پیمان ابراهیمی‌نین حبس قراری داها بیر آی اوزادیلیب
تبریزلی تورک مدنی فعال و آذربایجان رقصی موعلیمی و ۵۰ گوندور حبسده اولان پیمان ابراهیمی‌نین حبس مدتی محکمه و گوونلیک قوروملاری طرفیندن داها بیر آی اوزادیلیب.
اونون یاخینلاری‌نین وئردیگی بیلگیلره گؤره، ۲۰ مهر ۱۴۰۲-جی ایل جوما آخشامی سحر بو وطنداشین عائله‌‌‌سی‌نین تعقیبی سونوجوندا تبریز عومومی و اینقیلاب ساوجیلیغی‌نین ۱۵-جی شؤبه‌سی‌نین باشچیسی حاکم موسوی بو فعالین حبس مدتی‌نین داها بیر آی اوزالدیلیغنی بیلدیریب.
بوندان اؤنجه اونون گیروو قارشیلیغیندا کئچیجی اولاراق محکمه‌‌یه قدر سربست بوراخیلاجاغی باره‌ده ساوجیلیغین وئریدیگی وعد یئرینه یئتیرمه‌ییب.
قئید ائدک کی، گوونلیک گوجلری پیمان ابراهیمی‌نی ۲۶ مرداد دا تبریزده حبس ائدیبلر.
ساخلانیلان زامان اونون آغیر شکیلده دؤیولدویو و یارالاندیغی بیلدیریلیب. دؤولت قوروملاری فعالین اتهامی باره‌ده آچیقلاما وئریمیرلر.
پیمان ابراهیمی آذربایجانلی مشهور ایفاچی آشیق قافارین اوغلودور و آذربایجان رقص موعلیمیدیر.
