پویا بختیاری‌نین آناسی زنجان حبس‌خاناسیندا گؤروش و تلفون دانیشیقلاریندان محروم ائدیلیب
هرانا اینسان حاقلاری آژانسی پویا بختیاری‌نین آناسی ناهید شیرپیشه‌نین زنجان حبس‌خاناسینداکی دورومو ایله باغلی خبر پایلاشاراق، بو ادعاچی آنانین گؤروش و تلفون دانیشیقلاریندان محروم ائدیلدیگینی آچیقلاییب.
ناهید شیرپیشه ۱۳۹۸-جی ایل آبان اعتراضلاریندا اؤلدورولن پویا بختیاری‌نین آناسیدیر. اوغلونون قانینی یئرده بورخماماق اوچون مجادله ائدن بو آنا ۵ ایل آزادلیقدان محروم ائدیلیب و حاضردا زنجان حبس‌خاناسیندا حبسده‌دیر.
هرانا خانیم شیرپیشه‌یه یاخین قایناغا ایستناداً یازیب کی، اؤتن ایلین تیر آییندان اونا زنگ آچماق قاداغان ائدیلیب و سون هفته‌لرده عائله‌‌‌سی ایله گؤروشمک ایمکانیندان محروم ائدیلیب.
بو قایناق بیلدیریب کی، ناهید شیرپیشه‌نین دوروموندان خبرسیز اولماسی محبوسون عائله‌‌‌سی و یاخینلاری‌نین ناهیدین دورومو ایله باغلی ناراحاتلیغینی آرتیریب.
البرز ایالتی‌نین کرج اینقیلاب محکمه‌‌سی‌نین ۱-جی شؤبه‌سی اؤتن ایلین شهریورده ناهید شیرپیشه‌یه ۵ ایل حبس جزاسی وئرمیشدی. بو ادعاچی آنانین اتهاملاری اؤلکه‌نین گوونلیگینی پوزماق مقصدی ایله ال بیر اولماق و توپلاشماق و رژیمه قارشی تبلیغات فعالیتی اعلان ائدیب.
کرجده‌کی کچویی حبس‌خاناسیندا ساخلانیلان خانیم شیرپیشه تخمیناً ۸ آی اؤنجه زنجان حبس‌خاناسینا کؤچورولوب.
ناهید شیرپیشه‌نین اوغلو پویا بختیاری ۲۵ آبان ۱۳۹۸-ده کرجین مهرشهرینده حؤکومت مامورلاری طرفیندن باشینا بیرباشا سلاح ایله وورماق سونوجوندا دونیاسینی ديیشیب. او واختدان بری بختیاری عائله‌‌‌سی ایران حؤکومتی طرفیندن اوغوللاری‌نین قانیندان کئچمه‌دیکلرینه گؤره محکمه‌‌یه وئریلمه‌سی اوچون جدی تضییقلره معروض قالیب.
پویا بختیاری‌نین آتاسی منوچهر بختیاری ده اوغلونون قانیندان کئچمه‌دیگی ایله اتهام اولوناراق ۳ ایل ۶ آی مدتینه آزادلیقدان محروم ائدیلیب و حاضردا حبس جزاسینی چکیر.
