چیخیش ائدیر : خلیل رضا اولوتورک / دکتر فرمان فرضی
اؤرنک‌سیز توپلوم (جامعه‌ی بدون الگو)، یاد قاپیلاردا دیدرگین دوشر. هر خالقین گووندیگی، ایناندیغی میللی-مدنی اؤرنک‌لری و اک اؤنجول‌لری(پیش‌قراول‌لاری) وار. سون زامانلار باتی(غرب) مئدیاسی‌نین، بیزلره و دونیا میلت‌لری غالب ائتدیگی و قالب ائتدیگی قوندارما سلبریتی‌لری، بیزی بیزلیک‌دن و اؤزلوکدن اوزاق سالسا دا، بیز یئنه اؤز اؤرنک‌لریمیزی تاپیب، اونلارا سیغینمالی، اونلارین گؤستردیگی یولا و دوشونجه‌یه سیلاحلانمالی‌ییق.
بیزیم بوگونوموز و صاباحیمیز اوچون ان واجیب، ان تمیز و ان دوزگون اؤرنک‌لرین و اؤنجول‌لرین بیری بؤیوک متفکر، محتشم عالیم و دؤیوشچو شاعیریمیز خلیل‌رضا اولوتورک‌دور. خلیلین سیماسیندا بوتون بیر وطن سئوگیسی آچیق آیدین پاریلداماقدادیر.
خلیلین دوشونجه‌سینده بیرنئچه عوض اولماز و محتشم پرنسیپ وار، منیم دوشوندویوم قدر او پرنسیپ‌لر بونلاردان عبارت‌دیر:
انسان بختور اولماق اوچون اونون مستقل وطنی اولمالی‌دیر، او مستقل وطن یاغی تاپداغیندان اوزاق، اجنبی باسقینیندان ایراق، صیرف میللتین سسی و اراده‌سی ایله یارانیب، یاشامالی‌دیر.
مستقل وطن دوزلتمک اوچون، وطنداش ساوادلی، درین دوشونجه‌لی اولمالی و دونیا معاصر علم‌لرینه سیلاحلانمالی‌دیر.
مستقل وطن دوزلتمک اوچون وطن اوغروندا چالیشانلار تمیز اولمالی‌دیرلار. تمیزلیک بیر دؤیوشچونون (مبارزین) ان بؤیوک و ان گوجلو سیلاحی‌دیر و شخصی حیاتیندان توت گئت، تا اجتماعی و سیاسی حیاتینا قدر بو تمیزلیک گؤزه چارپمالی‌دیر. وطنداش تمیزلیگه صیرف بیر اخلاقی فضیلت کیمی دئییل، بلکه بیر چیخیش یولو کیمی و بیر سیلاح کیمی اینانمالی‌دیر.
مستقل وطن اوچون چالیشانلار ایناملی اولمالی‌دیرلار، و بو اینام اؤزونو تانیماقدان، تاریخینی، کولتورونو درین دوشونمکدن، کئچمیش قهرمانلارینی تانییب عزیزله‌مک‌دن دوغولان بیر میللی اؤز-گوون دن ایره‌لی گلیر.
وطن اوغروندا دؤیوشن دؤیوشچو اوز خالقی ایله مهربان و اؤز خالقینا عاشیق اولمالی‌دیر. او اوز خالقینی آغ – قارایا، ساغ – سولا، اوزاق – یاخینا بؤلمه‌مه‌لی‌دیر. او اؤز سلیقه‌سی ایله فرقلی اولان باجی-قارداشلارینی نفرت‌له، تهمت‌له و اخلاقسیزلیق‌لا ازمه‌مه‌لی‌دیر. بیر اصیل میللتچی، صیرف بیر جووقانی، بیر قوروپو یا بیر نئچه یولداشی دگیل، بلکه بوتون میللتی تمثیل ائتمه‌لی‌دیر.
