چوخ گوزل بیر شعر ، آنا دیلیمیزده; کندیمیز
کندیمیز
گوره سن داغدا چوبان، کَتده سولئیمان گئنه وار؟
ساپ ساری یاغلی فتیر، داشلی دگیرمان گئنه وار؟
میس قازان، تاختا قاشیق،مجمه ای، چاتداق لوله یین
سایاچی،چرچی،آشیق،شنلیگه عنوان گئنه وار؟
ائوده رف آینا داراق،بوینو اوزون لامپا چیراق
تور بئشیک کورپه اوشاق، کورسویه ایمکان گئنه وار؟
جهره نین یون ائشه سی،گوی قمیشین اَل سله سی
گوزه مین فرش گبه سی،نئهره ده آیران گئنه وار؟
یاناجاق یاپبا اودون،تیرمه جئجیم،سوتلو قویون
خرمن اوستونده اویون،آت قووان اوغلان گئنه وار؟
خینادا شیرنی نوغول، به ی حامامی موفته یویول
چال چاغیر اوینا یورول،چالماغا میزقان گئنه وار؟
اوجا بُوی اَنلی کورک،شانلی ایگید زورلو بیلک
گول دئییب گول ائشیدک،بیر ائله دووران گئنه وار؟
بئچه بال، دادلی کره، تندیر آشی، یارما تره
بیچین اوستونده شَنَه، باغچادا باغبان گئنه وار؟
بوغچادا شلته تومان،طاقچادا تسبیح جاناماز
وسمه،سورخاب،خوش عطیر،جعبه ده کیرشان گئنه وار؟
گینه چرشنبه گلین خونچاسی یوللانمادادیر؟
ائل اودون تونقال اوچون،ییغماغا مئیدان گئنه وار؟
پهلیوان یازدا گلیب بیرده قورور معرکه سین؟
قوچ دویوشدورمگه او عرصه ده جوولان گئنه وار؟
بولاق اوستونده گینه قیز بزه نیب،سورمه له نیر؟
اونا خافدان دولاشیب، سوز آتان اوغلان گئنه وار؟
شوخ باخیش فیتنه گولوش قونجا دوداق اینجه یئریش
اویدوروب یولدان ائدن، گوزلری جئیران گئنه وار؟
باهارین شئه نفسی، به ی گلینین توی هوسی
بولبولون نغمه سسی،کندخودا نارمان گئنه وار؟
یوخلاییر وارلی فاغیر،یوخسولو خلوتده گئنه وار؟
او قدیم لر سایاغی،خالقدا ویجدان گئنه وار؟
صاف اوره ک ایلقاری دوز،آندا اینام قاییل اولان
بوغ توکون بورجا قویان،ضامنه انسان گئنه وار؟
دوغما یوردوندا یازیب، پوزماغا حسرتده یانان
یازدیران شئیخه دوعا،مردم نالان گئنه وار؟
یوخسا کتدن بئزیشیب،هامپالیغین گوزدن آتیب
اوز توتوب شهره ساری،سئل کیمی کروان گئنه وار؟
نئیله مه ک چاره نه دیر؟ قورغو قوران بئیله قوروب
گونده مین حوققا یالان،مظلوما هرآن گئنه وار
داوا دوکتور،خییاوان،بیر توره لی باشلی حامام
اولمایان یئرده یقین یوز دونه وئیلان گئنه وار
برق،سو، تیلفون و گاز، کورپولو یول،درسه مکان
وار یا کورلوق یارادان، مخلوقا نقصان گئنه وار
قالمیشام چاره نه دیر؟موشکول آچان ال لر هانی؟
گوره سن خئیر ایشه بیر اولکه ده،خواهان گئنه وار؟
یازیق اولسون او شیرین خاطره لر سونمه ده دیر
نه قدر یازسا قلم (کوثری) داستان گئنه وار.
“حاج محمدآقا باقریان(توفیق) بستان آباد، کوثری”
