، بو اوچ موتهیم ۲۰ ایل مدتینه آزادلیقدان محروم ائدیله بیلر.
بو باره‌ده داها اؤنجه کانادانین باش ناظری جاستین ترودو بیلدیریب کی، اونون اؤلکه‌سی آرتیق فاسد و دهشتلی ایران رئژیمیندن قازانج الده ائدن اینسانلار اوچون سیغیناجاق اولمایاجاق.
