ژورنالیستلره تضییق: عالیه مطلب‌زاده چاغیریلدی و علی پورطباطبایی حبس اولوندو
ایران حؤکومتی‌نین ژورنالیستلره تضییقلری‌نین داوامی اولاراق، ۱۴ اسفند ۱۴۰۱، بازار گونو حبسدن بیر مدت اؤنجه آزادلیغا چیخان فوتوقرافچی و ژورنالیست عالیه مطلب‌زاده اوین محکمه‌سینه چاغیریلیب و قوم قزئتی‌نین یازارلاریندان علی پورطباطبایی حبس ائدیلیب.
چاغیریش ورقه‌سی‌نین شکلینی یاییملایان خانیم مطلب‌زاده اینستاگرام صفحه‌‌‌سینده یازیب: آزادلیغا چیخماغیمدان ۲۵ گون کئچدی و بو مدت ایچینده اوین محکمه‌‌سینده گؤرونمک اوچون ایکی بیلدیریش آلدیم. بیرینجیسی ۲۳ اسفند، دونن آخشام اعلان ائدیلن ایکینجیده ایسه گئتمه‌م اوچون بئش گون واخت وئریبلر.
عالیه مطلب‌زاده هانسی اتهاملا چاغیریلدیغی باره‌ده بیلگی‌سی‌نین اولمادیغینی وورغولاییب.
عالیه مطلب‌زاده ۲۳ فروردین گونو نرگس محمدی‌نین ائوینده، عینی گونده جزالارینی چکمک اوچون حبس‌خانایا گئتمیی پلانلاشدیرارکن، اطلاعات ناظرلیگی‌نین امکداشلاری طرفیندن حبس ائدیلیب.
بو فوتوقرافچی و قادین حوقوقلاری فعالی “اؤلکه‌نین گوونلیگینه قارشی توپلاشماق و ال‌بیر اولماق” و “رئژیمه قارشی تبلیغات” اتهاملاری ایله ۳ ایل حبس جزاسینا محکوم ائدیلمیشدی، لاکین سیاسی محبوسلارین و حبس ائدیلنلرین سون آزاد ائدیلمه‌سی زامانی ۲۰ بهمنده آزادلیغا بوراخیلمیشدی.
ایراندا ژورنالیستلرله باغلی باشقا بیر خبرده قوم نیوز خبر سایتی‌نین یازاری علی پورطباطبایی بو بازار گونو قومدا حبس ائدیلیب.
اؤتن گونلرده جناب علی پورطباطبایی اوخوللاردا، اؤزللیکله قوم اوخوللاریندا اؤیرنجیلرین زهرلنمه‌سی ایله باغلی خبرلری ایزله‌ییردی.
ایسلام جمهورییتی‌نین محکمه سیستمی هله‌لیک بو ژورنالیستین حبسی‌نین سببلری ایله باغلی آچیقلاما وئرمه‌ییب.
